Arkiv-Lajme të përditësuara

Numri i fëmijëve që vdesin para se të mbushin moshën 5-vjeçare ka rënë në mënyrë të ndjeshme në 20 vitet e fundit. Këtë gjë e bën të ditur Unicef, sipas të cilit 6.9 milionë fëmijë në të gjithë botën kanë ndërruar jetë krahasuar me 12 milionë në vitin 1990. 

Gjykata Kushtetuese në Gjermani i ka hapur rrugën fondit të përhershëm për shpëtimin e eurozonës, që njihet ndryshe si Mekanizmi i Stabilitetit Europian, ESM. 

Por vendimi i marrë sot nga gjykata më e lartë gjermane vjen me një kushtëzim sa i përket kontributit që Gjermania mund të japë në këtë fond, kontribut i cili nuk mund të tejkalojë shifrën e 190 miliard euro. 

Greqia është përfshirë nga greva dhe protesta të gjera të punonjësve, që kundërshtojnë paketën e kursimit me vlerë 11.5 mild euro, e cila parashikon shkurtime të pagave e pensioneve. 

Në këmbë janë mësues, profesorë, mjekë, ushtarakë, të punësuarit e qeverisjes vendore, të hoteleve, sindikatat e invalidëve etj. 

Një shtetas amerikan u vra dhe një tjetër u plagos dje në Libi ndërsa një grup militantësh sulmoi konsullatën amerikane në Bengazi, gjatë një proteste kundër një filmi që ata thonë se fyen Islamin. Një turmë e zemëruar e mbledhur jashtë konsullatës i vuri zjarrin ndërtesës. Departamenti amerikan i Shtetit konfirmoi sulmin dhe tha se qeveria është duke punuar me libianët që të sigurojnë kompleksin.

Edicioni i dytë i Festivalit Ballkanik të Filmit dhe Kulinarisë u mbyll me sukses në Pogradec; duke sfiduar skeptikët që e mendonin si të vështirë këtë event, në një periudhë krize jo vetëm ekonomike, por edhe kulturore. 

Tre organizatoret: Fatos Baxhaku, Eno Milkani dhe Gerta Qurku dukeshin më të relaksuar këtë vit, ndërkohë që këtë vit, duket se prodhimet kroate ishin të një cilësie shumë më të mirë se filmat e vendeve të tjera. 

Kryeministri spanjoll, Mariano Rajoy përsëriti se Spanja nuk e ka vendosur ende nëse do të kërkojë ndihmë nga Evropa, por sipas tij, është e sigurt se në asnjë rast spanjollët nuk do të pranojnë t'u diktohet agjenda e shkurtimeve të kërkuara. Që nga muaji mars për Madridin është gati, një plan evropian prej 100 miliardë euro për të shpëtuar bankat iberike.

Në Shtetet e Bashkuara, anketat më të fundit tregojnë se të paktën për momentin, Presidenti Obama kryeson me pak diferencë në garën me rivalin e tij Mit Romney, ndërsa të dy kandidatët presidencialë hyjnë në 8-javëshin e fundit të fushatës presidenciale. 

Të dy kandidatët gëzonin mbështetje të barabartë pas përfundimit të Kuvendit të Republikanëve një javë më parë, por pasi zoti Obama pranoi emërimin e demokratëve për një mandat të dytë presidencial javën e kaluar, mbështetja për të u rrit.