Arkiv-Lajme

Ilir Meta ka qenë i ftuar në Opinionin e TV Klanit, dhe aty i është dashur t’i kthehet refrenit të çështjes së kryeministrit. Ai ka dhënë deklaratat e mëparshme që synojnë t’ia mbajnë profilin elektoral të lartë, dmth tha se “kjo punë do zgjidhet në respekt të kushtetutës e demokracisë”. Por ishte më i qartë kur tha se, përsa i takon aleancës me socialistët, ajo “do të jetë dhe paszgjedhore, pasi është afatgjatë e strategjike”.

“Dyzimi votës” e ka titulluar shkrimin e vet Ardian Vehbiu, të publikuar si gjithnjë në Peizazhe të Fjalës. Dhe në shkrim merret me tezën e “votës së bardhë” që është bërë objekt diskutimesh në agorën mediatike të Tiranës.

Adi Krasta është bërë tok me Lutfi Dervishin në një program elektoral në Vizion Plus, dhe sot kanë pasur të ftuar ambasadorin amerikan, Alexander Arvizu, i cili ka qenë më i shpenguar se herë të tjera në artikulimin e ndonjë opinioni. “Po shohim përpjekje të ndryshme që ndikojnë mënyrën se si votojnë njerëzit. Japin para ose ofrojnë perspektiva pune, ose kërcënime për humbjen e vendit të punës. Shohim raste kur njerëzit shkurajohen për të votuar” tha ai, duke marrë shkas nga lajmet e fundit, por ndoshta edhe nga informacione të siguruara në rrugë të tjera.

“Nuk jam hero; as tradhtar. Jam thjesht një amerikan”, thotë Edward Snowden nga Hong Kongu, për gazetën the South China Morning Post. Ai është bërë i gjallë për herë të parë qysh nga dita që u mor vesh se ishte pikërisht ai që kish nxjerrë informacionin mbi Programin e Përgjimit të kryer nga Agjencia Amerikane e Sigurisë Nacionale.

Nga monitorimi i shpenzimeve të partive politike gjatë fushatës elektorale 2013, i bërë nga organizata Mjaft dhe i mbështetur financiarisht nga Ambasada Holandeze në Tiranë dhe Zyra e Marrëdhënieve me Publikun e Ambasadës së ShBA-ve po në Tiranë, kanë dalë disa të dhëna interesante të bëra publike sot. Një përmbledhje e këtij raporti marrë nga një shkrim i Lindita Çelës të publikuar në Tema online është si më poshtë:

Në një shkrim në Gazetën Shqiptare, Dritan Hila merret me idenë e hedhur kohët e fundit nga deputetë të maxhorancës, sipas së cilës, subjekti që do përzgjidhet nga presidenti për të formuar qeverinë nuk do jetë koalicioni më i madh, por partia më e madhe. Pasi të përdorë të gjitha marifetet e mundshme para, gjatë dhe pas votimit, hamendëson Hila, kjo mund të jetë karta e fundit që mund të luajë Berisha, me shpresën se do të blejë disa deputetë të së majtës.

Luis Tanushi ka pregatitur një speciale sot te Shekulli për historinë profesionale të Arben Ristanit, e cila ka një kurbë interesante: avokat i Ilir Hoxhës, dënues i gazetarëve Martin Leka e Aleksandër Frangaj, arrestim e burgosje tek 313 nga Berisha për korrupsion, jurist i Presidencës (nën Moisiun), vendimtar në votimet e kontestuara 2009 dhe 2001, dhe së fundi kandidat i PD.

Edhe Mustafa Nano i kthehet temës së “kryqit mbi fletë” në një shkrim tek Shqip të titulluar “Aritmetika e çuditshme e dy të këqijave”. Teza e votës kundër palëve jo tezë, është hedhur për herë të parë nga Shinasi Rama, e më pas është marrë nga Fatos Lubonja, që sipas Nanos “do të bënte mirë, në respekt të “copy right”-it, t’i referohej “shpikësit të patentës””.

Ajo që ndodhi në Shqipëri me rrugën Durrës-Morinë, po ndodh në Kosovë me rrugën Morinë-Prishtinë. Shpenzimet reale të saj po i tejkalojnë ato të planifikuara. E po i tejkalojnë në një masë të konsiderueshme. Në xhepin e kujt shkojnë? De jure shkojnë në xhepat e kompanisë Bechtel&Enca, e cila është po ajo që ka punuar në Shqipëri.

Ja çfarë raporton Zëri i Prishtinës lidhur me këtë ngjarje:

“Përkulja dhe rënia e tiranisë shqiptare” është memuari 3-volumësh i Spartak Ngjelës (promovuar dje - në foto), dhe Armand Shkullaku në një shkrim te MAPO përpeqit të lexojë Ngjelën pas kujtimeve të tij. Libri sipas Shkullakut nuk është thjesht libër me kujtime, por “është një analizë e thellë politike, sociale dhe filozofike e shoqërisë shqiptare në momentet e saj më të rëndësishme historike.