Maxhoranca shkarkon Presidentin e Republikës

Maxhoranca ka votuar shkarkimin e presidentit Ilir Meta në seancën e ditës së sotme. Me 104 vota pro, 7 kundër dhe 2 abstenim, Kuvendi i Shqipërisë ka miratuar shkarkimin e kreut të shtetit, pak pasi në seancë u lexuan konkluzionet e raportit të komisionit të posaçëm që u ngrit për të pak javë më parë.

Largimin e Metës nga Presidenca, kur i mbeten edhe vetëm 8 muaj nga përfundimi i mandatit, tani e ka në dorë Gjykata Kushtetuese, e cila do të hetojë nëse gjetjet e Komisionit Hetimor për Metën përbëjnë shkelje të Kushtetutës. Komisioni Hetimor për hetimin e shkeljeve kushtetuese nga Presidenti i Republikës, nën drejtimin e deputetit socialist, Alket Hyseni, u ngrit pas zgjedhjeve të 25 prillit. Meta bëhet presidenti i parë në historinë e Shqipërisë që shkarkohet me votë nga deputetët e Parlamentit. Vetë kreu i shtetit e ka cilësuar të paligjshëm komisionin hetimor dhe rrjedhimisht edhe konkluzionet që çuan në votimin e sotëm.