Arkiv-Lajme të përditësuara

Janë shënuar përleshje dhe përplasje të izoluara mes policisë dhe demonstruesve që mbështesin të djathtën ekstreme në qytetin jugperëndimor anglez të Bristolit gjatë një marshimi kundër ndikimit të Islamit. Rreth 300 mbështetës të Lidhjes në Mbrojtje të Anglisë marshuan kundër asaj që organizata e djathtë e quan "Islamifikim" të qytetit. 

Mungesa e theksuar e dhurimeve të gjakut për këtë muaj ka alarmuar Kryqin e Kuq Shqiptar. Përfaqësuesia e kësaj organizate, Antigoni Gjysti thotë se vetëm një dhurim është kryer këto dy javë ndërkohë, që dhe rezervat janë drejt fundit. Ajo thekson se nga grupet negative të gjakut, të cilat janë dhe më të rralla nuk ka mbetur asnjë rezervë.

Një anije mallrash e ngarkuar me ushqime dhe produkte të ndihmës humanitare mbërriti në Havanë pas nisjes nga Miami, duke u bërë anija e parë që drejtpërdrejt bashkon dy portet në më shumë se një gjysmë shekulli. "Ana Cecilia" çoi produkte të shportës bazë por dhe mjekime, veshje e mobilje të dërguara nga familjet në Miami për të afërmit e tyre që jetojnë në Kubë. Udhëtimi i dha fund një pezullimi 50-vjeçar pas vendosjes së embargos amerikane. Në portin e ishullit me rreth 1 milion banorë, njerëzit ishin rreshtuar në skelën e portit në pritje të ndihmave.

Teksa dalin sërish rrugëve për të protestuar kundër masave të kursimit, dhjetra njerëz janë përleshur me forcat e policisë rrugëve të Madridit. Ata i kërkuan qeverisë të jepte dorëheqjen, duke i cilësuar ministrat si hajdutë për rritjen e taksave dhe uljen e pagave. 

-Komuniteti ndërkombëtar hedh dyshimin për përdorimin e armëve të shkatërrimit në masë nga forcat e regjimit në Siri, ndërsa nga vendi mbërrijnë pamje shokuese të një masakre të tmerrshme. Sipas Wall Street Journal, forcat e armatosura siriane kanë filluar të zhvendosin sasi të mëdha të arsenalit të madh të  armëve kimike në dispozicion. 

Raporti i përkohshëm i Treshes për zbatimin e reformave në Greqi, përshkruan një situatë të keqe në vend, sipas gazetës gjermane Rheinische Post, që ka zbuluar këtë raport. 

Sipas raportit, qeveria greke nuk ka përmbushur 210, nga rreth 300 objektiva që janë të vendosur. Sidomos për privatizimet dhe luftën ndaj evazionit, Athina është shumë prapa objektivit me vetëm dy privatizime me vlerë të ulët gjatë këtij viti, thuhet në raport. 

Qindra punëtorë të sektorit publik në Spanjë dolën gjatë ditës në rrugët e Madridit për të protestuar kundër shkurtimeve në shpenzimet qeveritare, ndërsa unionet tregtare kërcënuan me shtimin e grevave dhe ndërmarrjen e veprimeve ligjore kundër masave kursyese. 

Protesta të ngjashme janë organizuar në të gjithë vendin. Ato kryhen pas mbajtjes së disa demostratave, më e madhja prej të cilave mblodhi rreth 4 mijë njerëz në rrugët e kryeqytetit spanjoll gjatë kësaj jave. Unionet pritet të mbajnë protesta kombëtare më 19 korrik. 

Partia Socialiste ka reaguar sot në lidhje me vendimin e qeverisë për rritjen e pensioneve në vend. Sipas sekretarit për programin në PS, Ilir Beqja, ajo c’ka në të vërtetë po ndodh me pensionet, nuk është një rritje, por një indeksim i tyre. 

Ekonomia e Kinës është rritur me hapin më të ngadaltë në tre vjet me investimet që kanë rënë dhe po ashtu edhe kërkesa në tregjet kyçe, si ai i Shteteve të Bashkuara dhe Bashkimit Evropian. 

Prodhimi i brendshëm bruto u rrit me 7.6 për qind në tremujorin e dytë, krahasuar me të njëjtën periudhë të një viti më parë, nivel ky më poshtë se 8.1 për qind që u regjistrua në tremujorin e mëparshëm. 

Deri në 2014 grupi Peugeot Citroen do të suprimojë tetë mijë vende pune në Francë. Prodhuesi numër një i automobilave në vend ka lajmëruar mbylljen e një dege prodhimi, atë në Aulnay sous Bois, ku aktualisht prodhohet Citroen C3.
Uzina pranë Parisit, punëson më shumë se 3.000 punëtorë.