Dy kartolina nga “The Economist”

“Një tjetër lajm i hidhur për shqiptarët”, kështu e hap statusin e vet në Facebook ish-kryeministri i vendit Sali Berisha. Cili është lajmi i hidhur? Lajmi i hidhur është se revista e majtë më e famshme “The Economist”, ka parashikuar protesta në Shqipëri në vitin 2014. “Të dashur miq, revista e majtë më e famshme e planetit "The Economist" iu dërgoi shqiptarëve një kartolinë të hidhur për festat e fundvitit. Ajo parashikon shqiptarët në protesta gjatë muajve që vijnë dhe paralajmëron destabilizim të vendit”, shkruan Berisha. Nuk kuptohet se përse është lajm i hidhur ky, kur vetë Berisha ka disa javë që bën thirrje për protesta? Madje mund të thuhet se kjo e “The Economist” është kartolina më e bukur për ish-kryeministrin e vendit. Po pse ka parashikuar kështu revista më e famshme e majtë? Përgjigjen ajo nuk e ka dhënë, por nuk ka problem, sepse ish-kryeministri e ka një shpjegim. Ja se cili është ai: “1-Në zhgënjimin e qytetarëve shqiptarë nga premtimet elektorale të provuara mashtrime të Edi Ramës për kujdes shëndetësor, legalizime falas, heqjen e TVSH-së për ushqimet dhe energjinë, uljen e taksave për 97% te shqiptarëve; 2- Rritjen e taksave dhe rritjen e madhe të borxhit publik që do të shoqërohet me: 3- rritjen e shpejtë të varfërisë dhe papunësisë dhe uljen e të ardhurave; 4- bllokimin e procesit të integrimit nga qeveria Rama - Meta si rezultat i dhunimit të Kushtetutës, ligjeve, vendimeve të gjykatave me vendime qeverie”. Kur i lexon kështu i thua vetes: “Të zestë ne!”, por shpresën na e jep politika shqiptare vetë, se e përjeton opozitarizmin vetëm me vizione apokaliptike. E si të tilla deklaratave të ngjashme u duhet bërë një zbritje e madhe, njësoj siç duhet bërë zbritja, madje pjesëtimi, për premtimet elektorale.

s.z