Arkiv-Lajme

Prodhohen për herë të parë pasaporta biometrike për azilantët në Shqipëri. Nga 148 shtete palë të Konventës së Gjenevës në lidhje me statusin e refugjatit, Shqipëria renditet në listën e vetëm 32 shteteve që e ofrojnë këtë të drejtë, tashmë konkrete.Ministria e Brendshme ka prodhuar pasaporta biometrike për persona që kanë përfituar statusin e refugjatit dhe azilantit. Në bashkëpunim me Qendrën e Personalizimit, u prodhuan dokumente me standarde të larta sigurie.

Prezenca e OSBE-së në Shqipëri, me financim nga qeveria gjermane, ka nisur një projekt për nxitjen e një diskutimi të gjerë publik rreth të shkuarës komuniste në Shqipëri. Veprimtaritë e projektit do të nisin me një sondazh në shkallë vendi për të matur njohuritë e publikut, perceptimet dhe pritshmëritë e tij për diskutimet rreth të shkuarës komuniste në Shqipëri.

Strukturat paralele serbe të sigurisë në veri të Kosovës nuk e kanë ndërmend të shpërbëhen, raporton  “Koha.net”. Sot, një grup i tillë prej disa personave është parë në veri të vendit duke e penguar që të kthehet në shtëpinë e tij një qytetar të Kosovës.  Alush Alushi është pronari i një shtëpie në veri të Mitrovicës, i cili me urdhëresë të gjykatës ka fituar të drejtën të kthehet në shtëpi të tij. Burime të “KosovaPress”-it bëjnë me dije se shtëpia e Alushit është e uzurpuar nga Danillo Illiq, qytetarë serb i cili njihet për krim të organizuar dhe kontrabandim.

Një kërcënim me bombë u bë sot në kongresin e FIFA-s në Zyrih, njoftoi një zëdhënës i policisë së Zyrihut. Asnjë koment nuk u bë më tepër edhe pse një anëtar i zyrës së shtypit të medias të FIFA-s tha se salla ”Hallenstadion” dhe salla e konferencave për shtyp u evakuan për hetime. Ai shtoi se kongresi do të rifillojë sipas axhendës. Presidenti i FIFA-s, Joseph Blatter kërkon sot një mandat të pestë.

Pasi Kuvendi rrëzoi kërkesën e PD­së për dërgimin në Gjykatën Kushtetuese të çështjes për konstatimin e papajtueshmërisë me detyrën e deputetit socialist Koço Kokëdhima, sot Partia Demokratike i është drejtuar vetë kësaj gjykate.

Avokati mbrojtës i Sekretarit të Përgjithshëm të Partisë Demokratike, Arben Ristanit kërkoi sot nga Gjykata e Lartë pushimin e çështjes ndaj klientit të tij, pasi deklarata e Deputetit të PD-së ishte në emër të forcës politike që përfaqëson dhe jo qendrim i tij individual. Kërkesa e avokatit të Ristanit është bërë në Gjykatën e Lartë, gjatë seancës gjyqësore në ngarkim të ish-zv/Ministrit të Brendshëm, i cili është akuzuar nga Kryeministri i vendit për shpifje, lidhur me një deklaratë të Ristanit, që akuzonte Kryeministrin e vendit, Edi Rama për lidhje me krimin.

Departamenti Amerikan i Shtetit përshëndet kryeministri shqiptar Edi Rama dhe kryeministrin serb Aleksandër Vuçiç për riafirmimin e angazhimit të tyre për të forcuar bashkëpunimin mes dy shteteve me qëllim dhënien e kontributit për paqe, prosperitet dhe stabilitet në rajon. DASH e quan një vizitë historike atë të kryeministrit serb në Tiranë më 27 maj e cila vjen 6 muaj pas vizitës së kryeministrit Edi Rama në Beograd. “SHBA përshëndet kryeministrin serb Aleksandër Vuçiç dhe kryeministrin shqiptar në vizitën e parë zyrtare që kryeministri serb bëri në Tiranë më 27 maj.

“Monitor” shkruan se importet e makinerive dhe pjesëve të këmbimit, një tregues direkt i investimeve në ekonomi kanë shënuar një rritje të lartë prej 19% në 34 miliardë lekë, kryesisht si rrjedhojë e projekteve madhore në energjetikë. Importet janë rritur me vetëm 0.7% me bazë vjetore për katërmujorin (nga 0.9% që ishte rritja për janar-mars 2015), duke arritur në 161.9 miliardë lekë. Megjithatë makineritë pajisjet dhe pjesët e këmbimit, që janë një tregues i investimeve janë në rritje dyshifrore.

Sipas Agjensisë Telegrafike të Lajmeve, Serbia do t’i pranojë kërkesat amerikane për zvogëlimin e varësisë nga gazi rus dhe për t’iu bashkuar projektit për ndërtimin e gazsjellësit nga Azerbajxhani për në Evropë, që mbështetet nga Uashingtoni, deklaroi kryeministri serb, Aleksandar Vuçiç. “Në emër të sigurisë së saj energjetike, Serbia është e gatshme t’i diversifikojë burimet e gazit, çka është e rëndësishme edhe për miqtë tanë amerikanë”, deklaroi Vuçiç për agjencinë “Associated Press”, të cilës i referohet ATSH.

Gazeta “Exspress” raporton se deputetët e Kuvendit të Kosovës pritet të marrin vendimin pothuajse më të rëndin prej pasluftës pasi do të votojnë pro themelimit të Gjykatës Speciale, e cila do të merret me ndjekjen e ish-pjesëtarëve të UÇK-së. Deri më tash, koalicioni i ka të sigurta 84 vota të deputetëve me kusht që të gjithë ata që janë pro themelimit të jenë prezentë në seancën e sotme. Kështu, të gjithë 33 deputetët e LDK’së pritet t’i thonë “PO” Speciales. Ndërsa, të PDK’së do të jenë vetëm 32 pasi Nait Hasani, Fadil Demaku, Ganimete Musliu kanë paralajmëruar votë kundër.