Arkiv-Lajme të përditësuara

Lidhja mes farmacive me mjekëve që detyrojnë pacientët të blejnë barna në farmacitë që u intresojnë atyre, vijon të mbetet problem. Ndërmjet këtyre marrëveshjeve të fshehta, mjekët përfitojnë rryshfet nga farmacistët duke dëmtuar në mënyrë të pandershme konkurrencën në tregun farmaceutik. Konstatimet vijnë nga Urdhëri i Farmacistit, që i ka dërguar një material të detajuar dhe Ministrisë së Shëndetësisë, duke i kërkuar marrjen e masave.

Ndërsa mbetet edhe një javë deri në fund të muajit, gushti është që tani muaji më i përgjakshëm në konfliktin 17-mujor në Siri. 

Sipas të dhënave të publikuara prej forcave të opozitës, më shumë se 3 700 persona, shumica civilë, kanë mbetur viktima të konfliktit.

Ndërkohë, në vend luftimet po intensifikohen, me forcat e ushtrisë së rregullt që kanë lëshuar një sulm të gjerë frontal, të ndihmuar nga bombardimet e artilerisë dhe të avionëve ushtarakë.

Kundërshtarët e presidentit egjiptian Muhamed Morsi janë përleshur me përkrahësit e tij në Kajro, në atë që është thënë të jetë incidenti i parë i tillë, që kur presidenti islamik mori pushtetin dy muaj më parë. 

Në sheshin Tahrir të Kajros, grupe rivale të rinjsh hodhën gurë dhe shishe boshe ndaj njëri-tjetrit, ndërkohë që demonstrata të vogla janë raportuar në zona të tjera të kryeqytetit.Kundërshtarët akuzojnë Morsin dhe Vëllazërinë e tij Myslimane se po kërkojnë të monopolizojnë pushtetin.

Samsung duhet t'i paguajë 1 miliardë dollarë dëmshpërblim Apple-it. Vendimi është marrë nga një gjykatë amerikane, e cila ka qenë e ngarkuar me procesin gjyqësor mes dy gjigandëve të teknologjisë botërore. Apple akuzonte Samsung se kishte kopjuar dizajnin e iPhone dhe iPad dhe kërkonte 2.5 miliardë dollarë dëmshpërblim. Samsung, nga ana e tij, akuzonte Apple për "kopje" dhe kërkonte 442 milionë dollarë dëmshpërblim. Samsung pritet të apelojë vendimin e marrë. Dy kompanitë janë prodhues të më shumë se gjysmës së tableta-ve dhe smartphone-ve në mbarë botën.

 Më shumë se 200 mijë persona kanë mbërritur në vendet fqinje gjatë konfliktit 17 mujor në Siri, njoftoi agjencia për Refugjatët e kombeve të Bashkuara. Kjo shifër tejkalon parashikimin prej 185 mijë refugjatëve që OKB kishte dhënë deri në fund të vitit si dhe reflekton intensifikimin e valës së largimeve gjatë javës së fundit. Mbi 30 mijë persona vetëm ditët e fundit kanë mbërritur në kampet e pritjes në Turqi, Liban, Irak dhe Jordani.

Mijëra emigrantë zhvilluan dje në Athinë një marshim proteste, me qëllim “për të denoncuar rastet e dhunës raciste dhe policore” ndaj të huajve në Greqi. 

Rreth 3000 protestues, kryesisht pakistanezë, pas përfundimit të marshimit që nisi në sheshin Omonia, u tubuan para Parlamentit grek. 

Më parë, ishin shënuar tensione të kufizuara, kur një pjesë e protestuesve sulmoi dhe goditi katër persona, pa u sqaruar nga policia shkaqet e sulmit dhe viktimat. 

Dikush e kishte shfrytëzuar natën për të lëshuar fletë me “urdhër arresti” të rreme nëpër Prishtinë në adresë të kryeministrit Hashim Thaçi, zv/kryeministres Mimoza Kusari-Lila dhe ministrave Besim Beqaj dhe Bedri Hamza. 

Prishtina u zgjua sot e mbushur me “urdhër arreste”, që të kujtojnë traktet në kohën e luftës antifashiste në Shqipëri. 

Deri tani askush nuk e ka marr përsipër ketë aksion. 

 Kandidati republikan, Mitt Romney e ka të shtrirë pasurinë e tij në një seri kompanish aksionere në parajsa të tilla fiskale si ishujt Kajman apo Luksemburg. Investimet jashtë vendit të rivalit të Obamës për Shtëpinë e Bardhë në zgjedhjet presidenciale të nëntorit, janë bërë objekt i mbikqyrjes nga publiku dhe shtypi në Shtetet e Bashkuara, pasi u publikuan edhe auditet e brendshme dhe letrat private që lidhen me pasurinë e tij 250 milionë dollarëshe. 

Shkodra vazhdon të jetë rrethi që ka numrin më të lartë të fëmijëve të ngujuar që ndjekin arsimin parauniversitar. Specialistët e ministrisë së Arsimit thonë për "AS", se edhe këtë vit shkollor, fëmijët e ngujuar do të marrin mësim pranë banesave të tyre, në sajë të mësuesve që janë vënë në dispozicion. Krahas arsimtarëve që janë të trajnuar posaçërisht për këta nxënës, në  banesat e tyre, 2 herë në javë shkon dhe një psikolog.