Arkiv-Lajme

Skerdilajd Zaimi / Leonard Mitro

Agjencia e lajmeve “INA” thotë se sipas të dhënat e fundit të publikuara ditë më parë në faqen zyrtare të internetit të Entit Shtetëror për Statistikë, 50% e filloristëve në Maqedoni janë shqiptarë.  “INA” shkruan se Maqedonisë nuk i ka mjaftuar as çerek shekulli nga pavarësimi prej ish-Federatës Jugosllave dhe as 14 vite nga konflikti i armatosur që të heq dorë nga politikat e dyfishta në arsim, kryesisht me shkollimin e shqiptarëve. “Diskriminimi në shifra është për fat të keq edhe më tej evident - edhe atë bazuar në të dhënat zyrtare të vetë shtetit të Maqedonisë”, shkruan “INA”.

Vangjel Dule e quan “komunikim politik, por jo negociata” marrëdhënien me PS-në sa i takon zgjedhjeve vendore të 21 qershorit, ndërkohë akuzon PD-në e PS-në se po përdorin politikisht komisionet zonale Zgjedhore. Nga selia e PBDNJ-së, në  konferencë për median paraditen e sotme  Dule tha se këto dy parti po hyjnë në betejën elektorale me 225 militantë më të flaktë të tyre të cilët janë anëtarë të këtyre KZAZ-ve. “Dy partitë e mëdha me kompozimin e 90 KZAZ po hyjnë në betejën elektorale me 225 militantë më të flaktë të tyre në përbërje të këtyre komisioneve.

Basha i ka shprehur sot misionin paraprak faktmbledhës të ODIHR shqetësimin për rrethanat e krijuara, që sipas tij shkojnë kundër klimës dhe standarteve që kërkojnë zgjedhjet e lira e të ndershme. Kryetari i PD-së i kërkoi përfaqësuesve të ODIHR që të sjellin në Shqipëri për zgjedhjet e 21 qershorit misionin më të madh të mundshëm, duke parë premisat aspak të mira për zgjedhje të lira e të ndershme.

Deputeti i Partisë Socialiste për Përmetin, Vladimir Kosta në një intervistë për “Panorama” është shprehur se e kanë gënjyer për kandidaturën e Gilberto Jaçes për Bashkinë e Përmetit. “U kërkova që të mos kandidonin Gilberto Jaçen pasi ka abuzuar me fondet dhe e kam denoncuar në KLSH. Kryeministri më tha që nuk ishte Jaçe kandidati përfundimtar dhe do të vendosnin në 15 prill për këtë gjë. Por mesa duket pritën sa të binte zhurma e largimit tim dhe vendosën Jaçen. Jam shumë i zhgënjyer”, ka thënë Kosta.

“Monitor” shkruan se qeveria do të programojë për një periudhë afatgjatë limitet e fondeve publike për investimet publike. Ky detyrim që rrjedh nga marrëveshja me FMN dhe nga Strategjia e Re e Menaxhimit Financiar do të duhet të adaptohet qysh këtë vit. Sipas “Monitor”, burimet e tij nga Ministria e Financave pohuan limitet e angazhimeve shumëvjeçare për projektet e investimeve dhe marrëveshjeve të tjera afatgjata kontraktuale do të prezantohen në programin buxhetor afatmesëm 2016-2018.

Çdo mundësi që Hashim Thaçi ta vizitojë Beogradin do të ishte e mirëseardhur. Kështu konsideron gazetari dhe komentuesi veteran nga Beogradi, Boshko Jakshiç. Në një deklarim për “Kohën Ditore”, Jakshiç tha se “ndoshta gjatë kafes së përbashkët që e pinë para pak kohe në Prishtinë, Thaçi e Daçiqi kanë konstatuar se do të duhej të shiheshin më shpesh, qoftë edhe pa flamuj, ashtu që të mos u ik çmimi ‘Nobel’ për paqe”. Sipas këtij gazetari veteran serb, në Beograd thuhet se Thaçi do të vinte në kryeqytetin serb në një takim të një organizate joqeveritare.

“Panorama” shkruan se KQZ ka korrigjuar pa votim një vendim të miratuar në mbledhjen e datës 7 prill të vitit 2015. Në mbledhjen e 7 prillit, KQZ u njohu kryetarëve të bashkive, kryetarëve aktualë të komunave, si dhe anëtarëve të Këshillit Bashkiak të drejtën që të përjashtohen nga detyrimi për të mbledhur 3 mijë firma, në rast se dëshironin të kandidonin si të pavarur për bashkinë e zonës ku janë zgjedhur apo partitë jashtë koalicioneve. Ky vendim u kundërshtua nga Partia Demokratike, por amendamenti u miratua me katër vota pro dhe tre kundër të pakicës.

Në premierën e dokumentarit “Pritja” kushtuar vizitës së Papa Françeskut në Shqipëri, kryeministri Rama mbajti një fjalë të gjatë, të cilën ia kushtoi martirizimit dhe ringjalljes së kishës katolike pas goditjes që pësoi nga regjimi komunist. Rama tha se në prill të 1967 bashkësia katolike shqiptare mbulohej me qefinin e martirit, duke përjetuar një përvojë vdekjeje të paprecedentë. Sipas tij, përvoja e viteve të diktaturës bën që shqiptarët të kuptojnë edhe më mirë format e terrorizmit që sot kërcënojnë popullsitë e krishtera.

Enkelejd Alibeaj, ish-ministër i Drejtësisë në qeverinë "Berisha" në vitet  2007-2009 dhe deputet i legjislaturës 2009-2013 është kandidati i opozitës për bashkinë e Fierit. Partia Demokratike ka preferuar të mos djegë asnjë nga figurat e reja në një bashki që konsiderohet e humbur. Emri i Alibeajt  është zyrtarizuar mbrëmjen e së mërkurës, duke iu shtuar kështu listës së kandidatëve që kanë marrë miratimin e kryesisë. Alibeaj u afrua në Partinë Demokratike si pjesë e KOP-it (Komiteti i Orientimit të Politikave).