Arkiv-Lajme të përditësuara

Dje, afati i fundit për 12 aleatë të Ramës dhe 4 të Berishës. Sot vendoset për kandidimin në zgjedhje.  Do përjashtohen nga zgjedhjet nëse nuk heqin emrat e dubluar

Partia Socialiste në Tiranë, së bashku me fushatën zgjedhore ka çelur dje dhe një tjetër fushatë, atë të mbledhjes së fondeve për 2-vjeçaren Mejsi Xhaxhaj e cila vuan nga një tumor në kokë. Në prezantimin që drejtuesi i fushatës së Tiranës, Pandeli Majko i bëri kësaj kauze, theksoi se mbi të gjitha politika duhet të tregojë dhe nota humanizmi.

Vetëm pak më shumë se një muaj përpara zgjedhjeve, Ministria e Inovacionit ka hapur tenderin mbi 20 milionë euro për dixhitalizmin e TVSH-së, i kontestuar ashpër nga opozita dhe i paditur në prokurori prej Partisë Socialiste, si shkelje flagrante e detyrës dhe kushteve të prokurimit. 

TIRANE- Një aneks të kuzhinës së punëve të pista të Sali Berishës e quajti sot Gjykatën e Tiranës, kandidati për deputet i Partisë Socialiste, Taulant Balla. Reagimi erdhi pas vendimit të dhënë nga Gjykata e Tiranës, për ta gjobitur atë me 2 milionë lekë pas akuzave në adresë së vajzës së kreut të qeverisë, Argita Malltezi. Djali i Kryeministrit Berisha kishte depozituar në Gjykatë një padi për shpifje ndaj deputetit socialist.

Lëvizja Socialiste për Integrim prezantoi sot kandidatët e saj në qarkun e Gjirokastrës. Në fjalën e tij kreu i LSI-së, Ilir Meta ftoi banorët e këtij qarku që më 23 qershor të votojnë rotacionin dhe ndryshimin duke i dhënë fund garës që Berisha i ka shpallur Gjermanisë. Ai tha se pas liberalizimit të vizave, ritmi i progresit ka qenë shumë i ulët, sepse ka pasur konflikt. Ai tha se ekonomia e vendit po përpëlitet, pasi kjo qeveri nuk mund të çlirojë potencialet e vendit.

Një i ri 28-vjeçar është vrarë pasditen e së hënës në Përmet, pasi është qëlluar disa herë me armë zjarri nga një person ende i paidentifikuar nga policia. Sipas autoriteteve policore lokale, shtetasi Andi Naçi është qëlluar teksa zbriste nga një taksi në Grykën e Këlcyrës dhe ka humbur jetën në vendin e ngjarjes si pasojë e plagëve.

Kryeministri Sali Berisha ka qenë i pranishëm gjatë ditë së sotme në inaugurimin e fillimit të punimeve për ndërtimin e HEC-it të Banjës mbi kaskadën e Devollit.

Gjatë fjalës së tij, Berisha ka thënë se ky është një moment historik për vendin. Ai është shprehur se qeveria ka ulur papunësinë dhe pavarësisht krizës ekonomike botërore, Shqipëria ia ka dalë të rezistojë.

Partia Demokratike ka hapur zyrtarisht mbrëmjen e së hënës fushatën elektorale për zgjedhjet e 23 qershorit, me një miting madhështor të mbajtur në sheshin Nënë Tereza. 

Në mitingun në fjalë, pasi janë prezantuar kandidatët demokratë, disa prej të cilëve janë futur në listë në minutën e fundit, kryeministri Sali Berisha ka deklaruar se PD shkon në zgjedhje si partia për qytetarin.