bota

Parlamenti turk ka ratifikuar anëtarësimin e Suedisë në NATO, duke i dhënë fund negociatave 20 mujore mes Ankarasë dhe Stokholmit.

Kandidatura suedeze, e cila tani kërkon vetëm dritën jeshile të Hungarisë, u miratua me një shumicë dërrmuese.

Në Gjermani, e djathta ekstreme ka hedhur për herë të parë idenë e largimit të vendit nga BE-ja. Liderja e Alternativës së djathtë për Gjermaninë (AfD), Alice Weidel, i tha Financial Times se nëse vjen në pushtet, gjermanëve do ju jepet mundësia të vendosin me referendum nëse do të rrinë apo jo në Bashkimin Europian.

Opsioni i referendumit, sipas saj, do t’u jepej gjermanëve në rast se qeveria e AfD nuk do të mund të siguronte reforma për të frenuar vendimmarrjen e Komisionit Evropian "të pazgjedhur".

Onnor Leahy është njëri prej zërave që kanë kërkuar prej kohësh rregullimin e inteligjencës artificiale. Ai është CEO i Conjecture, një kompani e sigurisë së AI.

Njeriu që ka paralajmëruar disa herë se AI ka hyrë në një trajektore që mund t’i japë kontrollin e njerëzimit, ai foli në takimin vjetor të Forumit Ekonomik Botëror në Davos, Zvicër, ku elita e globit mblidhet çdo fillim viti për të diskutuar mbi rreziqet me të cilat përballet planeti.

Ministri francez i Mbrojtjes pranoi përfshirjen e disa shtetasve francezë në radhët e ushtrisë ukrainase, por shtoi se shteti nuk mund të bëjë asgjë për t’i ndaluar. Deklarata e Sebastien Lecornu hedh poshtë një të tillë të mëparshme nga Ministria e Jashtme, sipas të cilës Parisi nuk ka mercenarë në Kiev dhe askund tjetër.

Vladimir Putin mund të sulmojë aleancën ushtarake të NATO-s në më pak se një dekadë, paralajmëron ministri gjerman i Mbrojtjes, Boris Pistorius.

"Ne dëgjojmë kërcënime nga Kremlini pothuajse çdo ditë ... kështu që duhet të kemi parasysh se Vladimir Putin mund të sulmojë edhe një vend të NATO-s një ditë," i tha Pistorius gazetës gjermane Der Tagesspiegel..

Gjykata më e lartë e Polonisë e cilësoi antikushtetues vendimin e kryeministrit të ri polak për të shkarkuar drejtuesit e televizionit, radios dhe agjencisë shtetërore të lajmeve, vetëm pak ditë pasi mori drejtimin e qeverisë.

Që kur drejtimin e qeverisë në Tajlandë e mori Srettha Thavisin, lufta kundër marijuanës ka qenë kryefjala e fjalimeve të saj. Ligji i miratuar një vit më parë, i cili liberalizoi përdorimin e marijuanës, ka gjasa të anulohet. Pheu Thai, partia në pushtet, ka paraqitur një projektligj për të ndaluar përdorimin rekreativ të kanabisit, duke e kufizuar atë vetëm te përdorimi mjekësor.

Senati amerikan hodhi poshtë nismën e Bernie Sanders, e cila parashikon mbështetjen ushtarake ose jo ndaj Izraelit, në varësi të konstatimit nëse po shkelen të drejtat e njeriut apo ligjet ndërkombëtare në Gaza.

Vetëm 11 senatorë e mbështetën propozimin e Sanders, ndërsa 72 të tjerë votuan kundër.

Edhe pse rezoluta u hodh poshtë lehtësisht, ajo përbën një test që reflekton mosmarrëveshjet mes demokratëve amerikanë për mbështetjen e Izraelit.

Kryeministri i ri i Luksemburgut, Luc Frieden, ka një plan për ta shpëtuar BE-në nga Viktor Orban, një dhimbje koke për Brukselin gjatë mandateve të tij qeverisëse në Hungari.

Frieden shpreson të ndërtojë ura të reja midis vendeve anëtare – mes të cilave edhe Hungaria.

Pavarësisht krizës në shumë rajone të botës, më të pasurit vijojnë të shtojnë pasuritë e tyre. Sipas një raporti të Oxfam, pesë njerëzit më të pasur në botë e kanë dyfishuar pasurinë e tyre që nga viti 2020. Pasuria e tyre është rritur me 114% në një total prej 869 miliardë dollarësh, pas marrjes në konsideratë të inflacionit, sipas raportit vjetor të pabarazisë të Oxfam. Nëse trendet aktuale vazhdojnë, bota mund të ketë trilionerin e parë brenda dekadës.