Arkiv-Lajme

Afro gjysma e shkollave 9-vjeçare dhe të mesme në kryeqytet janë pa ngrohje. Lajmi konfirmohet nga Drejtori i Administrimit të Qytetit në bashkinë e Tiranës, Alfons Muça, i cili në një intervistë për televizionin Klan pohoi se në 40 për qind të shkollave nuk është instaluar fare sistemi i ngrohjes, ndërsa në 20 për qind të tyre ka probleme me funksionimin e kaldajave.

Gazetat kryesore amerikane përcjellin sot lajmin për procesin gjyësor të divorcit të manjatit të naftës, miliarderit Harold Hamm. Ka bërë bujë në fakt, çeku që ky ka firmosur për ish-gruan e vet, Sue Ann Arnall, i cili mban shifrën e rreth 975 milionë dollarëve. Dhe më tej: Arnall i ka refuzuar, pasi mendon se mund të marrë më shumë dhe se pranimi i shumës do të ulte shanset për arritjen e këtij qëllimi. Pasuria e Hamm vlerësohet në rreth 19 mld dollarë, por ai është ankuar se ulja e çmimit të naftës e ka goditur rëndë kompaninë e tij.
s.z

Kryeministri Edi Rama ka njoftuar sot se do të ndjekë në rrugë gjyqësore akuzat e bëra nga selia e Partisë Demokratike lidhur me përplasjen me armë në rrugën e Kavajës, ngjarje që implikoi edhe Emiljano Shullazin. Akuzat për përfshirjen indirekte të Edi Ramës në mbrojtjen e këtij grupi kriminal, nga PD-ja i ka bërë kreu i Grupit Parlamentar, Edi Paloka, ndaj të cilit do të bëhet edhe padia.

Mario Draghi ka dështuar në luftën kundër deflacionit në Eurozonë pavarësisht se ka përdorur të gjitha mënyrat tradicionale financiare. Kështu shkruhet në një shkrim të “Der Spiegel” në të cilin shtrohet pyetja nëse tani ideja e “dhurimit” të parave për çdo qytetar të Eurozonës do të shërbente si zgjidhje ose jo. “Helicopter money”, ose ndihma nga “lart” është një ide e hedhur më herët, e sipas së cilës Banka Qendrore Europiane do të duhet t’i japë çdo qytetari të Eurozonës deri në 3000 euro. Kjo supozohet se do të shtojë konsumin, do të nxisë qarkullimin dhe do të gjallërojë bizneset.

“Corriere della Sera” ka publikuar sot një histori që mund të na vijë e ngjashme shumë me atë që dëgjojmë të ndodhë jo rrallë edhe në Shqipëri. Martino Scialpi, një qytetar nga Bari fiton 1 miliardë lireta në vitin 1981 duke luajtur me vetëm 500 lireta në skedinat e Totocalcios. Duke menduar se u bë i pasur, në fakt ai thjesht sa ka përjetuar një odise gjyqësore që zgjat 34 vjet dhe që i ka kushtuar atij 400 mijë euro. Absurdi i këtij rasti italian vazhdon edhe më tej, pasi ndonëse gjykata në vitin 2012 urdhëroi pagimin e tij me shifrën e gati 2.6 mln euro, proceset vazhdojnë akoma.

Redaksia e revistës satirike franceze “Charile Hebdo” është sulmuar sot nga dy përsona të armatosur që kanë lënë të vrarë disa persona. Agresorët thuhet se kanë qenë të armatisur me kallashnikov dhe kanë hapur zjarr të pandërprerë. BBC njofton se revista në fjalë ka provokuar edhe më herët me trajtimin e lajmeve dhe përdorimin e karikaturës. Raportohet se një nga tweet-et e fundit konsistonte në një karikaturizim të liderit të ISIS, Abu Bakr al-Baghdadi.

Lëvizja Vetëvendosje, e cila drejtohet nga Albin Kurti ka kërkuar nga kryeministri i Republikës, Isa Mustafa dhe ministri i Punëve të Jashtme, Hashim Thaçi, që menjëherë të nisen për Hungari dhe të vizitojnë kampet e refugjatëve ku janë kosovarët dhe të interesohen për mirëqenien e tyre pranë institucioneve të shtetit hungarez dhe atyre të Bashkimit Evropian. Në reagimin e saj, kjo lëvizje kërkon nga qeveritarët kosovarë të vizitojnë vendkalimet kufitare legale dhe ilegale mes Hungarisë dhe Serbisë, për të përjetuar sadopak atë që ndjejnë nënshtetasit e tyre.

l.v

Autoriteti i Komunikimeve Elektronike dhe Postare (AKEP), ka pezulluar zbatimin e vendimit për barazimin e tarifave celulare brenda dhe jashtë rrjetit. Gazeta “Shqip” shkruan se shkak për këtë është bërë ankesa e dy operatorëve më të mëdhenj në vend, ankesë e depozituar në fund të muajit dhjetor të vitit 2014.

Prej tri ditësh vijon shqetësimi për mungesën e ngrohjes në disa kopshte të Tiranës. Në kushtet kur temperaturat kanë arritur minimume, ngrohja është domosdoshmëri, por sikurse është bërë e ditur edhe dje nga një kronikë e Top-Channel, shkak u tha se ishte prishja e kaldajës. U tha edhe se që këtej e tutje nuk do të kishte më probleme, edhe pse nga bashkia nuk ka asnjë reagim zyrtar. Ndërkohë në një nga kopshtet me probleme, prindërit janë duke ndërmarrë iniciativën për të blerë kondicionerë për të siguruar ngrohjen që do të duhet të siguronte shteti.
s.z

Projektligji, që u ndalon qytetarëve të Kosovës pjesëmarrjen ne konfliktet e armatosura jashtë vendit, do të jetë për shqyrtim së shpejti. Përveç “Vetëvendosjes”, të gjitha grupet parlamentare do të votojnë pro këtij Ligji. “Exspress” shkruan se në muajin shkurt, Kuvendi i Kosovës pritet ta miratojë njërin nga ligjet më të diskutuara, atë Për Pjesëmarrjen në Konfliktet e Armatosura Jashtë Vendit. “Besoj që ky ligj do të vijë para deputetëve për shqyrtim të dytë në muajin shkurt”, ka thënë Blerim Latfi, këshilltar i kryeparlamentarit.