Arkiv-Lajme

ISIS, organizata islamike që sot kërcënon ekzistencën e Irakut mund të kalojë kufirin dhe të vërë në jetë të njëjtin skenar edhe në Jordani. Kështu shkruan sot DËELLE, e cila edhe dje i kishte kushtuar një shkrim të posaçëm Lindjes së Mesme, duke e vënë theksin tek artificialiteti dhe arbitrariteti i kufijve shtetërorë në këtë rajon. Lidhur me Jordaninë, destabilizimi do të ishte shumë kërcënues, pasi do t’i afrohej edhe Izraelit. DË citon një ekspert sigurie, Ramzy Mardini që flet për ekzistencën e celulave terroriste në Jordani dhe për përfshirjen e jordanezëve në akte terroriste.

Ambasadori i OSBE-së në Tiranë, Florian Rauning ka bërë thirrje sot që Parlamenti të zgjedhë sa më shpejt anëtarët e AMA-s dhe të RTSH-së. “Këto vende vakante duhet të plotësohen me persona të cilët karakterizohen nga integriteti, aftësia, dhe bashkëpunimi”, është shprehur ai. Apeli vjen në një kohë kur këto plotësime duhet të ishin bërë.  Për më  tepër që RTSH-ja ka qenë pjesë e prekur posaçërisht në programin e PS-së përpara se të vinte ne pushtet, e megjithatë ky institucion, ose më mirë drejtimi i tij, ka mbetur ende pa zgjidhje konkrete.

s.z

Ka vdekur në moshën 98 vjeçare aktori i njohur Eli Wallach. Wallach, me origjinë hebreje nga Polonia, kishte marrë në vitin 2010 një Oscar nderi për aftësinë e dëshmuar në realizimin e një game të gjerë rolesh. Wallach ka luajtur në filma si “Padrino”, “Valsi i toreadorëve”, apo edhe “Salamandra”. Për publikun e gjerë ai është skalitur mirë me rolin e Tucos në filmin e Sergio Leone “I miri, i keqi dhe i shëmtuari”.

Përfundimi i fazës kryesore policore në Lazarat e ka kaluar vëmendjen te drejtësia dhe plotësimi i dosjeve hetimore. Sot kreu i Policisë së Shtetit, Artan Didi, ka folur për këtë çështje, duke nënvizuar madje se edhe për vetë kryekomunarin, Dasho Aliko, prova më e madhe kundër tij është situata e Lazaratit, ku u gjet drogë dhe armë dhe ku u bë rezistencë e armatosur. “Për të vendosur për masën e sigurisë kompetenca kalon tek prokuroria e më pas ia kërkon gjykatës. Ne përderisa kemi bërë procedim penal kemi prova, personi në fjalë duhet të përgjigjet.

Akademia e Shkencave ka përkujtuar dje Revolucionin e Qershorit, një aktivitet që ishte paralajmëruar ditë më parë. Gazetat i kanë lënë vend pasqyrimit të aktivitetit, i cili është marrë me figurën e Fano Nolit. “Mapo” përcjell tri kumtetsa: atë të Nasho Jorgaqit, atë të Paskal Milos dhe atë të Pëllumb Xhufit. Duhet thënë se vlerësimet janë po ato, por Xhufi nuk i ka hequr asnjë presje krahasimit mes Nolit dhe Ahmed Zogut për të cilin është shprehur se përfaqësonte “krahun konservator, obskurantist dhe antikombëtar”.

Gazetat e përditshme të Tiranës kanë mbajtur të gjitha si aperturë të tyren çështjen e statusit të vendit kandidat, duke i mëshuar më shumë idesë se çfarë përfitohet nga ky “hap i ri më pranë Europës”. Një analizë më konkrete është dhënë nga gazeta “Mapo”, e cila  ka botuar sot një intervistë me shefen e misionit tonë në BE, Mimoza Halii. “Statusi nuk do të ndikojë në jetën e qytetarëve”, thotë Halimi, e cila e krahason vendimin me atë për liberalizmin e lëvizjes. E megjithatë për ambasadoren tonë ky vendim ka shumë rëndësi për Shqipërinë, sidomos në planin politik.

Ka tentuar të kontaktojë me një ministri edhe me Avokatin e Popullit, por askush nuk i është përgjigjur. Prandaj, një i dënuar shqiptar në burgun e Malandrinos telefonoi për të denoncuar në A1 Report dhunën fizike dhe psikologjike që ushtrohet nga gardianët grekë ndaj të burgosurve shqiptarë. I dënuari Krenar Kureta ka kontaktuar përmes telefonit me A1 Report duke bërë publike hyrjen në grevë të të burgosurve shqiptarë për trajtimet dhe kushtet çnjerëzore që ata hasin në burgun e Malandrinos, ndërkohë që shton se u është bërë presion nga ana e gardianëve për të dalë nga greva e urisë.

Ndërkohë që Lazarati “ende nuk ka mbaruar”, kryeministri Rama takoi sot në Pallatin e Brigadave, forcat e Policisë së Shtetit, në shenjë falënderimi për kontributin e secilit në operacionin në Lazarat kundër krimit dhe lëndëve narkotike. Kryeministri përshëndeti dhe takoi një nga një efektivët e policisë. I shoqëruar nga ministri i Brendshëm Saimir Tahiri, dhe ambasadori i Shteteve të Bashkuara të Amerikës, Aleksandër Arvizu, Rama mbajti fjalimin e tij  për të falënderuar dhe për t’i dhënë mirënjohjen forcave të Policisë së Shtetit.

Fuori!!! Italia duhet të bëjë një lojë të dobët ndeshjen e parë të çdo botërori, për të patur më shumë shanse më vonë. Ndryshe nuk ka si shpjegohet ndeshja e shkëlqyer me Anglinë, dhe dy humbjet e njëpasnjëshme me Kosta Rikën dhe Uruguajn, që e nxjerrin kombëtaren axurre jashtë kompeticionit Brazil 2014.  Është grupi i çudive, ku Anglia dhe Italia mbeten jashtë, por edhe tregues i dobësisë së kombëtareve europiane deri tani. Humbja 1-0 e djemve të Prandelit erdhi me një gol të Diego Godin në të 81-ën minutë, teksa Italia kishte mbetur me dhjetë lojtarë pas kartonit të kuq të Markizios.

Njeriu i njohur serb i krimit, Kristijan Goluboviç, i cili është shprehur më herët mbi kushtet e të burgosurve shqiptarë në Greqi, ka nxjerrë në shesh të gjithë veprimtarinë kriminale që organizon UDB-ja.

Ai ka folur për rekrutimin që iu bën kjo organizatë kriminelëve, me qëllim që ata t’u shërbejnë qëllimeve që ka UDB-ja, raporton Alsat-M. Në emisionin “Në Qendër” të gazetarit maqedonas Vasko Eftov, Goluboviç ka folur edhe për vrasjen e shqiptarit Enver Hadri. Sipas tij, Enveri mund të jetë vrarë nga dega e UDB-së në Mal të Zi.