Giovanni Sartori: Të zgjedhurit në parlament përfaqësojnë kombin, jo partinë apo boss-in e partisë

Giovanni Sartori i kthehet dhe njëherë shqetësimit lidhur me marrëdhënien mes parlamentarëve dhe partisë që ata përfaqësojnë. I kthehet sot në një shkrim me titull “Liria e të zgjedhurve”, të publikuar në il Corriere della Sera. Është një shqetësim që i është krijuar nga praktika e re e stilit “Grillo”. Ky i fundit, në një formë a në një tjetër, pengon deputetët e lëvizjes së vet që të kenë opinione e qëndrime individuale. Ai i ndalon të shfaqen nëpër media, që të intervistohen nga gazetarë, e që të distancohen nga qëndrimet e Lëvizjes që, në fakt, janë qëndrime të tijat e të krahut të tij të djathtë, Casaleggio-s.

Sartori ri-nënvizon që, qysh nga kohët e Revolucionit Francez, i zgjedhuri në parlament përfaqëson kombin, me fjalë të tjera vetveten, e jo partinë. Kjo e drejtë gjendet e sanksionuar në gjithë kushtetutat e shekullit të XIX e XX. Nëse nuk njihet kjo e drejtë, atëherë kthehemi prapa në kohë, kthehemi në praktikat e përfaqësimit mesjetar, ku përfaqësuesit ishin thjesht emisarë e zëdhënës të padronëve e zotërinjve.

Grillo dhe guruja e tij (kështu e quan Sartori Casaleggio-n) nuk marrin vesh nga kjo punë, por kjo nuk i justifikon.

Re.Pu.