Arkiv-Lajme

Lajmi i djeshëm nga Kosova që fliste për prangosjen e një grupi të dyshuar si terrorist, sipas policisë kosovare lidhej kryesisht me agresionin fizik ndaj dy shtetasve amerikanë të një shoqate fetare, por edhe me dyshime mbi veprimtarinë e tyre në Sirinë e përfshirë nga flakët e luftës. Në total bëhet fjalë për gjashtë persona, Valon Sh., Musli H, Ardian M., Nuredin S., dhe Bekim M, me të dyshuarin kryesor Genc S. në krye.

Në një mjedis qibar, në bar-librarinë e famshme “e Për7shmja”, larg stilit e pompave komerciale, është përuruar libri i Ardian Vehbiut “Sende që nxirrte deti”. Autori që banon në New York ka ardhur në Tiranë, si gjithnjë, në prag të panairit të librit, dhe – sërish si gjithnjë – ka ardhur me një libër të ri të tijin. Në “Sende që nxirrte deti”, Vehbiu përshkruan, shpjegon e analizon marrëdhënien e mistershme apo mistike të shqiptarëve me perëndimin.

Pak ditë pasi supertajfuni Haijan masakroi popullsinë filipinase, ku shifra prej 10 mijë viktimash vetëm nga një qytet mbetet gjithsesi provizore dhe hipotetike, një stuhi e re kërcënon brigjet e ishujve Filipine. Huffington Post njofton për bërthamën me presion të ulët me emrin Zoraida, që sot I është aftuar ishullit Mindanao dhe pritet të përshpejtojë nesër, drejt ishullit Surigao. Edhe pse, sipas AP, këto rajone pësojnë mbi 20 tajfune në vit dhe janë të përgatitura për t’i përballuar, përmasat dhe forcën e dukurive si Haijan është zor të përballohen.

Plot 8 javë pas dekretimit të qeverisë Rama, filloi anketimi i dytë i kampionit të BAROMETWR24 dhe rezultatet e tij do të publikohen të martën në orën 20 në NEWS24 nga Dr. Eduard Zaloshnja, drejtuesi i BAROMETWR24, raporton Balkanweb, që sqaron se kampioni është i njëjtë me atë që u sondua në tetor.

Mediat në vendet demokratike kanë dhjetra vjet që i japin mundësi elektoratit t’i bëjë të njohura opinionet e tij nëpërmjet sondazheve periodike të opinionit.  Në Shqipëri, NEWS24 është i pari medium që po e krijon këtë mundësi nëpërmjet sondazhit periodik BAROMETËR24.

Vizita e gjatë e eurokomisionerit për Zgjerimin, Stefan Fyle në Tiranë, nisi me takime me presidentin Nishani dhe kreun e Kuvendit Meta, dhe vazhdoi me kryeministrin Edi Rama. Në konferencën e përbashkët për shtyp, Fyle inkurajoi qeverinë shqiptare që të përmbushë prioritetet dhe të tregojë vendosmëri (Fyle i veçoi këto të dyja) në luftën kundër krimit e korrupsionit, në mënyrë që Shqipëria të bëjë një hap përpara drejt integrimit evropian. 

Deputetja demokrate Mesila Doda njofton se ka dorëzuar në sekretarinë e Kuvendit kërkesën për interpelancë me kryeministrin Rama mbi çështjen e stoqeve kimike siriane. Doda shkruan në fb se e bëri këtë në respekt të protestuesve ambientalistë, por nuk thotë se cili është qëndrimi i saj për këtë çështje delikate. Në fakt, as PD, zyrtarisht e aq më pak përmes kryetarit Basha nuk ka bërë të qartë se ç’qëndrim ka për stoqet siriane: Të thuhet Jo ndaj kërkesës amerikane, të pranohen, të thuhet Po ama të vihen disa kushte?

Jo rrallë herë “të huajt”, sidomos ata ca më larg se vendet fqinje, na shohin ende si një vend misterioz nga i cili dalin lajme të një kohe tjetër, si fjala vjen, burrneshat e malësisë apo fenomeni i gjakmarrjes.  Supozohej që gazetari i njohur amerikan Fareed Zakaria ta kapërcente këtë përkufizim. Por ja që nuk qe e thënë. Ai intervistoi në emisionin e tij në CNN, me titull GPS, kryeministrin shqiptar Edi Rama, dhe e pyeti gjerë e gjatë për…fasadat e Tiranës kur ishte kryetar bashkie.

Ministria e Energjetikës ka vendosur pak ditë më parë të pezullojë lejen minerare në zonën më problematike të Bulqizës, të ashtuquajturën zona D. Raporti i zbardhur nga Top Channel konstaton probleme me kushtet e sigurisë në punë, por edhe shkelje të rënda të ligjit nga privatët, deri në moszbatimin e urdhërave të institucioneve.

Përpara një “tapeti” çadrash shiu prej nga ngriheshin herë pas here duar me dy gishtat lart, kryetari i PD-së Lulzim Basha mbajti pak më parë fjalimin qëndror të protestës së Partisë Demokratike përpara kryeministrisë, kundër “vjedhjes së votës në Korçë”. Ishte protesta e parë pas zgjedhjeve të 23 Qershorit që shënuan dhe rotacionin politik. Në marshimin që parapriu tubimin në sheshin Dëshmorët e Kombit, prinë në krye Basha, ish-kryetari Berisha, Jozefina Topalli, Jorida Tabaku, Astrit Patozi etj.

Ishin të pritshme debatet në komisionin e Integrimit, lidhur me projektligjin për asistencën e shërbimit doganor me kompaninë “Crown Agent”. Deputeti demokrat Genc Ruli ka theksuar se kontrata me “Crown Agent” është më e dobëta e realizuar nga shteti shqiptar, pasi ajo “nuk ka parashikuar asnjë penalitet për firmën e huaj, nëse ajo nuk përmbush kërkesat. Nuk është respektuar transparenca dhe rregullat ligjore për kontratën. Kompania "Crown Agent" në rajon ka dështuar, kontrata nuk duhet të miratohet”.