Arkiv-Lajme

Përleshjet me grushta mes deputetëve jashtë parlamentit të Kosovës janë komentuar në të gjitha gazetat e nga një numër opinionistësh të Prishtinës. Një editorial i së përditshmes Kosova Sot, pasi nënvizonte me tone disi shfajësuese e minimizuese, se “përleshje ndërmjet deputetëve ndodhin edhe në kuvende të tjera të botës demokratike”, kapej pas thelbit të çështjes: “Qytetarët nuk i kanë votuar deputetët që të zihen për çështje banale dhe të qërojnë hesapet ndërmjet tyre; nuk është koha për mburrje se kush kë e ka shtyrë, apo se kush kujt i ka dhënë më shumë grushte”.

Është folur për një komision ndërakademik, që po diskuton mbi çështje të gjuhës shqipe e mbi ndryshime tw mundshme në të, por shumëkujt i ka rënë në sy se nuk është hedhur dritë aq sa duhet mbi të. Behar Gjoka, në një shkrim të tijin në Shekulli, nënvizon pikërisht këtë ide: “nuk kuptohet shkaku pse e kryejnë këtë veprimtari në fshehtësi e në takime absurde ilegalësh, teksa përfaqësojnë institucione legale”. Gjoka nuk është se është kundër diskutimit mbi ndryshimin e pasurimin e gjuhës letrare shqipe.

Vijon debati mbi Rexhep Qosjen, që nuk është ftuar në veprimtarinë akademike me rastin e 100 vjetorit të shpalljes së pavarësisë. Arben Puto është shprehur se nuk po e ftojnë me logjikën që “ka bërë kritika ndaj kryeministrit”, por të shumtët e atyre që duan ta thonë një fjalë në këtë mes i ikin këtij momenti. Kryetari i Akademisë, Gudar Beqiraj fillimisht tha se ftesat nuk janë bërë akoma, ndërsa për revistën Java thotë se “konferenca është e bërë nga historianët dhe ka në fokus historinë”, duke lënë të nënkuptohet se historia nuk është fusha e Qosjes.

Sandër Lleshi është gjenerali i propozuar nga Ismail Kadare për postin e Presidentit. Ky i fundit ua përcolli idenë e vet të gjitha palëve, por ish Edi Rama që e hodhi në tryezë. Ra në sy pas kësaj reagimi në të nxehtë i Astrit Patozit, i cili tha se “nuk mund ta kthejmë republikën tonë në një republikë ushtarake”.

Pas një ndeshje që do mbahet mend gjatë Spanja mposht Italinë 4 me 0 dhe kompleton atë që mediat spanjolle e kanë quajtur në këto orë entuziaste të edicioneve të mbrëmjes: "la Triple Corona" domethënë  tri kurora të njëpasnjëshme Europian-Botëror-Europian.

Dhe ky nuk është i vetmi rekord i "La Roja"-s këtë mbrëmje. Me golat e Silva, Alba, Torres dhe Mata, Spanja realizon edhe rezultatin më të thellë të arritur ndonjëherë në histori në ndonjë finale të Europianit. Përballë tyre, një Itali e lodhur dhe e pafat. (A.N.)

"Spagna parte troppo forte, 2-0 al 41/mo, ma Italia non perde il coraggio e reagisce". Kështu shkruan agjensia ANSA për pjesën e parë të finales së madhe të Kievit Itali-Spanjë, pjesa e parë e së cilës sapo është mbyllur me rezultatin 2 me 0.

Kurse e përditshmja më e madhe spanjolle El Pais shkruan në sajtin e saj me gërma kapitale të pazakonta: "Espana, 2 – 0 al descanso" (Spanja shkon 2 me 0 në pushimin e pjesës së parë). Në minutën e 14 ka shënuar David Silva dhe pak minuta para përfundimit ka ardhur edhe goli i Jordi Alba (në foto momenti i golit).

Valdete dhe Agron Aliaj jetuan bashkë 50 vjet, deri në 17 maj 2012 kur njëri ndërroi jetë. Një mbrëmje të marsit, ndërsa linte punën në Opera, Agron Aliaj u godit nga një makinë. Vdiq javë më vonë. Në një intervistë në shtypin e sotëm Valdete Aliaj (në foto me atë çka i ka mbetur nga i shoqi) ka ndërtuar kronikën e vdekjes së të shoqit, hap pas hapi, javë pas jave. Lexoni këto pjesë të intervistës. Do kuptoni që nëse të ze hall sëmundje në këtë vend je i vdekur nëse nuk të ndihmojnë ministrat, drejtorët, qeveria, biznesmenët…

Kryeredaktori i të përditshmes “Shqip”, Aleksandër Çipa, që nesër nuk do të jetë më në këtë funksion. Kjo, “për shkak të vendimit të menaxhmentit të gazetës”, - njofton shqiptarja.com. Lajmi u publikua në Facebook, ndonëse jo në faqen zyrtare të gazetarit të njohur por përmes një profili tjetër me emër “Akil Dhrami”.  Njoftimi i firmosur “Sandri” sqaron se Çipa, i cili është edhe në krye të Unionit të Gazetarëve, do të rikthehet “në statusin e gazetarit të lirë”. “Do të vijoj të botoj në këtë gazetë opinionet e mia në vazhdimësi”, thuhet në njoftimin në fjalë.

"I Urituri" (në foto) është vepra e parë e Odise Paskalit. E realizoi në 1924 kur ishte student në Torino dhe deri në 1939 u mbajt në Pallatin Mbretëror nga Zogu. Atë vit u mor nga Italia si plaçkë lufte dhe nuk është rikthyer më kurrë. E bija e Paskalit, Floriana u ka dërguar letra Ambasadës Italiane dhe Ministrisë së Punëve të Jashtme të Italisë për ta rikthyer veprën në Shqipëri. I kanë thënë që "nisma duhet të jetë shtetërore e zyrtare, jo individuale e private.". Pas kësaj ajo u ka bërë thirrje institucioneve përkatëse këtu në Tiranë.

"Porosia ose për vrojtimin e vrojtuesit të vrojtuesve" është një novelë me 24 fjali e Fridrih Dyrenmat, dramaturg dhe prozator helvet në gjuhën gjermane, disa herë kandidat për Nobël. Në këtë novelë, Dyrenmati (1921-1990) ka një personazh (Tinën) nëpërmjet fatit të së cilës gjen mënyrën të flasë mbi maninë e vrojtimit dhe të qenit i vrojtuar. Dyrenmati të vjen menjëherë në mend, kur lexon një listë shërbimesh informative paralele të fuqizuar në heshtje me ligje gjatë dy viteve të fundit.