Lajme

Duke renditur një sërë ngjarjesh të ditëve e orëve të fundit, PD ka akuzuar sot kryeministrin Rama se u servir qytetarëve propagandë dhe fasadë politike për arritje e suksese në fushën e rendit, ndërkohë që pasiguria e qytetarëve po kap majat dhe kriminaliteti është konsoliduar në rrugë e në zyrat e shtetit. Deklaratën për mediat e bëri sekretari i përgjithshëm Ristani, sipas të cilit po bëhet  “propagandë e pështirë, por asnjë përgjigje për skandalin e fshehjes së kërkesës së Interpolit për ekstradimin e deputetit Mark Frroku, aleatit të Edi Ramës.

Gjendja brenda BDI-së së Ali Ahmetit duket se ka arritur në një fazë të tillë shpërbërjeje saqë vrasjet e funksionarëve të saj së fundmi, po përgëzohen edhe nga vetë eksponentë të partisë. Faktikisht, “çudinë” e ka bërë Ibrahim Kelmendi, këshilltar i kreut të BDI Ali Ahmeti, një veteran I luftës së Kosovës dhe lëvizjes çlirimtare. Kelmendi ka habitur të gjithë në një postim në “Facebook” për vrasjen e Artan Musliut nga Struga, me emër tjetër Argëtim Asani. Musliu konsiderohej njeri i afërt me zv/kryeministrin Musa Xhaferi, dhe njihej si biznesmen në Strugë.

Rexhep Meidani kërkon nga kryetari i Partisë Socialiste që të respektojë statutin e partisë. Në një intervistë për gazetën “Panorama”, Ish­presidenti i Republikës shpreh habi se si senatorët e PS nuk e kanë kërkuar zbatimin e statutit. Duke analizuar zgjedhjet e fundit vendore, ish-presidenti e sheh rezultatin e maxhorancës si produkt të një operacioni për shumimin e votës përmes zgjerimit të koalicionit zgjedhor, ndërsa rezultatin e opozitës e cilëson një humbje të rëndë.

Kёrkesat pբzil nga ana e e shqiptarёve, kosovarёve e malazezёve nuk kanё shanse pёr njohjen e statusit. “Deutsche Welle” raporton se e ngarkuara e qeverisё federale pёr migracionin, Aydan Özoguz (SPD) i bёri thirrje partisё kristinsociale (CSU), qё tё heqё dorё nga nxitja e frymёs kundёr refugjatёve. Nё sfondin e rritjes sё vazhdueshme tё numrit tё refugjatёve nga vendet e Ballkanit Perёndimor kryeministri i Bavarisё Horst Seehofer (CSU) u shpreh se po "abuzohet me azilimin" dhe shpalli "masa mё rigoroze".

Sot u raportua për një skandal financiar në Partinë Demokratike. Një specialist i zyrës së Organizimit, Florian Xhuti, ka përfituar fondet e derdhura për kartat e reja të anëtarësisë. Bëhet fjalë për një fond të akumuluar prej 250 milionë lekësh për 50 mijë tesera anëtarësie. Xhuti thuhet se përgjigjej për pagesat dhe duket se një pjesë të mirë i ka futur në xhepin e vet. Mediat raportojnë se për këtë skandal është informuar në rrugë zyrtare edhe kryetari i ri i PD-së, Lulzim Basha. Sot PD-ja nuk e ka përgënjeshtruar lajmin, çka lë të kuptohet se ai është i vërtetë.

Siç ishte paralajmëruar, tarifa e furnizimit me ujë pritet të ndryshojë. Por në ndryshim nga vendimi për çmimin e energjisë, ose ndoshta për shkak të reagimit ndaj atij vendimi, është gjykuar që kësaj radhe të merret mendimi i konsumatorëve.

“JavaNews” raporton një sot se një dukuri e re paska marrë udhë në Shqipëri. Dukuri e cila ka “alarmuar” Policinë e Shtetit, të drejtuar nga Saimir Tahiri. Dukuria është kjo: “Fillimisht personat blejnë një numër celulari në treg të zi dhe i dërgojnë mesazhe kërcënuese numrave të tyre personal. Me ardhjen e këtyre mesazheve, ata bëjnë kallëzim në polici se ndihen të kërcënuar dhe disa ditë më vonë ose edhe muaj, sajojnë vendosjen e eksplozivit në makinë, në derë të apartamentit apo hyrje të banesave private.

Mazhoranca ka dalë sërish zbuluar në përpjekjen e saj për të penguar hetimin parlamentar të kërkuar nga opozita për implikimin e strukturave shtetërore në trafikun e drogës, menjëherë pas rënies së avionit në Divjakë. Përmes vendimit prej 16 faqesh të marrë në 23 korrik, gjyqtarët vlerësuan se vullneti i maxhorancës për të mos pranuar ngritjen e komisionit ishte i pabazuar.

Ndërmarrja “Ujësjellës Kanalizime Tiranë” njofton qytetarët se kufizimet në furnizimin me ujë të pijshëm, po ndodhin për shkak të thatësirës së madhe. “Prurjet në ujëmbledhës kanë rënë”, njofton UKT që shton se konsumi është rritur. Kufizimet janë në disa zona të Tiranës dhe mund të imagjinohet lehtë se çfarë do të thotë të mos kesh ujë në shtëpi në këto kohë. UKT njofton se kufizimet nuk kanë lidhje me remontin e Operatorit të Sistemit të Shpërndarjes, pra me furnizimin me energji të sistemit.

Me një vendim të datës 3 korrik 2015, hotel “Tirana” ka dalë nga lista e objekteve nën mbrojtje. Deri  para këtij vendimi, prej vitit 2000, ky hotel ishte i shpallur monument kulture i kategorisë së dytë, si pjesë e qendrës historike. “Gazeta Shqiptare” raporton se vendimi është marrë nga Këshilli Kombëtar i Restaurimit pranë Ministrisë së Kulturës. Në relacionin që shoqëron vendimin, sqarohet se monumenti nxirret nga lista dhe si rrjedhojë nuk është më monument dhe as nuk gëzon mbrojtjen e shtetit, për arsye se nuk ka as vlera historike dhe as arkitektonike.