Nafta, t’i “bësh naftën”! Kryeministri Rama kërkon të bindë shqiptarët t’u japin këmbëve për…”të shijuar gjelbërimin”!...

Ka mjaftuar vetëm një fjalë dhe në të gjitha pikat e karburantit nafta është rritur 5 lekë për liter më shtrenjtë. Ministri i Ekonomisë, Arben Ahmetaj tha se çmimi nuk do i prekë qytetarët, por të gjithë e dimë se sa shumë spekulohet në këtë fushë. Çmimi i naftës lëviz me një deklaratë në media, ndërkohë që cilësia dhe sasia që marrin shqiptarët është gjithmonë e dyshimtë. Pavarësisht se qëllimi i rritjes së akcizës duket i mirë, çmimi i naftës ka frikësuar thuajse çdo shqiptar.

Rritja e çmimit të naftës do prekë ata njerëz që e përballojnë mbajtjen e një makine, duke dekurajuar ata që lëvizin për qejf me makina në bulevard.

“Është një taksë që dekurajon lëvizjen me makinë dhe nxit lëvizjen alternative. E bën gjithë bota e qytetëruar. Është e domosdoshme, sepse me të ardhurat e saj do të shtohen financimet për të rritur përmasën e gjelbër të vendit tonë, për të zgjeruar mushkëritë e vendit tonë dhe për të përmirësuar shërbimet shëndetësore në vend,” tha Rama.

Kryeministri Edi Rama tha se shumica e shqiptarëve bëjnë edhe 500 metra me makinë, por ai duhet ta bazojë të gjithë këtë arsyetim mbi të dhëna konkrete, për të thënë realisht se sa përqind e njerëzve që lëvizin me makina e kanë këtë të nevojshme në një qytet me trafik publik në nivele mizerabël dhe me një sistem parkimesh katastrofikë.

Zh.