Arkiv-Lajme

Seanca parlamentare e zëvendësimit të Ilirjan Muhos në postin e anëtarit të KQZ-së, që është paraprirë, shoqëruar e pasuar me një përplasje të fortë mes Berishës e Washingtonit e Brukselit, shihet me frikë nga komentatori politik Andi Bushati. “Berisha është futur në rrugë pa krye”, thotë ai qysh në krye të herës. Dhe arsyeton: “Lajmi i izolimit ndërkombëtar të Berishës, nuk është një lajm që ka vend për gëzim. Ai është një lajm i keq. Sepse dëshmon se kryeministrin tani nuk ka më as kush ta ndalë, as kush ta kontrollojë.

Pedagogu i UET-it, sociologu e ish ambasadori Fatos Tarifa nuk para është shprehur për çështje të politikës së ditës. Por e ka bërë sot me anë të një shkrimi të publikuar në Mapo. Është tronditur nga séanca parlamentare e mbrëmjes, kur u shkarkua anëtari i KQZ-së, Muho. Dhe sipas Tarifës, me atë seancë u provua se kjo maxhorancë nuk e ka më atë legjitimitet që kish katër vjet më parë, dhe se rendi demokratik nuk është vetëm i brishtë, por edhe i dyshimtë.

Panorama ka zënë të publikojë ca intervista atipike të personazheve të rëndësishëm të politikës e të jetës publike shqiptare. Janë “atipike”, pasi pyetjet janë bërë nga adoleshentët. Është një iniciativë e Leonard Bombajt, i cili më pas ka bërë një libër me intervista të tilla.

Ambasadori i Prezencës së OSBE-së në vendin tonë, Eugen Volfarth, ka dhënë dorëheqjen pak ditë më pare – shkruan faqja online e Panoramës dhe citon Volfarthin: “Ministria e Punëve të Jashtme të Gjermanisë më ka ofruar një post të mirë që shumë do e ëndërronin dhe unë e kam pranuar. Kjo bëhet brenda këtij viti. Meqë jemi këtu dua të theksoj se unë do të rri edhe për zgjedhjet”.

Deklaratat e shqetësuara të të huajve po pasojnë njëra tjetrën. Gjesti i fundit i Berishës, i n-ti, duket se i ka vënë kapakun bindjes së tyre se kryeministri shqiptar nuk do të ndalet më në rrugën “për t’i fituar zgjedhjet e 23 qershorit”. Thuhet se ambasadori Arvizu ka pasur mbrëmë një bisedë tepër të tensionuar me kryeministrin shqiptar.

Boksi i ringut (boxing në anglisht), megjithëse jo shumë i përhapur në Shqipëri është sport i mirënjohur ndër shqiptarët. Ndërsa boksi i rrugës (street fighting në anglisht) njihet vetëm nga filmat e Hollivudit. Boksi i ringut është një sport vërtet i ashpër, por zhvillohet sipas disa rregullave rigoroze që rrallë shkelen. Ndërsa në boksin e rrugës, konkurentët luftojnë për të fituar, pa ju nënshtruar asnjë rregulli, deri sa njëri prej tyre të vdesë ose të bjerë në tokë pothuaj i vdekur.

Nënkryetari i KQZ-së Denar Biba ka dhënë dorëheqjen e parevokueshme. “Në rrethana si këto, kur mbrojtja ligjore e institucionale që supozohej se e kishim të garantuar si anëtarë të institucionit të ngarkuar nga ligji për t’u dhënë shqiptarëve zgjedhje të lira e të ndershme është përdhosur haptazi, vlerësoj se duhet të jap dorëheqjen nga detyra e zëvendëskryetarit dhe njëherësh anëtarit të Komisioni Qendror të Zgjedhjeve”, shkruan Biba në letrën e tij të dorëheqjes.

Ambasadorja e Gjermanisë në Tiranë, Carola Muller Holtkemper, në një intervistë për “Top Channel” thotë se kërkesat dhe insistimi i komunitetit ndërkombëtar për mos të prekur KQZ-në, u injoruan.

Një Qendër e natyrës akademike që merret me problemet e gruas në Turqi (Universiteti i Kirikkale-s), është bërë tok me një OJQ (Mutlu Cocuklar Dernegi – Shoqatë e Fëmijëve të Lumtur), dhe kanë bërë një sondazh mbi dhunën shtëpiake. Rezultatet nuk janë shumë europiane. 34% e të intervistuarëve është me idenë se dhuna mbi gratë “kur duhet, duhet”, ndërsa 28% e tyre janë me idenë se dhuna mbi gratë është një mënyrë për t’i mbajtur nën kontroll e të disiplinuara.

“Jam i bindur se të gjitha sugjerimet janë me vend, dhe të arsyetuara mirë; edhe pse për disa mund të gjenden lehtësisht kundërargumente; gjithsesi, anëtarët e Këshillit [Ndërakademik] janë profesionistë të padiskutueshëm të fushave të tyre dhe e dinë për çfarë flasin”, thotë Ardian Vehbiu në krye të një shkrimi me titull “Male me barrë”, të publikuar në blogun e vet Peizazhe të Fjalës, në të cilin është ndalur tek takimi i sotëm i Këshillit Ndërakademik për çështje të disa ndryshimeve në drejtshkrimin e shqipes standarde.