Vettingu, opozita, Saliu, Rusia, Islami – fajtorët zyrtarë që bllokojnë e kërcënojnë Shqipërinë drejt BE-së

Kryeministri Edi Rama ka përsëritur për gazetën gjermane “Frankfurter Allgemeiner Zeitung” se integrimi i Ballkanit në BE siguron stabilitet për vetë unionin. Ai ka folur për rrezikun rus dhe atë të isalmit radikal, njësoj si një ditë më parë.

Nëse duam të kemi një BE të sigurt dhe të qëndrueshme, nuk është mirë që të krijohen vrima. Përveç kësaj, nuk do të harrojmë se ka aktorë të tretë, që po luajnë lojën e tyre dhe që mund të përfitojnë nëse BE lë një vakuum këtu. Po flas për Rusinë, por po flas edhe për Islamin Radikal

shtoi Rama, raporton “Syri.net”.

Sa i përket Shqipërisë nuk ka asnjë raport që të cilësojë se Islami radikal kërcënon politikisht, apo ka ambicie për pushtet e të devijojë orientimin strategjik. Po kështu Rusia është një vend i përjashtuar në shumë drejtime; mjafton të kujtohet se prej dekadash nuk ka një shkëmbim vizitash të nivelit të lartë, as edhe formacione politike që janë të afiluara me Moskën nuk ka.

Nëse Edi Rama e ka fjalën për vende të tjera fqinje, kjo është punë e tyre dhe Shqipëria nuk ka as këllqe e as fuqi të ndikojë. Ndaj Tiranës zyrtare kemi parë të ketë ankesa për nacionalizmin e saj, e deri diku për një marrëdhënie preferenciale me përfaqësuesin më eminent të Islamit Politik, presidentin turk Erdogan. Ndaj këto insinuata janë lypje publike për një sinjal pozitiv për hapjen e negociatave duke u hakërryer majtas e djathtas pa asnjë ide.

Vetëm dy ditë më parë Kryeministri bënte fajtor opozitën për bllokimin e negociatave, fliste për vettingun e njollosje të imazhit. Sot flet për Rusinë dhe Islamin, ndonëse në një kontekst më të gjerë.

Parimisht kritika ndaj BE-së nuk qëndron: vetëm sot, në Varashavë, në takimin e Vishegradit, Përfaqësuesja e Lartë e BE-së, Federica Mogherini, njohu progresin e vendeve të Ballkanit Perëndimor duke shtuar se progresi i tyre drejt anëtaësimit është i pakthyeshëm dhe madje ka dhënë edhe një datë për anëtaërsim: 3 vjet që tani. Po kështu në këtë takim është krijuar edhe grupi i mbrojtjes dhe lobimit për integrimin e Ballkanit Perëndimor, që e sintetizon më mirë energjinë në këtë drejtim.

https://europeanwesternbalkans.com/2016/11/30/mogherini-wants-to-see-irr...

Nuk është e qartë pra se ku shfaqen e zhduken këta armiq, të cilët përpara se të marrin vërtet rol strategjik në këtë drejtim duhet të kenë siguruar si premisë paaftësinë e shteteve si Shqipëria për të kapur disa standarde. Dhe këtu kryeministri ka detyrimin e një përgjigjeje:

a është gati Shqipëria për të fituar atë që pretendohet nga kjo qeveri? Apo ka punë për të bërë?

Një analizë e drejtë e kësaj situate – që do të jepet në dhjetor – e zhbën këtë diversion të vockël që prodhohet nga mistrecë ballkanikë.

Në fund dhe jo pa rëndësi është edhe vendimi i BE-së për të ngrirë negociatat me Turqinë, për shkak të standardeve. Dhe Turqia vlen shumë më tepër sesa disa vende të pashërueshme si këto të rajonit tonë. Atëherë kur Shqipëria u paragjykua për shkak të ndikimit të disa nacionalistëve, pra dy vjet më parë, argumentimini Ramës bënte sens – sot është thjesht alibia e atij që do të kapet pas fijes së barit

rama