Arkiv-Lajme

Kryetari i Partisë Republikane, Fatmir Mediu, ka akuzuar sot ministrin e Brendshëm, se po përpiqet të manipulojë provat e denoncimeve të deputetit Doshi dhe se po përpiqet që të implikojë edhe atë në këtë çështje. “Qeveria është përfshirë masivisht për të manipuluar faktet dhe emrat e përfshirë në këtë ngjarje. Qeveria, historinë që s'e zbardhi në një periudhë 6-mujore pretendon se e ka zgjidhur në dy ditë. Ministri i Brendshëm Saimir Tahiri u përpoq që këtë ngjarje ta lidhë me emrin tim, duke deklaruar se Fatjon Skënderi ka qenë shofer pranë Partisë Republikane.

Jam këtu për t’i dhënë fund, përmes një ekspozeje saktësisht të verifikueshme, spekullimeve të panumërta lidhur me pjesën e akuzës së deputetit Tom Doshi që përfshin mua si Ministër i Punëve të Brendshme dhe rolin e Policisë së Shtetit qysh prej ditës kur kam marrë dijeni nga vetë deputeti për pretendimin e tij.

“Askush nga personazhet e përfshira prej Doshit në këtë ngjarje, nuk ka organizuar vrasjen e tij...” – kështu është shprehur sot ministri i Brendshëm Saimir Tahiri. Të implikuar në versionet e dhëna prej Doshit ndaj ministrit, janë kunati i Sali Berishës, Agim Rama, ish-zv.drejtori i Policisë, Agron Kuliçi, ish-kreu i Prokurorisë së Krimeve të Rënda, Eugen Beci, kreu i kuvendit Ilir Meta, apo edhe ish-shoferi i Fatmir Mediut, Fatjon Skënderi.

Në orën 15: 00, pak minuta para se ministri i Brendshëm të dilte në konferencë për shtyp, deputeti Tom Doshi ka bërë këtë njoftim në profilin e tij në “Facebook”: “Kam kontaktuar sot me Prokurorine e Krimeve te Renda per ti dhene deshmine time ne lidhje me hetimet e nisura per tentative vrasje ndaj meje dhe nje kolegu tjeter deputet. Me kane caktuar, pas kerkeses time, qe neser paradite te paraqitem per te dorezuar provat e mia.

Ministri i Brendshëm Saimir Tahiri ka deklaruar se versioni i Doshit, i rrëfyer prej tij në një takim me të në datën 6 shtator, në projekt-vrasjen e tij implikoheshin personat: Fatjon Skënderi, ish-shofer i Fatmir Mediut, Agron Kuliçi, Eugen Beci, kryeprokuror i Krimeve të Rënda, me mbështeje të Adriatik Llallës si dhe kunati i Sali Berishës, Agim Rama. Tahiri tha se kishte referuar te kryeministri se ky skenar ishte i pabesueshëm dhe se e vetmja mënyrë për ta ndjekur këtë çështje ishte rruga institucionale.

Po qarkullon në minutat e fundit një lajm, që referon burime të prokurorisë, sipas të cilit i ndaluari Durim Bami, i dyshuar për vrasjen e deputetit Tom Doshi, ka deklaruar se çdo gjë u stis nga ky i fundit. Sipas këtij informacioni, ende jo zyrtar, Bami është shprehur se ai ka deklaruar në kamera që “mori udhër nga lart” për vrasjen e Doshit, me kërkesë të këtij të fundit.

Çështjes “Doshi” i ka kushtuar sot një shkrim në gazetën “Panorama” edhe Agron Gjekmarkaj. Në ndryshim nga komentet e deritanishme që e vendosin temën e trajtuar në kontekstin e kriminalizimit të politikës, Gjekmarkaj ndalet te një aspekt që për të thënë të vërtetën bëhet sikur harrohet në Shqipëri. Ky është raporti krahinarist në goditjet që aplikon politika, por që në këtë rast Gjekmarkaj kujdeset që t’i evidentojë si ndër kryesoret në sjelljen e PS-së.

Një seri takimesh janë zhvilluar sot paradite me sa duket edhe në funksion të jjë përgjigjeje për situatën e krijuar nga deklaratat e deputetit Doshi. Më herët, kryemimistri është takuar me kreun e Kuvendit në një takim që ka zgjatur një orë. Më pas kreu i Kuvendit ka mbledhur në një takim të shkurtër deputetët dhe ministrat e LSI-së. Nuk ka patur ndonjë njoftim zyrtar për këto takime. Takimi i tretë zhvillohet në Presidencë, ku ambasadori amerikan, Lu është takuar me kreun e shtetit shqiptar. Temë: dekriminalizimi. Me sa duket gjërat do të qartësohen në seancën e ditës së neësërme.

PD ka kërkuar ndërprerjen e shqyrtimit te ligjeve deri ne shkarkimin e kreut te Kuvendit Ilir Meta.

Sipas gazetës “Zëri” Prokuroria Themelore e Pejës është duke e hetuar një megaskandal me diploma false në Fakultetin e Shkencave të Aplikuara të Biznesit në Pejë, ku sipas rektoratit të këtij të fundit, nga 505 studentë, 503 nuk figurojnë në arkivat e tyre të kenë qenë ndonjëherë studentë të këtyre institucioneve.