Lajme

Komisioni Qendror i Zgjedhjeve ka rrëzuar sot kërkesën e Lëvizjes Socialiste për Integrim për shpalljen të pavlefshme të zgjedhjeve në Vorë. Kërkesa u rrëzua me katër vota kundër, konkretisht të Lefteri Luzit, Klement Zgurit, Hysen Osmanajt dhe Vera Shtjefnit. Pro kërkesës kanë votuar anëtarët e majtë në komision, Denar Biba, Gëzim Veleshnja dhe Edlira Jorgaqi. Bie në sy vota e kryetares së KQZ-së, Lefteri Luzi, e cila së fundmi është përfolur nga disa media se ka “ndryshuar krah”, nisur nga fakti se ajo është propozim i PD-së.
s.z

Andrea Stefani shkruan sot një shënim te “Dita” ku merret gjatë me mbështetjen ndërkombëtare që disa konservatorë europianë i japin tezave të tij. Stefani del në konkluzionin se kjo mbështetje buron nga korrupsioni. “Enigma që këmbëngul është: Çfarë i bën Grosruck, Dol e të tjerë si Brok, avokatë të qëndrueshëm dhe afatgjatë të Berishës edhe pse faktet tregonin dhe tregojnë se ai ishte dhe mbetet një autokrat i rrezikshëm për demokracinë dhe lirinë në Shqipëri? Sado të përpiqesh, një qëndrim i tillë mund të kuptohet vetëm me shkaqe korruptive”, shkruan Stefani.

Sot në seancë plenare është folur për zgjedhjet e 21 qershorit, për rezultatin, por edhe për problemin. Astrit Patozi, deputet i Partisë Demokratike, ka deklaruar në fjalën e tij se opozita i humbi zgjedhjet, madje me “rezultat përvëlues”, por askush nuk ka fituar. “Mazhoranca nuk po di t’u gëzohet numrave”, tha ai, për të cekur ndër të tjera edhe “dukurinë LSI”, me të cilën po konsumon një përballje gati personale në Vorë. “LSI ishte thithlopa e këtyre zgjedhjeve, pavarësisht se kryetari i saj bën sikur është merzitur me aleatin e tij te madh, te cilin pak nga pak po e barazon ne permasa.

Duket se ditët deri në referendumin e Greqisë, janë vendimtare për fqinjin tonë jugor, por me një ndikim të madh edhe në planin europian. Të gjitha palët po bëjnë presion në funksion të opsioneve që mbrojnë, e që do të zgjidhen nga një votë popullore e së djelës. Ish-kryeministri i djathtë, Konstantin Kramanlis deklaroi se do të duhet një “po” për kërkesat e Trojkës, teksa ish-komandanti suprem i Forcave të NATO-në Europë, James Stavridis, shkruan në një artikull në “Foreign Policy” se dalja e Greqisë nga Eurozona, do të ketë pasoja të mëdha.

Këshilli Drejtues i Radio Televizionit Shqiptar nuk arriti as në raundin e dytë që të zgjedhë një drejtor. Në votimin e kryer sot, Thoma Gëllçi mori 6 vota, kurse Petrit Malaj mori 5 vota. Që një kandidat të zgjidhet drejtor nevojiten 7 vota, mirëpo një kuotë të tillë nuk e mori asnjë prej dy kandidatëve as herën e parë, para një jave. Për këtë arsye Këshilli Drejtues ka shtyrë votimin, në të cilën janë paraqitur 16 kandidatura.
s.z

Çështja e Gjykatës Speciale, e refuzuar së fundmi në Parlamentin e Kosovës, po krijon kushtet për një debat të gjerë rreth luftës së vitit 1999. Në përgjithësi qëndrimi ndaj luftëtarëve është i tillë që kërkon të mos shohë edhe mangësi, defekte, qëllime politike, pragmatizëm, por edhe krime. Ndodhi kështu edhe në Kosovë, kur nëse flitet për krime nga UÇK, reagimi ngrihet si akuzë për shërbim ndaj serbëve, ose përbaltje e luftës. Enver Robelli shkruan sot një opinion në “Koha Ditore” ku flet pikërisht për temë, duke vënë gishtin në plagë.

Në një reportazh për “A1 Report”, realizuar nga gazetari Carlo Bonino, kreu i zgjedhur i Bashkisë Tiranë, Erion Veliaj ka bërë të ditur se ato që tha gjatë fushatës nuk do jenë thjesht premtime elektorale, por angazhime konkrete që do synojë t’i bëjë realitet gjatë mandatit të tij si kryebashkiak i kryeqytetit. Ai ka konfirmuar projektet e tij për Bulevardin e ri sipas projektit fillestar, kthimin e stacionit të trenit brenda qytetit, krijimin e tri terminaleve të autobusëve të rretheve, dyfishim të linjave të autobusëve, realizimin e një studimi për qendrën e Tiranës.

“Gazeta Shqiptare” thotë se ministri i Financave, Shkëlqim Cani ka firmosur një urdhrin për mbylljen e llogarive të njësive të qeverisjes vendore që do të shkrihen nga reforma territoriale. E për rrjedhojë, rreth 6200 persona mbeten pa punë dhe buxhetit të shtetit i kursehen rreth 6 miliardë lekë. Sipas “Gazeta Shqiptare” të larguar nga puna janë 4900 këshilltarë, të cilët paguheshin me 10% të pagës së kryetarit të Njësisë së Qeverisjes Vendore dhe rreth 1250 punonjës administrate.

Banka e Shqipërisë ju ka ndaluar bankave shqiptare të zhvendosin kapitale drejt Greqisë, si një masë parandaluese në përgjigje të zhvillimeve negative të muajve të fundit. Në “Tv Scan”, Guvernatori Gent Sejko, tha se ekspozimet e sistemit bankar në Greqi janë në vlera të papërfillshme, ndaj bankat shqiptare nuk do të kenë ndonjë ndikim të drejtpërdrejtë, pavarësisht nga çfarë ndodh në vendin fqinj. Nga ana tjetër, sipas Guvernatorit, megjithatë ritmet e rritjes ekonomike të Shqipërisë do të ndikohen ndjeshëm nga situata ekonomike në Greqi.

Princi saudit Alwaleed bin Talal ka deklaruar se do të japë për bamirësi 32 miliardë dollarë. Kjo është e gjithë pasuria e tij. Prince Alwaleed është 60 vjeç dhe hyn te njerëzit më të pasur në botë. Deklarimin bin Talal e ka bërë në muajin e Ramazanit, ku edhe myslimanët duhet të japin diçka për bamirësi. Princi thotë se është frymëzuar nga Fondacioni “Gates” dhe se përmes këtij donacioni synohet të përmirësohet mirëkuptimi mes kulturave, të rritet roli i femrës, apo të lehtësohen pasojat e katastrofave natyrore. Donacioni do të jepet në disa vite dhe do të mbikëqyret nga një bord.