Arkiv-Lajme të përditësuara

Një ndër problemet më të mëdha që ka sot Tirana është ndotja, duke e renditur kryeqytetin e Shqipërisë në një ndër kryeqytetet më të ndotura në Europë.

E pikërisht për këtë temë, Erion Veliaj ka prezantuar programin e tij për reduktimin e ndotjes në kryeqytet, për ta kthyer Tiranën në një vend, ndoshta jo më të pastrin në Europë, por brenda standardeve të BE-së.

Kritika të forta vijnë nga Presidenti Bujar Nishani për reformën në drejtësi. Kreu i shtetit tha se reforma po zhvillohet në mënyrë të njëanshme nga mazhoranca dhe se tryezat e organizuara kanë qenë formale. Ai bëri thirrje për bashkëpunim mes palëve.

Nishani foli në mbledhjen e dytë të Komitetit të Aktorëve të Interesuar, EURALIUS IV, me temë: “Konsolidimi  Sistemit të Drejtësisë në Shqipëri”.

Gjykata e Lartë rrëzoi të mërkurën kërkesën e Mark Frrokut për ndryshimin e masës së sigurisë.

Kreu i Partisë Kristian Demokrate kishte kërkuar heqjen e masës së sigurisë “arrest shtëpie” për çështjen “Doshi”. Deputeti Frroku akuzohet për deklarim të rremë në këtë çështje.

Avokatët e Mark Frrokut deklaruan se do të presin Gjykatën Kushtetuese, pasi sipas tyre Gjykata e Lartë nuk ka bërë një shqyrtim të drejtë. 

Në skajin më verior të Bashkisë së Gjirokastrës, në komunën Cepo, Lulzim Basha bëri një përkufizim për sjelljen e kryeministrit në fushatë.

“Ditë për ditë bredh nëpër Shqipëri dhe bën estradë, por shqiptarët nuk kanë arsye të qeshin”, tha kreu i opozitës.

Një ditë pas çregjistrimit të kandidatit të Partisë Demokratike në Kurbin, Ilir Pjetraj, ambasadori amerikan në Tiranë, Donald Lu ka mbërritur të martën paradite në Komisionin Qendror të Zgjedhjeve, ku është takuar me 7 anëtarët e këtij institucioni.

Njoftimi zyrtar i KQZ-së thotë vetëm se, diplomati amerikan është njohur me ecurinë e procesit të deritanishëm të zgjedhjeve dhe vendimmarrjet e institucionit më të lartë zgjedhor, por mësohet se qëllimi i takimit ka qenë një tjetër.

Kavaja dhe administrimi i saj nga Elvis Roshi ka qenë një nga shembujt se përse koalicioni i mazhorancës zgjodhi sloganin “Drejtimi i duhur” për 21 Qershorin.

Kështu deklaroi kryeministri Edi Rama në një takim elektoral në qytetin e Kavajës, ku përpara qytetarëve kërkoi votën për kandidatin e Aleancës për Shqipërinë Europiane për të vazhduar, sipas tij, rilindjen e Kavajës, ku si një prej shumë  sfidave, renditi ndërtimin e rrugës Kavajë-Pezë-Tiranë. 

Rama akuzoi Partinë Demokratike se e harroi këtë qytet.

Presidenti i sapozgjedhur i FIFA-s, trupës më të lartë qeverisëse të futbollit botëror, Sepp Blatter ka njoftuar përmes një konference për shtyp nga Zyrihu i Zvicrës, këtë të martë, largimin nga posti aktual, për të cilin vetëm pak ditë më parë mori mandatin e pestë për ta qeverisur.

Dorëheqja e tij është e menjëhershme, por Blatter do të qëndrojë në krye të organizatës deri në mbajtjen e një Kongresi të jashtëzakonshëm, që siç njoftoi FIFA do të mbahet mes dhjetorit 2015 dhe marsit 2016, për të zgjedhur pasardhësin e tij.

Tre persona janë vënë në pranga nga policia e Korçës, në vijim të operacionit antidrogë të koduar “Udhëtimi 2”.

Burime zyrtare bëjnë të ditur se janë sekuestruar një sasi prej 1.8 kg lëndë narkotike e dyshuar si kokainë. 

Të arrestuar janë Arben Shquti, Vangjel Zguri, dhe Renaldo Thoma të tre banues në Korçë. Gjatë kontrollit në mjetin e tyre tip BMV në pronësi të Thomës, si dhe në banesat e të arrestuarve u gjet sasia e drogës,e cila dyshohet se trafikohej drejt shtetit grek. 

Halim Kosova, kandidati i Partisë Demokratike për Bashkinë e Tiranës, zhvilloi të hënën një aktivitet për 1 Qershorin, nga ku premtoi se do të bëjë më të mirën për të gjithë fëmijët e kryeqytetit.

“Ju premtoj se vëmendja ime do të përqendrohet veçanërisht te fëmijët jetimë”, tha kandidati i djathtë.

/ Top Channel

Kryeministri Edi Rama dhe kandidati i majtë për Tiranën, Erjon Veliaj kanë prezantuar paraditen e së hënës planet për ringritjen e Parkut Olimpik dhe atij zoologjik të Tiranës.

Në fjalën e tij, kryeministri Rama, ish-basketbollist, ka deklaruar se ndërtimi i Parkut Olimpik do t’u japë mundësi sportdashësve dhe federatave që të punojnë e të përfaqësohen në mënyrë dinjitoze.