Blloku Bota

Kryeministri në detyrë i Kosovës, Albin Kurti ka uruar sot në rrjetin “X” Friedrich Merz për zgjedhjen në detyrën e kancelarit të Gjermanisë. Kurti shpreh vullnetin për të thelluar bashkëpunimin, një mesazh të cilin Merz, në mënyrë domethënëse e ka replikuar me një falenderim po në rrjetin social në fjalë.

Është një komunikim që duhet vlerësuar pasi në mënyrë qoftë edhe protokollare ilustron se kancelari i ri i Gjermanisë e ka rajonin në fokus të punës së vet të ardhshme.

Greqia dhe Egjipti kanë nënshkruar një marrëveshje të partneritetit strategjik që synon të thellojë koordinimin politik dhe fuqizimin e stabilitetit në Mesdheun Lindor.

Rëndësia e marrëveshjes theksohet nga fakti se për firmosjen e saj në Athinë ka qenë i pranishëm Presidenti egjiptian Abdel Fattah al-Sisi që ka cilësuar se Egjipti është i vendosur të vendosë partneritetin me Greqinë që bazohet mbi respektin reciprok.

Në një intervistë për “Spiegel”, Theodor Meron, ish-ambasador i Izraelit, ish-kryetar i Gjykatës Ndërkombëtare për Krimet në Jugosllavi, i mbijetuar i Holokaustit dhe një emër i njohur i jurisprudencës ndërkombëtare, flet për urdhër-arrestin ndaj kryeministrit Beniamin Netanyahu. A i bën thirrje që kancelari Friedrich Merz të mos e ftojë Netanyahun në Gjermani nëse nuk do ta arrestojë, pasi sundimi i ligjit aplikohet për të

Qeveria izraelite ka njoftuar se ka vendosur zgjerimin e operacioneve ushtarake në Rripin e Gazës duke përfshirë edhe termin “Pushtim”. Ky është sinjali i parë që zbulon se pas veprimeve të nisura pas 7 tetorit, TelAvivi ka ndërmend të likujdojë të ashtuquajturën “çështje palestineze” duke i dhënë fund në mënyrën më ekstreme: me spastrim përfundimtar. Lidhur me këtë vendim, ministri i Financave Bezalel Smotrich ka shtuar se Izraeli nuk do të tërhiqet nga Gazan dhe se izraelitët duhet të përqafojnë fjalën “pushtim”

Presidenti amerikan, Donald Trump, ka hedhur sytë nga Turqia për të zgjidhur konfliktin në Ukrainë. Përmes një postimi në rrjetin social, “Truth”, Trump shkruan:

Duke punuar me presidentin Erdogan për t’i dhënë fund konfliktit qesharak por vdekjeprurës mes Rusisë dhe Ukrainës

Njoftimi erdhi pas një telefonate mes Trump dhe Erdogan ku është folur edhe për Sirinë dhe Gazan.

Gjërat po ndryshojnë me shpejtësi duke reflektuar dobësinë e madhe të Perëndimit. Bllokada monolite ndaj Rusisë ka nisur të kriset edhe në një seksion simbolik por të rëndësishëm si sporti. Kështu, Federata Ndërkombëtare e Gjimnastikës u ka dhënë status neutral 43 atletëve rusë, një vendim që është aplikuar edhe për 30 atletë bjellorusë.

Vendimi pason një të ngjashëm, marrë në muajin prill të këtij viti, por që solli reagim të atletëve që refuzuan të konkuronin në shenjë solidariteti me kolegët.

Mediat opozitare në Serbi raportojnë se kërkesa e Kosovës për t’u pranuar në Këshillin e Europës mund të përfshihet në agejndën e Komitetit të Ministrave këtë vitin në takimin që do të mbahet në Luksemburg më 13-14 maj.

“N1” raporton se ndonëse kërkesa nuk ishte përfshirë në agjendë këtë vit, ka një mundësi që ajo të inkuadrohet te përmbajtja e “çështjeve të tjera”, por në varësi të lobimit që do të bëhet.

Kosova aplikoi në maj të viti 2022, në prill 2023 Asambleja Parlamentare e miratoi kërkesën duke i kërkuar Komitetit të Ministrave që të marrë vendim për këtë çështje.

Kuvendi i Kosovës ka dështuar sërish sot, për të dhjetën herë, që të zgjedhë për kryetare Albulena Haxhiun. Kryetari i Partisë Demokratike të Kosovës, Memli Krasniqi, ka deklaruar pas seancës së Haxhiu nuk ka përtë kaluar as për 100-n herë, pasi sipas tij “Kuvendi i Kosovës nuk e meriton një figurë të tillë në krye”.

Parlamenti kroat ka miratuar të mërkurën në ligj për varrezat sipas të cilit imponohet zhvendosja e mbishkrimeve të vëna në varre të ndërtuara mes viteve 1991-1995 të cilat vlerësohen fyese. Mbishkrimet vihen në përballje me “rendin kushtetues” duke theksuar se janë jashtëligjore mbishkrimet e vendosura gjatë “pushtimit dhe riintegrimit paqësor” dhe që “përmbajnë simbole që mund të fyejnë moralin dhe ndjenjat e qytetarëve”. Fjala është për mbishkrime që glorifikojnë të rënët serbë në luftë.

Izraeli do të ndihmojë ushtarakisht Greqinë në zhvillimin e sistemit të mbrojtjes ajrore, por do të shfrytëzojë edhe hapësirën e saj për veprime dhe operacione të ndryshme. Në një intervistë për “Kathimerini”, kreu i Drejtorisë së Bashkëpunimit Ndërkombëtar për Mbrojtjen në Ministrinë e Mbrojtjes së Izraelit, gjeneral brigade në pension Yair Kulas, pranon se bashkëpunimi mes të dy vendeve është në nivelet më të larta.