Ceremoni festive për 100-ditëshin e qeverisë Rama, në panele ministrat prezantojnë punën, natyrisht, vetëm suksese!

Më 22 dhjetor, pasnesër, kryeministri, Edi Rama bashkë me ministrat e tij do të paraqesin punën e tyre në 100 ditët e para të qeverisjes. Megjithëse nuk është bërë ende publike, zbardhet një pjesë të axhendës të këtij aktiviteti, i cili nis të dielën paradite dhe pritet të zgjasë rreth 4 orë. Gjatë prezantimit do të jenë të pranishëm të gjithë ministrat e kabinetit “Rama”, të cilët do të prezantojnë punën e bërë gjatë këtyre 100 ditëve që kanë qenë në detyrë.  Për këtë arsye, do të prezantohet me minidokumentar me historinë e qeverisë, nga dita e parë në atë të 100, me personazhe nga dikasteret e rëndësishme të Këshillit të Ministrave. Katër panelet që do të jenë për këtë qëllim, do të drejtohen nga zv.kryeminsitri Niko Peleshi. Në fokus të qeverisë gjatë 100 ditëve janë, përmirësimi i komunikimit me publikun, lufta ndaj korrupsionit, promovimi i Shqipërisë në botë si dhe zhvillimi ekonomik i vendit. Gjithashtu do të ketë edhe një koncert, nga një kor i fëmijëve të Liceut Artistik të Tiranës. Prezantimi i punës së 100 ditëve të para të qeverisë do të nisë në orën 10:30 dhe do të vazhdojë për 4 orë.  

Siç shihet 100-ditëshi është parashikuar në detaje, do të raportojnë dhe flasin ministrat, natyrisht me autolëvdata, po populli kur do të flasë  për këto 100 ditë?!...

Zh.