Stefani shpjegon domosdoshmërinë e “aritmetikës cinike” PS-LSI

Përse për të realizuar rotacionin PS-ja ka nevojë për aleancë me LSI-në, qoftë edhe me koston e një imoraliteti politik që nuk mund të trukohet dot? – pyet Andrea Stefani në opinionin e tij botuar sot në të përditshmen SHQIP he përgjigjet:

“Përgjigjja është mjaft komplekse, ndaj po përmendim shkarazi disa nga shkaqet: Në radhë të parë është gjakimi konstant i Berishës për pushtet absolut dhe aftësia që ka treguar ai në manipulimin e zgjedhjeve. Tjetër shkak është gabimi e lidershipit të PS-së që, në bashkëpunim me Berishën, bëri ndryshimin e Kushtetutës duke e forcuar rrezikshëm pushtetin e Kryeministrit në kurriz të pushteteve të tjera. Aktualisht institucionet janë të fosilizuara dhe nuk bëjnë dot arbitrin e paanshëm. Edhe për sa u takon zgjedhjeve…”

Stefani fut në analizë edhe sjelljen e elektoratit shqiptar dhe shkruan: “Kontribut në bashkimin aritmetik, por jo moral PS-LSI, ka edhe elektorati shqiptar që ndjek partitë dhe liderët si delet bariun dhe nuk reagon kur ata shkelin parimet e shpallura ose korruptohen. Ilir Meta nuk humbi elektorat as kur çoi te Berisha votat e marra nga e majta me premtimin për nxjerrjen e Berishës në pension. Berisha votohet në Gërdec edhe pas tragjedisë së Gërdecit. Ai votohet dhe në Shkodër, edhe pasi s’tregon asnjë dedikim për t’i shpëtuar shkodranët nga përmbytjet e përvitshme. Elektoratet kanë ngrirë, janë ngurtësuar… Rrjedhimisht që të përmbysësh Berishën, dhe bashkë me të edhe rrezikun e përjetësimit të autokratizmit, duhet që copën e elektoratit të majtë që i është bashkangjitur atij në vitin 2009, ta kthesh tek e majta. Por kjo nuk bëhet dot pa kthyer tek e majta Metën sado i diskredituar e i korruptuar të jetë ai. Delet nuk kthehen pa bariun. Prandaj dhe realizimi i rotacionit, në vend se i motivuar moralisht apo ideologjikisht, degradon në një aritmetikë cinike…”

Për Stefanin kjo është një situatë e përkohshme sidoqoftë:  “Do të duhen edhe disa vjet që në Shqipëri të ndodhë ajo që po ndodh me Beppe Grillon në Itali. Por për këtë duhet mbajtur i hapur shansi i demokracisë. Prandaj duhet të ikë Berisha!” – shkruan ai.

Stefani i plotë:

http://gazeta-shqip.com/lajme/2013/04/03/aleanca-ps-lsi-dhe-...