Arkiv-Lajme

Gjykata e Krimeve të Rënda ka vendosur sot që gjyqi për të ashtuquajturën “banda e tritolit” të zhvillohet me dyer të mbyllura. Vendimi u mor pas kërkesës së prokurorit Adrian Nezha, sipas të cilit meqenëse prokuroria ka një tjetër çështje në hetim, atëherë mund të dalin të dhëna që përbëjnë sekret. Kërkesa është kundërshtuar nga avokatët, por edhe nga i pandehuri kryesor, Julian Sinanaj. Ky i fundit ka bashkëpunuar me drejtësinë, por duket se kjo e fundit po disiplinon procesin, gjatë të cilit me siguri që Sinanaj do të kishte nxjerrë emra që djegin.

Bilanci i tregëtisë së jashtme  për 11 muajt e parë të 2014-ës, publikuar sot nga INSTAT-i, tregon se importet janë rritur me pothuaj 400 milionë dollarë ($1=100Lekë), krahasuar me një vit më parë. Pothuaj gjysma e kësaj rritje është realizuar në grupet “Materiale ndërtimi dhe metale” dhe “Makineri, pajisje dhe pjesë këmbimi”, të cilat kryesisht kanë destinacion investimet. Pjesa tjetër e rritjes së importeve është realizuar në mallrat e destinuara për konsum, ku spikat grupi “Tekstile dhe këpucë” me një rritje rreth 90 milionë dollarë.

E.Zaloshnja

Si mbytje e qëllimshme e ka klasifikuar Prokuroria e Barit dhe ajo e Brindizit, zjarrin e rënë në tragetin italian “Norman Atlantic”. Megjithatë, prokurori i çështjes, Xhuzepe Volpe, ka saktësuar pas largimit nga kapiteneria e Barit se hetimi është vetëm në hapat e parë dhe gjërat mund të ndryshojnë. Në Brindizi, ndërkaq, përveç se për mbytje të qëllimshme, është hapur dosje edhe për vrasje të qëllimshme, pasi një prej viktimave të deritanishme, shtetasi grek, ka mbërritur një ditë më parë në këtë qytet.

Fillimisht u fol vetëm për 1 vitkimë nga tragjedia në anijen Norman Atlantik, një shtetas grek nga Zyrihu që kishte kaluar disa ditë pushimi në Greqi dhe që po kthehej në Zvicër përmes Italisë. Por bilanci është thelluar gjatë paradites, kur në det të hapur janë gjetur edhe trupat e 4 pasagjerëve, identiteti i të cilëve nuk dihet ende. Lajmi u bë publik nga televizioni publik italian "Rai" dhe u konfirmua më vonë edhe nga kryeministri Renzi.

Greqia do të shkojë në zgjedhje të parakohshme pas dështimit edhe të raundit të tretë të votimit për presidentin e vendit. Kandidati i propozuar nga koalicioni qeverisës, Stavros Dimas ka marrë 168 vota edhe në raundin e fundit, nga 180 që nevojiteshin për zgjedhjen e tij në krye të vendit.

Me ndarjen e re territoriale, në shkallë vendi do të ketë 1785 këshilltarë të bashkive, njofton Shqip. Në bazë të përllogaritjeve të kryera nga të dhënat e ofruara nga ministria përkatëse, mbi numrin e popullsisë të 61 bashkive të reja dhe të ligjit që përcakton kriteret për numrin e “parlamenteve” lokale, rezulton se numri i anëtarëve nuk do t’i kalojë 1800 vetë. Tirana, me një popullsi prej 757 361 banorësh, do të ketë sipas përcaktimit të qeverisë 65 anëtarë të këshillit. Ky do të jetë dhe numri maksimal që do të ketë kryeqyteti shqiptar dhe i vetmi në shkallë republike.

Garancia për vendimet dhe politikat që ndërmerr kryeministri Rama janë këshilltarët e huaj që asistojnë qeverinë shqiptare. Ky fakt ka krijuar qetësinë e nevojshme edhe për bashkëshorten e kryeministrit, Linda Rama, siç ajo është shprehur në një intervistë për emisionin “ E Diell” ne Top Channel.

“Unë do isha shumë e shqetësuar nëse Edi nuk do kishte pranë tij këshilltarë me famë botërore. Do isha shumë e shqetësuar nëse nuk do kishte këshilltarë me famë botërore si Rikardo Haussman apo grupi i Tony Blair që asiston qeveri të ndryshme që kanë nevojë”

Vetëvrasja e Qamil Zelës, 52-vjeçarit nga Lushnja, i arrestuar për vjedhje të energjisë elektrike ishte e paralajmëruar. Edhe dy herë të tjera ai kishte tentuar t’I jepte fund jetës siç pohon për gazetën “Panorama” djali i tij Besmir Zela.

Informacioni i fundit nga trageti Norman Atlantic flet për shpëtimin e 329 personave. Një operacion i madh i kryesuar nga italianët dhe pasuar nga grekë e shqiptarë është duke u zhvilluar edhe sot në ujrat e Adriatikut. Anija është tërhequr pranë ujrave italiane dhe pasagjerët që po shpëtohen dhe po zbriten në portet italiane. Mes pasagjerëve që presin ende të shpëtojnë janë dhe 14 shqiptarë, ndërkohë që 8 prej tyre i janë larguar ujit dhe kanë prekur tokën.

“La Stampa” publikon një dokument që dëshmon se trageti “Norman-Atlantic” ka rezultuar me mangësi në çështjet e sigurisë gjatë një inspektimi të bërë në portin e Patrës më 19 dhjetor të këtij viti. Sipas këtij dokumenti problem shfaqeshin në koordinimin e operacione e të kërkim-shpëtimit, në ndriçimin për emergjencat dhe në mbylljen e portave për ndalimin e përhapjes së zjarrit. Këto mangësi pranohen edhe nga pronari i mjetit, Carlo Visentini, por që ka shtuar se ato janë zgjidhur si probleme.