Arkiv-Lajme të përditësuara

Kreu i Partisë Socialiste, Edi Rama menjëherë pas mbylljes së takimit mes partive të vogla për reformën zgjedhore e përshëndeti takimin, nëpërmjet një postimi të shkurtër në Twitter.

“E përshëndes takimin e partive të vogla dhe përsëris angazhimin e PS për një reformë gjithëpërfshirëse.”- shkruan Rama në Twitter.

Më herët gjatë ditës, krerët e partive të vogla ishin së bashku në një tryezë për të diskutuar reformën zgjedhore dhe qëndrimin që do të mbajnë ata.

Ndryshimi i klimës, gjatë viteve të fundit, ka bërë që vendi ynë të karakterizohet nga një dimër më i butë, pranverë më e ngrohtë, vjeshtë më e thatë dhe një verë e nxehtë.

Ndryshimi i temperaturave, i shoqëruar edhe me rritje të nivelit të detit pritet të sjellin  probleme në fushën e bujqësisë, por edhe në atë të turizmit. Ekspertët e Ministrisë së Mjedisit kanë saktësuar se nëse nuk do të investohet seriozisht gjatë 14 viteve të ardhshme  bujqësia do të jetë sektori më i prekur nga katastrofat natyrore.  

Kur e gjithë bota po kalon një situatë të pasigurtë ekonomike për shkak të krizës së borxheve që ka përfshirë eurozonën, Shqipëria është duke lundruar në një terr statistikor.

Instituti i Statistikave ka ngrirë prej disa muajsh publikimet për shumë nga treguesit më të rëndësishëm të ekonomisë, në bazë të të cilëve duhet të ndërtoheshin politikat e qeverisë për të përballuar krizën, duke shkelur të gjitha afatet ligjore.

Në një nga zonat më të varfra të kryeqytetit shqiptar, e mbiquajtur lagja e Kinostudios, jetojnë një numër i madh banorësh të komunitetit rom, egjiptian si dhe shqiptarë, pjesë e emigrimit të brendshëm gjatë tranzicionit.

Minibashkia numër katër e ka shumë të vështirë të përballojë varfërinë dhe problemet e shumta të lagjes me 64 mijë banorë, nga të cilët rreth 500 familje janë romë dhe egjiptianë.

Studiues të pavarur të ekonomisë shqiptare po shohin me skepticizem objektivat e qeverise në projekt-buxhetin e vitit të ardhshëm. Ata pohojnë se rritja ekonomike do të jetë minimale, dhe premtimet për investime janë pertej mundësive reale të ekonomisë shqiptare. Sipas analistëve, buxheti i ri do t'a ketë të vështirë të mbështetet fort në mbledhjen e taksave, apo tek privatizimet, ndërkohë që edhe investimet e huaja jane në rënie.

Qeveria pranon zyrtarisht se kriza ka rritur numrin e të varfëve në Shqipëri. Të dhënat zyrtare të Ministrisë së Punës tregojnë se numri i familjeve, që kanë nevojë për ndihmë ekonomike ka arritur në mbi 104 mijë, ose 7 mijë më shumë sesa ishte në 2010-ën.

Krahasuar me vitin 2008, përpara se të niste kriza, numri i familjeve në nevojë është rritur sipas të dhënave zyrtare me rreth 10 mijë e 700. Të varfërit janë shtresa që po goditet më fort nga kriza ekonomike, për shkak të strukturës së të ardhurave që kanë familjet shqiptare.

Socialistët do të votojnë kundër dekretit të Presidentit Bamir Topi për kandidaturën e Bujar Leskajt për vendin vakant të kryetarit të Kontrollit të Lartë të Shtetit.

Policia doganore në Qafë Thanë ka bllokuar gjatë ditës së sotme një kamion me pula, të cilat kanë qenë të sëmura.

Sipas burimeve të policisë, pulat e sëmura vinin nga fshati Veshesht në Maqedoni dhe kishin si destinacion qytetin e Elbasanit. Bëhet fjalë për një sasi prej 4.6 tonë pulash.

Pulat e sëmura që janë bllokuar nga ana e policisë, pritet që të groposen ditën e nesërme.

Tema.al

Pas forumit rinor, tashmë edhe aleanca e vajza dhe grave Kuq e Zi.  Aleanca ka njoftuar strukturën e vet më te re me kryetare të përkohshme Florentina Xhekën, e cila sipas AK është një  personalitet i njohur në botën e biznesit.

Në një prononcim për mediat, AK bën me dije se synon depolitizimin e familjeve dhe shoqërisë shqiptare. “Kuqezinjtë janë ndryshe nga forumet e partive politike”- thonë përfaqësues të AK.

Kriza e borxhit evropian është shtrirë, duke prekur së fundmi edhe Spanjen e Francën. Të dyja këto vende u detyruan të paguajnë më shumë për të financuar qeveritë e tyre.

Spanja, ekonomia e katërt më e madhe në Evropë, pagoi koston më të lartë të huasë që nga viti 1997 duke shitur gati 5 miliardë dollarë në bonde. Madridi u detyrua të paguajë gati 7 përqind interes, pika në të cilën borxhet e shumta qeveritare shtrenguan Greqinë, Irlandën e Portugalinë të siguronin ndihmë gjatë dy viteve të fundit.