Lef Nosi

Lef Nosi, Bedri Pejani dhe Xhaferr Deva, në vitin 1943. Video me rastin e krijimit të Regjencës Shqiptare. Nën pushtimin gjerman në Tiranë, më 14 shtator 1943 mbahet i ashtuquajturi Kuvendi Kombëtar që e shkëputi Shqipërinë nga Italia dhe e shpalli shtet të pavarur dhe neutral. Një akt formal i urdhëruar nga Gjermania naziste që kishte në realitet pushtetin në Shqipëri.

Pas botimit të romanit më të fundit të Ben Blushit, në mediet e shkruara e elektronike ka shpërthyer një polemikë e ashpër pro e kundra lidhur me figurën e Lef Nosit, në të cilën janë përfshirë historianë, letrarë, politikanë e njerëz të thjeshtë, me bindje të djathta e të majta. Blushi dhe ata që mbajnë anën e tij, e quajnë Lef Nosin tradhtar dhe vendosjen e shtatores së tij në sheshin qendror të Elbasanit një turp. Pala tjetër e quan Lef Nosin hero, njeriun që nënshkroi aktin e shpalljes së Pavarësisë dhe pushkatimin e tij një vepër barbare të Enver Hoxhës.

Ben Blushi ka zgjedhur t’i drejtohet me një letër publikut për të sqaruar qëndrimin e tij për Lef Nosin, historinë e të cilit e ka përfshirë në romanin më të fundit “Kandidati” duke iu përgjgjur në të njëjtën kohë edhe një letre të botuar të Mitrush Kutelit ku flitet për gjyshin e tij Dhimitër Shuteriqi.