Bota

Situata e tensionuar në Egjipt ka bërë që forcat egjiptiane të sigurisë të vrasin gabimisht 12 persona, midis tyre edhe turistë meksikanë. Në momentin që u qëlluan ata ishin duke udhëtuar në katër automjete të ndryshme në perëndim të shkretëtirës egjiptiane. Sipas zëdhënësit të ministrisë egjiptiane të Turizmit, kjo ishte një zonë e ndaluar për turistët për shkak të rritjes së aktivitetit terrorist, ndërsa makinat nuk ishin të licensuara dhe të njohura nga autoritetet.

Një numër prej 19 000 refugjatësh në total kanë mbërritur në qytetin jugor gjerman, Mynih me tren gjatë fundjavës, njoftoi qeveria lokale. “Rreth 7 100 kanë prekur Mynihun të dielën, pasi më shumë se 12 000 mbërritën të shtunën”, deklaroi zëdhënësja e qeverisë bavareze.

Kriza e refugjatëve po ndryshon shumë shpejt atë që Europa e arriti më vështirësi të madhe: lëvizjen e lirë. Krijimin e një hapësire të përbashkët. Mediat e shumta europiane raportojnë se për shkak të numrit të madh të refugjatëve, Gjermania ka vendosur të rikthejë kontrollin në kufi me Austrinë. Britanikja “The Telegraph” raporton se sot në mbrëmje, ministri i Brendshëm gjerman, Thomas de Maziere, domtë njoftojë rikthimin e kontrollit të pasaportave në kufi. Ndërkohë probleme paraqet edhe menaxhimi i situatës së brendshme.

Kryetari i Partisë Ardhmëri për Kosovën, Ramush Haradinaj, thotë për "Tema Tv" se procesi i demarkacionit kufitar me Malin e Zi mund të çojë realisht në humbje territori për Kosovën. Ai ka shpjeguar edhe incidentet në Komisionin Parlamentar për Politikë te Jashtme. "Rasti i fundit ishte ofendim direkt, kur u provua të kalohej në Komisionin për Politikën e Jashtme një raport i komprometuar, i një zyrtari të komprometuar për kufirin. Bazuar në këtë raport Kosova mund të humbë mbi 12 mijë hektarë territor.

Numri i emigrantëve që kanë hyrë në Hungari nga Serbia ka arritur një rekord të ri, gjatë të së 13 shtatorit. Më shumë se 4 mijë njerëz kaluan në këmbë kufirin nga Serbia, pikërisht në çastin që autoritetet hungareze po përfundonin përgatitjet për bllokimin e kufijve. Europa është duke luftuar me përballjen e një fluksi të madh njerëzish, kryesisht nga Siria që përpiqen t’i largohen dhunës dhe varfërisë. Hungaria është kritikuar për mënyrën se si ajo po merret me ata që kalojnë kufirin. Zyrtarët vlerësojnë se 175 mijë emigrantë kanë kaluar nga Serbia në Hungari deri tani gjatë këtij viti.

Foreign Affairs i ka kushtuar një shkrim tensioneve mes Europës dhe ShBA-së, të cilat sa vijnë e po shfaqen si pjesë e pandarë e marrëdhënieve mes dy anëve të Atlantikut. Konrad H. Jarausch i mëshon idesë se dallimet mes të dyja poleve të botës Perëndimore, burojnë nga diversifikimi i përvojave të tyre historike, që po prevalon ndaj së përbashkëtës që është referimi ideologjik ndaj të njëjtave vlera.

Ditët e fundit ka pasur një rrjedhje të raporteve të detajuara rreth një përshkallëzimi të veprimtarisë ushtarake ruse në Siri. Një investigim i bërë nga Reuters, siç citojnë burimet libaneze, bën me dije se trupat ruse kishin filluar të merrnin pjesë në operacionet, në mbështetje të forcave të regjimit sirian, një aleat i vjetër i Moskës. Zyrtarët amerikanë treguan se dy aeroplanmbajtëse, avionë dhe këmbësoria e forcave detare kishte arritur në Siri këtë javë.

Agjencia Ndërkombëtare e Energjisë njoftoi se rënia e çmimit të naftës do të ulë prodhimin rus dhe amerikan gjatë vitit 2016. Kjo do të shkaktojë rënien më të rëndësishme të furnizuesve të naftës, që nuk janë pjesë e OPEC-ut. Një rënie 6-vjeçare e çmimeve të naftës do të shtyjë furnizuesit joanëtarë të OPEC-ut të ofrojnë më poshtë se 0,5 milionë fuçi në ditë duke ulur prodhimin e përgjithshëm deri në 57,7 milionë fuçi në ditë, bëri të ditur Agjencia e Energjisë në daljen e saj mujore.

Ligjvënsësit në Kaliforni të Shteteve të Bashkuara të Amerikës kanë miratuar së fundmi një ligj që legalizon vetëvrasjen e asistuar të të sëmurëve terminalë. Ligji u lejon të sëmurëve, të aftë mendërisht, për të cilët dy doktorë bien dakord zyrtarisht, se kanë vetëë 6 muaj jetë, të kërkojnë recetën për dhënien fund të jetës. Akti është kundërshtuar nga grupet fetare, përfaqësues katolikë sidomos, që mbajnë përherë qëndrime kundër ndërhyrjes njerëzore në ndërprerjen e procesit jetësor. Fjala e fundit i takon Guvernatorit Jerry Brown që mund ta aprovojë, ose të vërë veton.