Arkiv-Lajme

Rrjeti i intrigave jashtëmartesore që çoi në dorëheqjen e drejtorit të CIA-s, David Petraeus, sa vjen e bëhet më kompleks orë pas ore këtë fundjavë.

Jo vetëm që u zbulua lidhja sekrete e 60-vjeçarit gjeneral me katër yje me Paula Broadwell, 40-vjeçaren që kishte shkruar një biografi të njeriut të admiruar, por mekanizmi për zbulimin e aferës doli të jetë Agjensia rivale e CIA-s, FBI-ja.

Deklarata e Kryeministrit që nuk i pëlqen fakti sesi trajtohet kronika e zezë në media, ka zënë hapësirë tek Shqiptarja.com e ditës së sotme e cila ka marrë opinionet e disa kryeredaktorëve/drejtorëve të shtypit.

Në një reportazh nga Burgu i Shën Kollit, Ben Andoni sjell tek numri i fundit i revistës ‘Java’ raportin e të burgosurve me Amnistinë e pritshme të datës 29 nëntor. Një Amnisti që është vetëm për hajdutët dhe ish-zyrtarët,siç thonë me mllef të burgosurit. Kjo Amnisti mban “erë” duke parë se është ndërtuar e tillë që të shpëtojnë me këtë ligj njerëzit e Gërdecit dhe të tjerë syresh si ata...

Shteti, përshkruan Andoni, humbet nga moszbatimi i nxjerrjes me kusht për sjellje të mirë dhe nga mbajtja e tyre në burg. Mosrespektimi i kushtit, mesa duket kërkon ta “ngjyesh” me gjykatësit.

Asllan Patrioti ka dalë dje para mediave duke bërë një deklaratë ekstreme. “Kam deklaruar se do të ndjek shembullin e Lirak Bejkos. Arrestimi më është bërë me anë të politikës dhe jo se kam bërë ndonjë krim dhe nëse unë kam bërë një krim, një arrestim i tillë jashtë cdo lloj norme njerëzore nuk duhej bërë”, tha Patrioti për News24. 

Pas tetëmbëdhjetë muajsh fushate e transmetimesh pafund onair, elektorati amerikan ka folur. Zgjedhjet në SHBA përfundimisht do të jenë ngjarja më e madhe e vitit 2012 në aspektin e mbulimit të lajmeve, vëren Al Jazeera.

Ministri i Transportit i Serbisë Milutin Mrkonjiq thotë se Serbia planifikon ndërtimin e një autostrade nga Negotini përmes Zajeçarit, Nishit, Prishtinës dhe Pejës, deri në kufi me Shqipërinë, njofton Zëri ën Prishtinë. Deri tani asgjë të keqe.

Pas protestës së një grupi LGBT, çështja është marrë e përcjellë dhe nga institucioni i Avokatit të Popullit. Në një prononcim për mediat zëdhënësja e këtij institucioni ka tërhequr vëmendjen ndaj teksteve shkollore, kryesisht në fakultetin e drejtësisë, pasi sipas saj përmbajnë terminologji jo shkencore dhe diskriminuese ndaj këtij komuniteti. Vetë aktivistë të kësaj lëvizjeje kishin reklamuar se në botimin e Mjekësisë Ligjore është përdorur fraza “homoseksualiteti është perversion seksual”, siç raporton Shqip.

Mediat janë hedhur në kërkim të autorit që ka bërë foton më sipër. Kjo është fotoja më popullore e të gjitha kohërave në rrjetet sociale, e përcjellë në twitter natën e 6-7 nëntorit kur Barak Obama njoftoi rizgjedhjen e tij për presidencën e Shteteve të Bashkuara. Janë marrë dhe foto të tjera të këtij momenti, por asnjëra nuk ka kapur emocionin e kësaj fotoje.

Fotoja, deri më 7 nëntor pasdite, ka qenë “retweeted” gati 711.000 herë në Twitter, ka marrë më shumë se 3.5 milion "like" në FB.

Arben Puto ka promovuar dje në Vlorë librin e tij “Pavarësia shqiptare dhe diplomacia e Fuqive të Mëdha” (Toena) dhe në intervistën e dhënë për Gazetën Shqiptare të ditës së sotme thotë se “mirë bëri” ai historiani që zbuloi dokuemtin e reklamuar si shpallje Pavarësie në Durrës. Por, thotë profesor Puto për gazetaren Fatmira Nikolli, “sjellja e këtij historiani nuk është për t’u përgëzuar. Sepse... ai e dërgoi te Kryeministri në vend që ta sillte te historianët e tjerë për të parë se ç’kuptim ka, ç’domethënie ka e ç’sillte të re ajo letër. Ai ia çoi kryeministrit.

"Unë jam i vetmi shqiptar i grabitur nga italianët" është titulli i intervistës që ish-balerini shqiptar i programit "Amici" Klajdi Selimi pati lëshuar për të përjavshmen "Visto" një javë më parë, ku ai tregoi historinë se si e kishte grabitur ish-e dashura italiane. Ky titull u protestua pranë gazetës nga shumë lexues si "i padrejtë dhe diskriminues", aq sa e detyroi drejtorin Franco Bonera, të dilte e të kërkonte falje, siç raporton albanianews.it.