Policia ushtron dhunë në stadium. “Tifozët kanë thirrur kundër Berishës”, thuhet në A1 Report

Shqipi i sotëm, në kronikën sportive, flet për ndeshjen mes Tiranës e Skënderbeut (1-0), dhe fokusohet tek dhuna e ushtruar nga policia ndaj një numri tifozësh të Tiranës. Dhuna ka qenë e  shpërpjestimuar, dhe është shoqëruar me ndalime të shumë tifozëve të një grupimi me emrin ‘Tirona Fanatics’. Në gjeratoren e dhunës ka përfunduar dhe një operator i Top-channelit që ka kërkuar të filmojë atë që po ndodhte si në stadium, ashtu dhe para komisariatit nr. 1. Sipas Shqipit, ka qenë zv. shefi i komisariatit nr. 1, Erzen Breçani personi që ka ushtruar dhunë mbi operatorin.

Nuk jepen motivet e “zemërimit” të policisë. Televizioni A1 Report, dhe Tema online që e pason, kanë qenë të vetmet burime informacioni që kanë një version të tyrin lidhur me këtë ngjarje. “Policia ka ushtruar dhunë barbare ndaj tifozëve të Tiranës gjatë ndeshjes me Skënderbeun, pas thirrjeve të këtyre të fundit kundër kryeministrit Berisha. Tifozët kryeqytetas kanë bërë thirrje kundër Berishës ndeshjen e sotme, raporton A1 Report, pasi ata bëjnë përgjegjëse pikërisht qeverinë për situatën e rëndë në të cilën ndodhet Tirana, si dhe kryebashkiakun Lulzim Basha. Që kur drejtimin e Tiranës e mori Basha, ekipi kryeqytetas është mbushur me të punësuar militantë, ndërsa ka pasur probleme të vazhdueshme ekonomike.”, thuhet në Tema.

Re.Pu.