Arkiv-Lajme

Ministri Erjon Veliaj zhvilloi një vizitë në Bajram Curri ditën e sotme, gjatë së cilës u diskutua reforma e pensioneve me qytetarët. Sipas ministrit, kjo reformë prek shumë pak ata që janë në prag pensioni, ndërsa për personat që dalin në pension nga janari 2015, parashikohet një pension më i lartë.

Dy vrasës me pagesë nga Shqipëria dhe një kosovar janë vënë në prangat e policisë në qytetin e Pejës, pasi kishin marrë 40 mijë euro për të kryer një vrasje. Policia e Kosovës ka bërë të ditur dje se, të premten, (11 korrik) rreth orës 23:30 në qytetin e Pejës ka arrestuar tre persona: B. G., 39 vjeç, nga Kosova dhe S. D., 45 vjeç dhe N. M., 50 vjeç të dy nga Shqipëria.

Kantautori italian Gianluca Grignani është arrestuar mbrëmë nga policia e Riccione-s pasi ka kundërshtuar me dhunë forcat e rendit. 42 vjeçari ndodhej me pushime në sëbashku me bashkëshorten e 4 fëmijët prej një muaji. Natën e kaluar, rreth orës e 20:30, bashkëshortja e tij ka telefonuar policinë sepse Grignani, ndodhej nën efektet e alkoolit e drogës.

Agjencia italiane e lajmeve “Ansa” shkruan se situata është bërë e rrezikshme pasi ai ka qëlluar me shkelma 2 punonjës të policisë.

Me rastin e vizitës së Papa Françeskut në Shqipëri, më datë 21 shtator, sheshi “Nënë Tereza” në Tiranë, do t’i nënshtrohet një restaurimi tërësor. Gazeta “Shqip” shkruan se lajmi bëhet i ditur nga arkitekti Artan Shkreli, nëpërmjet një statusi në rrjetin e tij social “Facebook”, ku shkruan se ky shesh do të restaurohet i gjithi, në të gjitha elementet përbërëse të tij, duke përfshirë fasadat, ndriçimet, trotuaret, shkallaret dhe infrastrukturën.

Ministri i Financave të Serbisë, Lazar Krstiq ka dhënë dorëheqjen nga kabineti qeverisës për shkak të qëndrimeve të ndryshme që ka pasur, rreth reformave ekonomike, me kryeministrin Aleksandar Vuçiç.

Referuar deklarimeve të publikuara në media, ministri i dorëhequr i Financave ka mbështetur tezën e masave shtrënguese si shkurtime shpenzimesh apo edhe pagash e pensionesh, tezë që kryeministri nuk e ka pranuar. Agjencia e lajmeve “InSerbia” shkruan se sipas Krstiq, “kryeministri Vuçiç e ka zemrën e butë”.

n.k

Seanca plenare e 17 korrikut në Kuvendin e Kosovës pritet të shoqërohet nga tensione të forta mes PDK-së në njërën anë dhe LDK-AAK-NISMA në anën tjetër. Të paktën kjo është ajo çfarë parashikohet nga mediet në Kosovë që shkruajnë se kjo mund të ndodhë “pasi të dyja blloqet po pretendojnë se kanë numrin më të madh të grupit parlamentar”.

Brazili zhgënjen përsëri. Në ndeshjen e zhvilluar sonte me Hollandën për vendin e tretë në Botërorin 2014, Brazili nuk shënon asnjë gol. Hollanda e ka sfiduar duke shënuar 3 gola dhe duke rrëmbyer kështu vendin e tretë në Brazil 2014. 

Rovin Van Persie, Daley Blind Georginio Wijnaldum shënuan golat në këtë triumf të holandezëve. Mesa duket Brazili ka pësuar një tronditje të fortë pas humbjes së thellë me Gjermaninë dhe ende nuk po e merr veten pas kësaj goditjeje.

Ndihmës Sekretarja e Shtetit,  Victoria Nuland në vizitën e saj në Shqipëri është pritur nga drejtuesit e institucioneve kryesore të vendit. Ajo është pritur nga Kryetari i Kuvendit, nga Presidenti Nishani, Kryeministri Edi Rama dhe kreu i opozitës Lulzim Basha.

Deputeti i Partisë Socialiste i qarkut të Lezhës, Arben Ndoka ka reaguar ndaj akuzave të Partisë Demokratike se ka qenë i dënuar me burg në Itali për prostitucion. Në sqarimin e tij Ndoka në thotë se është dënuar në mungesë thotë se është dënuar padrejtësisht dhe se ai nuk ka pasur lidhje me ngjarjen.

Kryesia e Kuvendit të Republikës së Kosovës, në mbledhjen e sotme ka përcaktuar koalicionin LDK-AKK-Nisma për Kosovën si grupin më të madh parlamentar. Kryetari i PDK-së, Hashim Thaçi, u largua menjëherë nga mbledhja pas këtij vendimi, duke thënë se çdo rrugë tjetër i një grumbulli muskujsh politikë për ta përmbysur vullnetin politik të qytetarëve bie në kundërshtim me Rregulloren e Punës së Kuvendit, me Ligjet dhe me Kushtetutën e Republikës së Kosovës.