Arkiv-Lajme të përditësuara

Drejtuesit më të lartë të Partisë Demokratike dhe ata të grupimit “Dhjetor 90”, vendosën këtë të premte ngritjen e një komisioni organizativ për përkujtimin e 25-vjetorit të krijimit të kësaj partie.

Sipas një njoftimi për shtyp nga selia blu, nisma synon të risjellë në kujtesën e shoqërisë shqiptare momentet dhe mesazhet kryesore të ndryshimit historik të Shqipërisë, konkretisht rënien e komunizmit. 

Është prezantuar paraditen e kësaj të premteje sistemi i ri elektronik për mbrojtjen e pyjeve, sipërfaqet e të cilave do të mbikëqyren me anë të kamerave.

Në fjalën e tij në këtë event, ministri i Brendshëm, Saimir Tahiri ka deklaruar se, prerja e paligjshme e pyjeve është një çështje që e ka shqetësuar qeverinë që në ditën e parë të punës. 

Qeveria e Kosovës miratoi për herë të dytë amendamentin kushtetues për Gjykatën Speciale dhe e riprocedoi për miratim në Kuvend.

Kryeministri Isa Mustafa tha se Kosova ka kërkesë eksplicite nga partnerët strategjikë, SHBA dhe Bashkimi Evropian, miratimin e Gjykatës Speciale, si një obligim ndërkombëtar që ka marrë vendi.

Mustafa tha se Kosova nuk mund të zhvillohet nëse mbetet e izoluar nga ana e partnerëve ndërkombëtarë, ndaj ai i ftoi deputetët që të miratojnë formimin e Speciales.

Erjon Veliaj është betuar si kryetar i Bashkisë së Tiranës, në ceremoninë e mbajtur paraditen e kësaj të entjeje në këtë institucion.

Këshilltarët e djathtë e kanë braktisur sallën në momentin e betimit, duke anashkaluar edhe fjalimin e Veliajt. Vendimin e tyre ata e kanë argumentuar me pretendimin se, prania e ministrit të Pushtetit Vendor, Bledi Çuçi ishte e paligjshme. 

Në fjalën e tij, Veliaj ka deklaruar se, ai dhe skuadra e tij do të punojë me të gjitha forcat për të përmbushur pritshmëritë e qytetarëve. 

Këshilltarët e djathtë në Bashkinë e Krujës, nëpërmjet një deklarate për shtyp ditën e enjte, bënë me dije se “në një akt të pashembullt arrogance dhe papërgjegjshmërie institucionale, pa përmbushur kërkesat ligjore për njoftimin zyrtar të mbledhjes së parë, është thirrur për konstituim Këshilli Bashkiak i Bashkisë Krujë”.

Këshilltarët e opozitës kanë deklaruar se “në shenjë proteste, sensibilizimi dhe përgjegjshmërie qytetare e institucionale ndaj këtij akti të kundraligjshëm” kanë vendosur të refuzojnë konstituimin e Këshillit Bashkiak.

/ Top Channel 

Shqiptarët do të udhëtojnë drejt Bosnje Hercegovinës vetëm me kartën e identiteti. Marrëveshja është firmosur në Tiranë mes ministrit të Jashtëm Ditmir Bushati dhe homologut të tij boshnjak, Igor Crnadak.

Të dy ministrat u shprehën se kjo marrëveshje për lëvizjen e ndërsjelltë të shtetasve me karta identeti do të ndihmojë në rritjen e turizmit në të dy vendet. Aktualisht Shqipëria ka një marrëveshje të tillë me Malin e Zi, Kosovën dhe Maqedoninë. 

Të arrestuarit lidhur me rastin e Kumanovës janë viktima të politikës dhe shërbimeve sekrete. Kështu ka pohuar për mediat avokati mbrojtës i të akuzuarve për ngjarjet tragjike në “Lagjen e Trimave” të Kumanovës.

Sulmet ndaj qendrave të akomodimit të azilkërkuesve janë rritur ndjeshëm në Gjermani. Sipas Ministrisë së Brendshme gjermane, vetëm sivjet ka pasur 173 të tilla.

Mbrëmjen e së hënës, më shumë se 2000 vetë marshuan në rrugët e Dresdenit në mbështetje të lëvizjes "Pegida", lëvizje që lufton kundër “islamizimit të Perëndimit” e që tërheq sa përkrahës të ekstremit të djathtë, ashtu edhe njerëz të thjeshtë, të cilët emigracionit i kundërvihen vetëm sepse u druhen pasojave të tij.

Policia e Durrësit njoftoi arrestimin e dy të rinjve të dyshuar si autorë të vjedhjes së disa banesave në zonën e Gjirit të Lalëzit, përfshirë banesën e Sekretarit të Përgjithshëm dhe deputetit të Partisë Demokratike, Arben Ristani.

Dy të dyshuarit për vjedhje u arrestuan në zonën e Shijakut. Ata janë Arnold Karaj, 19 vjeç, lindur në Burrel dhe banues në Tiranë dhe Donald Vatnikaj, 18 vjeç, lindur dhe banues në Tiranë.

Kryetari i Partisë Demokratike, Lulzim Basha priti në takim Drejtorin Politik të Ministrisë së Jashtme austriake, Jan Kickert dhe Drejtorin për Ballkanin Perëndimor, Johannn Sattler.

Basha njohu diplomatët austriakë me shqetësimet e opozitës. Ai tha se vendi po bën kthim mbrapa dhe zhbërja e standardeve demokratike rrezikon seriozisht të ardhmen e Shqipërisë.