Arkiv-Lajme

Drejtoria e Doganave zhvilloi të premten analizën 12 mujore të punës së saj, nën qeverisjen e mazhorancës së majtë. Në fjalën e saj, drejtoresha, Elisa Spiropali, theksoi se, gjatë këtij 1 viti, janë arkëtuar 18.9 miliardë lekë, ndërsa shtoi se, tashmë doganat kanë edhe një kod të ri doganor që do të hyjë në fuqi më 1 janar të vitit të ardhshëm. Sa i përket luftës ndaj korrupsionit, Spiropali u shpreh se në 12 muaj janë bërë 126 kallëzime, ose më saktë 117% më shumë se një vit më parë, të bizneseve që kërkonin të ruanin pozicionin e tyre në treg përmes pandëshkueshmërisë.

Erjon Veliaj ka reaguar në lidhje me skandalin e zbuluar nga emisioni “Fiks Fare”, që tregoi se si kreu i shoqatës “Jetimët në Fokus”, Maksim Liço, për t'i dhënë statusin e jetimit, i kërkoi marrëdhënie seksuale një të mituri.  Gjatë fjalës së tij në mbledhjen e Këshillit Kombëtar për mbrojtjen e të drejtave të fëmijëve, Ministri i Mirëqenies Sociale theksoi se statusin e jetimit në Shqipëri e jep vetëm shteti, duke paralajmëruar të gjitha shoqatat që shkelin ligjin se do të përballen me pasojat.

“BBC” raporton për një studim të botuar në revistën “Science” sipas të cilit, nga një ekip i universitetit të Oksfordit dhe atij të Luvenit në Belgjikë, është zbuluar origjina e HIV/AIDS. Duke përdorur kampione të vjetra të kodit gjenetik të virusit, studiuesit kanë mbërritur në origjinën e pandemisë, që është Kinshasa, kryeqyteti i Republikës Demokratike të Kongos në vitin 1920. Tregtia e seksit, rritja e popullsisë dhe mungesa e sterilizimit në klinikat shëndetësore përhapën virusin.

Sezoni i çmimeve “Nobel” filloi me emrat e amerikanit, Edward Snowden, të Papa Françeskut dhe pakistanezes, Malala Yousafzai me përparësi për çmimin e Paqes. Për Paqen, çmimi do të jepet më 10 tetor, kandidaturat në numër rekord, 278, janë pranuar. Nëse lista e plotë është sekrete, disa emra janë zbuluar nga ata që janë propozuar, si ai i Snowden, ish-këshilltar i Agjencisë të Sigurisë Kombëtare amerikane (NSA), që zbuloi përmasën e mbikëqyrjes elektronike të ndërmarrë nga SHBA-ja.

Është thelluar kriza institucionale në Koaovë. Të paktën ky është vlerësimi i njohës të çështjeve politike në vend. Gazeta “Tribuna” shkruan se “Pafuqia e presidentes Atifete Jahjaga për t’i bindur liderët e partive politike në vend që ta arrijnë një marrëveshje dhe shtyrja e vazhdimit të seancës konstituive të Kuvendit, kanë ndikuar në thellimin e krizës institucionale në vend. Kjo krizë mund të vazhdojë edhe për një kohë, nëse bashkësia ndërkombëtare vazhdon të mos ndërhyjë”.

Para disa ditësh qeveria shqiptare mori vendim për moslejimin e importimit të miellit me nivel proteine nën 12.5%. Dhe duket se ky vendim ka nisur të zbatohet. Vend i prekur në këtë rast është Kosova dhe siç raporton “Koha Ditore” kjo gjë kuptohet në doganën e Morinës. “Në datat 1 dhe 2 tetor ka hyrë në Shqipërivetëm një kamion me miell nga Kosova nga 7-8 kamionë në ditë që hynin para se të hynte në fuqi urdhri i Ministrisë së Bujqësisë”, deklaroi për “KD” një agjent doganor. Ishte ministri i Bujqësisë, Edmond Panariti, ai që paralajmëroi ndryshimin.

“Kush do të jetë shkrimtar ose shkrimtar fitues i çmimit Nobel për Letërsi 2014?” Kështu e nis shkrimin e saj revista italiane “Panorama”. Çmimi do të jepet në gjysmën e parë të tetorit, në një datë që Akademia Suedeze e mban ende të fshehtë.  Në klasifikimin e fituesve të mundshëm të Nobel 2014 për letërsinë, sipas parashikimeve të bëra nga kjo revistë, i pari i klasifikuar si më më i mundshmi për çmimin e madh është autor kenian Ngugi Wa Thiong’o. Në vendin e dytë është japonezi Murakami Haruki. Në vendin e tretë është Ismail Kadare.

Ushtria turke do të luftojë kundër forcave terroriste. “Zëri i Amerikës” bën të ditur se Parlamenti i Turqisë votoi që ta lejojë ushtrinë t'i bashkohet operacioneve kundër atyre që i cilësoi "forca terroriste" në Siri dhe në Irak.  Siç njofton nga Stambolli, korrespondenti i “Zërit të Amerikës Dorian Jones, “ votimi i hap rrugën Turqisë që t'i bashkohet koalicionit ndërkombëtar që lufton kundër Shtetit Islamik”. Rezoluta për operacionet ushtarake në Irak dhe në Siri u miratua me shumicë dërrmuese votash: 298 pro dhe 98 kundër.

Autoritetet maqedonase kanë përmbyllur punën hetimore për vdekjen e ish-presidentit të vendit Boris Trajkovski. Televizioni “Alfa” ka kontakuar me kreun e komisioni të posaçëm për këtë çështje, Umar Kulik, një ekspert i aviacionit, i cili ka bërë të ditur se raporti përfundimtar është përpiluar. Ai ka deklaruar se drafti i është dërguar agjencisë që ka hetuar aksidentin, draft që duhet të plotësohet edhe me detaje teknike për t’ia dërguar mandej institucioneve përgjegjëse.

Ministri i Ekonomisë Arben Ahmetaj, ka deklaruar në një intervistë për “Vizion Plus” se me buxhetin 2015 do të ketë ulje taksash. Dhe kjo sipas ministrit nuk është kërkesë e FMN-së, por vullnet i qeverisë. Ahmeti ka sqaruar edhe arsyen e rritjes së akcizës së fuhanit dhe heqjen e të drejtës për rimbursimin e akcizës së naftës biodiesel. “E drejta e rimbursimit hiqet pasi tregtarët e karburanteve abuzonin duke sjellë naftë të pacilësishme dhe e deklaronin si bio”, tha ai. Sa për duhanin, këtu me gjasë bëhet fjalë për nevoja të buxhetit.