Sarandë, gjykata gjobit gazetarin se nuk përmendi gjithë profesionet dhe dekoratat e paditësit!

Vendimi i Gjykatës së Sarandës duke dënuar me gjobë prej 150 mijë lekësh të reja gazetarin e GSH Thoma Nika, mund të duket i pranueshëm nëse dikush mendon se bëhet fjalë për shpifje, shpikje lajmi të paqenë, komente që ulin dinjitetin e të prekurit gjatë raportimit etj. Por lajmi që Nika ka publikuar në gazetë (i botuar dhe raportuar njësoj në shumë gazeta e tv), flet për një ngjarje të ndodhur më 9 mars të këtij viti, për një shpërthim me tritol në automjetin tip "Fuoristradë" të ish-shefit të Urbanistikës së Sarandës, Haxhi Musaj. Ngjarja pranohet nga të gjitha palët, por gjykatës nuk i pëlqen mënyra si është shkruar lajmi. GSH thotë se lajmi i botuar ka qenë shumë korrekt në çdo element të tij, referuar ngjarjes së ndodhur dhe komunikatës zyrtare të policisë. Por i dëmtuari nga tritoli, ka pretenduar se është dëmtuar shumë më tepër nga kronika e GSH-së dhe ngre padi ndaj Nikës, gjithashtu sarandiot. Thelbi i padisë është: Haxhi Musaj e quan dëmtim dinjiteti pse është cilësuar ish-shef Urbanistike, ndërkohë që ka mbajtur edhe detyra të tjera, madje edhe është dekoruar për punët e tij. Dhe tjetra: Paditësi konteston shprehjen "ka pasur punë me drejtësinë", ndërkohë që pranon se ka qenë në një proces gjyqësor vite me parë. Pas gjashtë muajsh maratone gjyqësore (ku gjyqtari i mëparshëm ka dashur ta mbyllë dosjen për mungesë elementësh), gjyqtarja G.Xhelili ka vendosur për gjobën!

a.k