Arkiv-Lajme

Deri para zgjedhjeve dukej në pozita mbrojtëse, i goditur nga disa skandale njëherësh. Por kryeministri turk ka kaluar në kundërsulm. Turqia pritet të nisë procedurat për ekstradimin e klerikut turk me banim në SHBA, Fethullah Gulen, ka bërë të ditur kryeministri Recep Tayyip Erdogan. Gulen, një ish-aleat i kryeministrit turk, akuzohet nga Erdogan se ka përdorur mbështetësit e tij në përpjekje për të rrëzuar atë nga pushteti. Kleriku mohon të ketë nxitur ndonjë fushatë kundër tij.

Përfshirja e ligjit për Nëpunësin Civil të rregulluar nga mazhoranca në kalendarin 3 javor të punimeve të Parlamentit, ka shkaktuar reagimin e opozitës. Kreu i grupit demokrat, Edi Paloka pas Konferencës së kryetarëve, deklaroi se po kërkohet të hidhet poshtë ligji i miratuar një vit më parë me konsensus, por edhe vendimi i Gjykatës Kushtetuese. Paloka tha po ashtu se në Konferencë u paraqit edhe amendamenti i opozitës sa i takon amnistisë për krimet zgjedhore, por që ndonëse konferenca e kaloi për seancë, sipas Palokës mazhoranca paralajmëroi se do ta rrëzoi.

FMN publikon “Raportin Ekonomik Rajonal” për Europën Qëndrore, Lindore e Juglindore. Fondi Monetar mbetet tek parashikimi për rritjen ekonomike të Shqipërisë këtë vit me 2.1 %, ndërsa pret një përmirësim të konsumit dhe kërkesës së brendshme. Raporti theksohen se borxhi i jashtëm i Shqipërisë do të rritet. Për këtë vit ky tregues është parashikuar në 41.4% të Prodhimit të Përgjithshëm Bruto dhe vitin e ardhshem në 43.2%. FMN vlerëson se rritja po përshpejtohet në pjesën më të madhe të vendeve të Europës Qendrore, Lindore e Juglindore, në valën e rimëkëmbjes së zonës euro.

Sipas Policisë së Tiranës familja e kryekomunarit të Farkës, Fatbardh Plaku është marrë në mbrojtje mbrëmjen e djeshme disa orë pas sulmit me armë ndaj automjetit në të cilin udhëtonin dy djemtë e kreut të komunës. Për fat të mirë nga sulmi nuk mbeti asnjë person i lënduar.

Moska zyrtare ka shprehur shqetësimin e saj lidhur me rritjen “e papreçedentë” të aktivitetit ushtarak mes Shteteve të Bashkuara dhe NATO-s pranë kufirit me Rusinë, në një kohë kur kriza ukrainase po përshkallëzohet. Ministri rus i Mbrojtjes, Sergei Shoigu (foto) ia shprehu shqetësimin homologut amerikan Chuck Hagel, në një bisedë telefonike. Zyrtarët e Pentagonit deklaruan se Shoigu përsëriti zotimin se Rusia nuk do ta pushtojë Ukrainën. Shtetet e Bashkuara njoftojnë se kanë vendosur trupa shtesë në Europën lindore për të garantuar aleatët e NATO-s.

Pensioni do të varet nga kontributet gjatë punës, ndaj kushdo ka interes të kontribuojë realisht në bazë të pagës. Qeveria ka prezantuar sot skemën e reformës së re të pensioneve, e cila nis aplikimin në janar të vitit 2015. Kryeministri Rama tha se në thelb të kësaj reforme qëndron pensioni dinjitoz, që do të varet nga kontributet. Kreu i qeverisë tha se heqja e tavanit të pensionit do të motivojë çdo individ të deklarojë pagën reale për efekt të pensionit që do të marrë nesër.

Sopranoja me famë botërore Inva Mula është pranuar ditët e fundit anëtare e Akademisë Botërore të Artit dhe Shkencës, (World Academy of Art and Science). Në një postim në rrjetin social Facebook, sopranoja falenderon të gjithë miqtë dhe adhuruesit për mbështetjen e artit të saj. “Pranimi im si anëtare e Akademisë Botërore të Artit dhe Shkencës është një ngjarje jo vetëm për mua, pasi unë e ndaj këtë me të gjithë ju së bashku”, shkruan sopranoja Inva Mula.

Në fillim ishte një letër e gjatë me shkrim dore, e zbuluar në arkiv nga gazetarja Admirina Peçi. Rezultoi se letra, e shkruar në vitin 1967, i dërgohej diktatorit Hoxha nga autorja e shumë këngëve partizane, Dhora Leka, të cilit i kërkohej ndihmë për gjendjen e mjeruar ku ndodhej. Leka ishte dënuar si armike dhe qe internuar, ndaj i kujton shefit komunist shërbimet e sakrificat që kishte bërë për shtetin, duke qenë madje bashkëpunëtore e Sigurimit në një kurth të ngritur ndaj shkrimtarit Ismail Kadare, që kishte dështuar dhe i qe kthyer në bumerang.

Ditë më parë janë raportuar disa ngjarje rresht, në qytete të ndryshme, ku shoferë agresivë kanë ngritur dorë kundër policëve rrugorë. Por dje ka ndodhur e kundërta. Inspektori i policisë në gjendje të dehur rreh në mes të rrugës me shkop bejsbolli shoferin e betonieres. Oficeri i policisë, Xhevdet Dedja, ka dhunuar drejtuesin e mjetit, i cili më pas ka bërë denoncim në polici.

Thyhet “bllokada amerikane” për politikanin radikal të Prishtinës. Mediat e Prishtinës njoftojnë se lideri i Lëvizjes "Vetëvendosje", Albin Kurti, dhe kryetari i komunës së Prishtinës, Shpend Ahmeti, janë ftuar për një diskutim në Shtetet e Bashkuara të Amerikës. Instituti amerikan për nxitjen e Demokracisë do të mbajë një diskutim mbi të ardhmen e shtetit të Kosovës dhe integrimin e saj në Bashkimin Europian. Dy udhëheqësit e lëvizjes "Vetëvendosje" do të prezantohen në konferencën që mbahet në fund të këtij muaji në Uashington.

a.k