Arkiv-Lajme

Në rang vendi, PS-ja mori rreth 93 mijë vota më shumë se në vitin 2009, duke patur një rritje rreth 15%. Ndërkohë, rritja e totalit të votave të vlefshme ishte rreth 13%. Kjo tablo e nivelit kombëtar të PS-së na lë të kuptojmë se rritja e saj, në vija të trasha, ka ardhur nga marrja e votave të zgjedhësve të saj të 2009-ës; të fëmijëve të tyre që kishin mbushur moshën për votim deri në 23 qershor; dhe një pjese të konsiderueshme të emigrantëve që s’kanë marrë pjesë në zgjedhjet e 2009-ës, por votuan në 23 qershor.

“Gabimi më i madh është glorifikimi i rezultatit të [LSI-së]. Janë elozhet ndaj bërësit të mbretit, idolatria ndaj forcës dhe zhdërvjelltësisë së tij, duartrokitja, pa shqetësim, vetëm për shkak të shifrave. Sepse ta komentosh atë vetëm duke u nisur nga përmasat dhe të shmangësh pasojat që do të ketë në qeverinë e nesërme, është të thuash vetëm një pjesë të së vërtetës”, thotë Andi Bushati në fund të shkrimit të tij, të sapo publikuar në Temën online.

Sokol Olldashi zyrtarizoi kandidaturën e tij për kreun e PD-së. Edhe emra të tjerë (bajagi anonimë) janë shfaqur, teksa ka plasur një valë anëtarësimesh në parti, si furnizim për parimin një anëtar- një votë. Veç Lulzim Bashës, deri më tani është prononcuar si garues edhe Aleksandër Biberaj. Le të ndalemi pak tek ai.