Arkiv-Lajme

Megjithëse kryebashkiaku i Vlorës Shpëtim Gjika ishte i pranishëm në seancën gjyqësore të rradhës, gjyqi ndaj tij dhe shtatë të pandehurve të tjerë me akuzat për abuzim me lejet e ndërtimit është shtyrë. Arsyeja ishte mungesa e prokure përfaqësimi të rregullt nga e pandehura Eleni Dardha për avokatin e saj. Seanca gjyqësore e radhës do të mbahet më tre mars. Pasi doli nga salla e gjyqit, kryebashkiaku i Vlorës deklaroi përpara mediave se është i interesuar që gjykimi i çështjes të fillojë. “Jam treguar korrekt në të gjitha seancat tona.

Gazeta Dita ka botuar një shkrim të deputetit të parlamentit të Kosovës Ramiz Lladrovci, i cili trajton çështjen e luftëtarëve islamikë të Sirisë nga Kosova e Bosnja. Duke nënvizuar ashpërsimin e masave ligjore ndaj kësaj dukurie, autori gjithsesi pohon se “asgjë nuk ka ndryshuar; lëvizja islame, me tipare të forta tashmë vehabiste selafiste në Kosovë, sa vjen e bëhet më e pranishme, tonet e liderëve të saj, të njohur e të panjohur, po bëhen më të ashpra, prania e tyre në jetën e njerëzve është më e zëshme, dhe ndërkohë, ata po marrin primarin në disa nga eventet e jetës sonë”.

Presidenti i Republikës Bujar Nishani, ka dhënë një intervistë për Panoramën në numrin e sotëm të së përditshmes. Nishani ka folur për përplasjen me mazhorancën mbi çështjen e “shkarkim-anullimit” në Kuvend të mandatit të Zana Xhukës, ish kreut të ILDKP-së; për dy emrat e ambasadorëve të rrëzuar nga Kuvendi, Ardian Ndreca dhe Ermir Gjinishi, si dhe për marrëdhëniet mes pakicës dhe shumicës në Kuvend. Presidenti deklaron se mazhoranca shkeli kushtetutën me anullimin e mandatit të Xhukës, dhe për këtë ndërhyrje në kompetencat e kreut të shtetit ai do t’i drejtohet Gjykatës Kushtetuese.

Ndaj ish presidentit ukrainas Viktor Janukoviç është lëshuar një mandat arresti. Lajmi bëhet i ditur nga Interfax, sipas të cilës urdhrin e ka firmosur Ministri i Brendshëm interim i Ukrainës, Arsen Avakov. Janukoviç u pa për herë të fundit të dielën e 23 shkurtit, duke u larguar nga rezidenca e tij në Krime, në jug të Ukrainës duke iu drejtuar aeroportit Belbek. Ish-presidenti Janukoviç është kritikuar ashpër dhe nga partia e tij. Lideri parlamentar i Partisë së Rajoneve, Oleksandr Yefremov fajësoi dje ish presidentin se kishte vjedhur dhe mashtruar kombin.

Ka nisur sot në orën 7 të mëngjesit, bllokimi 11 orësh i tunelit të Elbasanit, pasi kjo pjesë e aksit të ri rrugor do t’i nënshtrohet rikonstruksionit. Policia rrugore njofton se asnjë automjet nuk do të qarkullojë në aksin e ri rrugor Elbasan-Tiranë për 11 orë, për shkak të punimeve që do të kryhen. Pjesa e tunelit do të marrë një shtresë asfalti.

Papa Francesco, që erdhi në detyrë pas dorëheqjes së papritur të Benediktit,  është padyshim një prej Papëve më karizmatikë që ka njohur Kisha Katolike. I buzëqeshur gjithnjë, i thjeshtë dhe përdorues aktiv i rrjeteve sociale; cilësi që e kanë kthyer atë në një personazh të dashur tek besimtarët e rritur. Por mesa duket, ai tashmë ka shkuar përtej, duke u kthyer në një personazh të dashur edhe për fëmijët. Këta të fundit, përgjithësisht imitojnë “superheronjtë” e televizionit dhe jo personazhe reale.

Për 16 ditë me rradhë dhe me pjesëmarrjen e 2900 sportistëve në 15 disiplina të ndryshme, u zhvilluan në Soçi të Rusisë Lojërat Olimpike Dimërore më të kushtueshme dhe më me polemika. Një ceremoni madhështore i mbylli sot këto lojra, me Rusinë fituese, si në numrin e përgjithshëm të medaljeve (33) ashtu edhe të medaljeve të arta, 13 syresh. Në vendin e dytë të renditjes doli Norvegjia me 26 medalje, nga të cilat 11 të arta, ndërsa e treta ishte Kanadaja me 25 medalje, 10 të arta. SHBA nuk shkoi më shumë se vendi i 4, me 28 medalje, 9 prej tyre të arta.

Arrestimi i djeshëm në Gjirokastër i një punonjësi policie, Ardian Serezi, me 1 ton drogë, ka nxjerrë në konferencë për shtyp ish ministrin e Brendshëm, deputetin e PD-së Flamur Noka, që deklaroi se i arrestuari është i afërt me ministrin e Brendshëm, Saimir Tahiri. “I ndaluari i djeshëm, banor i Kombinatit njihet për raportet e ngushta që ka me Tahirin, veçanërisht në fushatën e fundit elektorale, ku shërbente edhe si shoqërues i Ministrit të Brendshëm”, theksoi Noka, duke shtuar se droga e sekuestruar tregon qartë që linjat e trafikut të drogës të lidhura direkt me ministrin janë vendosur

Qerim Lita, shkruan në numrin e fundit të revistës “Shenja” për analizën, konkluzionet dhe mbikëqyrjen e shqiptarëve në Jugosllavi në vitin 1981 nga autoritetet jugosllave(http://shenja.mk/revista/34/). Vit ky, kur protestat në Kosovë çuan në ndërkombëtarizimin e problemit, të cilin komunistët jugosllavë e shohin si “veprimtari armiqësore kundërrevolucionare të nacionalistëve dhe irredentistëve shqiptarë”.

Protesta e pak ditëve më parë e opozitës cilësohet nga Edmond Tupja si një zhvillim pozitiv për vendin, që dëshmon një “edukim” dhe demokratizim që mund të ndikojë në shtimin e shanseve për integrimin e vendit në Bashkimin Europian. Ndërsa analizon protestën paqësore të 20 shkurtit të opozitës demokratike, Tupe e krahason atë me protestën e 21 janarit të 2011-s të opozitës socialiste, ku pas përleshjeve me policinë dhe gardën, pasojat ishin 4 viktima e dhjetëra të plagosur.