Po do ta ketë edhe Partia Socialiste ndonjë problem! Apo jo?

Partia e Lirisë i ngjan një gërmadhe të ngjashme me Rithemelimin. Kështu shkruan analisti i pavarur dhe i paanshëm (më shumë se ç’duhet në fakt)– Skënder Minxhozi në faqen “Java News”. Të njëjtin epitet e gjen ngado që ta kthesh shikimin në faqet e të majtës militante që popullon sot në masë hapësirën e mediave online.

Armiqtë e Partisë Socialiste janë të çorganizuar, të bërë lëmsh dhe mënyra dëshirore e kësaj “analize” është: u shofshin njëherë e mirë!

Dhe në fakt nuk është se ky konstatim nuk ka vërtetësi. Që nga nisja e pluralizmit e deri më sot asnjë parti nuk arriti të ngrihej në nivel organizimi dhe funksionimi si PS-ja. Të gjitha partitë që dolën rrugës, majtas apo djathtas, ishin shfaqje personale të njerëzve të ndryshëm që ose u dorëzuan, ose u rrëgjuan, ose u shitën. Kjo është e vërteta. Mirëpo është njëra gjë që të analizosh gjendjen e një spektri dhe tjetër të përcjellësh ndjesi triumfalizmi për dështimin e një krahu, që është dështim i paracaktuar kur sheh se kush ka mbetur të flasë.

Është tjetër gjë, sepse përqendrimi intensiv në një krah, ku po investohet përditë yshtja e miletit se opozita është e gjitha për SPAK, përfaqëson apo tradhëton një interes kryesor edhe të agjitpropallarëve si ky Minxhozi që në skenë PS-ja të mbetet përmes asgjësimit të të tjerëve. Xhanëm kjo është e vetmja mënyrë tashmë që kjo parti të vazhdojë të shpresojë se përfaqëson diçka më shumë sesa interesat ekonomike të krimit dhe të të korruptuarve.

Përndryshe, z. Minxhozi dhe analistë të tjerë të pavarur deri në rrezik këputjeje si ai, do të kishin minimumi kuriozitetin dhe mandej edhe mëshirën për ne të tjerët që të analizonin edhe PS-në.  Si është gjendja në këtë parti? Si funksionojnë institucionet në këtë godinë ku drejtuesit po bien njëri pas tjetrit për akuza korrupsioni?

Pse nuk hapet asnjëherë diskutimi për zgjedhjet, rotacionin, përzgjedhjet e kështu me radhë? Si mund të mbulohet me heshtje një parti që po plaçkit një vend të tërë, që farkëton karriera për të gjithë llojet e injorantëve në këtë vend, që largon e afron sipas midesë së një njeriu të vetëm dhe mandej u dashka quajtur ende Parti? Ose grupim vullnetar politik?

Po sigurisht që këto nuk duken pas malit të punëve të mëdha që po bën qeveria, nuk bien në sy, pasi socialisti i zakonshëm është me përkufizim modest, i përulur dhe fjalëpak. Është shumicë e heshtur, qytetar model që e di sesi ta lërë tymin të shkojë drejt në oxhakun e vet. Ndoshta analistët e pavarur ndaj edhe nuk shkruajnë për këtë kategori: dallojnë kaq shumë prej tyre ose nuk shquajnë asgjë interesante pse në fund të fundit populli nuk ishte kurrë protagonist i historisë që mban gjallë gazetarinë e parazitimit. Megjithatë, ndonjë problem do ta ketë edhe PS-ja, sado që selitet e parfumoset me heshtjen shurdhuese të analistëve që gdhihen e ngrysen me merakun se a do shkojë Meta me Berishën në burg? Ama, lista ta ndalet aty, mos të vazhdojë me Ramën, apo Veliajn, sepse SPAK nuk mund të përbaltë Shqipërinë kështu!

s.zaimi