Rreth 1800 kuqezinj protestojnë para Kryeministrisë

Rreth 1800 aktivistë të Aleancës Kuqezi, me parulla antiqeveritare, i janë drejtuar sheshit ‘Skëndërbej” mesditën e sotme, në protestën kundër Berishës. (Përllogaritja e përfërt e numrit të pjesëmarrësve u bë nga ResPublica.al me ndihmën e Google Earth Pro)

Kuqezinjtë me flamur dhe parulla i janë drejtuar Kryeministrisë, ndërkohë që kryeministri i vendit Sali Berisha nuk ndodhej në zyrë pasi sot u nis për në Azerbajxhan, ku do të marrë pjesë në Forumin Ekonomik Botëror, me temë “Dialogu strategjik mbi të ardhmen e Kaukazit Jugor dhe Azisë Qendrore”, që zhvillohet më 7-8 prill në kryeqytetin azer, Baku.

Kreu i Aleancës Kuq e Zi, i cili mori fjalën para protestuesve deklaroi para turmës se Kryeministri Sali Berisha sot është arratisur duke mos preferuar të qëndrojë në godinë. Spahiu tha se nëse Sali Berisha do të guxojë të kthehet pas kësaj arratisjeje atëherë Aleanca Kuqezi do të bëjë sërish miting proteste me 1 milion shqiptarë për ta larguar Berishën. “Ne i kemi premtuar shqiptarëve bashkimin kombëtar me referendum dhe do ta mbajmë premtimin tonë”, u shpreh Spahiu.

Nën thirrjet “policia është me ne” turma ka mbështetur Spahiun, i cili deklaroi se forcat e sigurisë nuk kishin se nga kush të mbroheshin pasi në shesh ka vetëm kuqezinj të cilët kërkojnë ti japin fund regjimit të Sali Berishës.

"Shqipëria mbi të gjitha është slogani ynë. Aleanca Kuq e Zi vjen si e vetmja alternativë opozitare, e cila përgjatë dy viteve nuk ka reshtur së denoncuari dhe demaskuari çdo aferë korruptive, kriminale dhe antishqiptare të kësaj klase politike krejtësisht antikombëtare", tha Spahiu.

Spahiu iu referua edhe viktimave të 21 janarit, të cilët humbën jetën pikërisht në të njëjtin vend proteste. “Ne sot, përulemi përpara sakrificës së tyre dhe familjeve që lanë pas”, u shpreh Spahiu.
Re.Pu.