Ministri i Jashtëm: "Afër zgjidhjes për ligjin e luftës me Greqinë. Marrëveshje e re për detin"
Ministri i Jashtëm i Shqipërisë Ditmir Bushati, ka deklaruar sot gjatë një interviste në Top-Story se Shqipëria dhe Greqia janë shumë afër gjetjes së një mirëpkuptimi të ri për çështjen e ligjit të luftës.
“Është një çështje që nuk do të doja të prodhoja lajm, por me bindje të plotë them sonte që për ligjin e luftës jemi shumë herë më afër zgjidhjes seç kemi qenë para një apo dy vitesh”, tha Bushati.
Ai nuk ka zbuluar detaje, por nëse një gjë e tillë realizohet, atëherë procesi i normalizimit të marrëdhënieve mes dy vendeve është më i afërt. Bushati ka folur për kërkesat e Greqisë për minoritetin grek, ai ka nënvizuar se Shqipëria ka përmbushur angazhimet e veta, ndërkohë që edhe ligji i ri për pakicat i përgjigjet një prej 12 rekomandimeve që i janë vënë vendit tonë, që në origjinë është një propozim i Këshillit të Europës.
Bushati ka sjellë në vëmendje se Greqia vetë nuk është pjesë e Konventës Kuadër për Minoritetet dhe nuk e ka një ligj për pakicat, por siç u shpreh ai, “kjo nuk na ka penguar neve të bëjmë punën tonë”.
I pyetur për marrëveshjen e detit, ministri la të kuptohet se palët janë larg njëra-tjetrës.
“Ndërmjet ekspertëve tanë dhe atyre grekë ka pasur seanca konsultimi dhe shkëmbimi pikëpamjesh. Nuk jam në gjendje të them sonte tërheqjen e palëve sa i takon qëndrimeve të tyre, por janë ideuar gjurmët që mund të çojnë në një marrëveshje të re. Nuk bëhet fjalë për negocim apo rinegocim të marrëveshjes së pare”, tha ai.
Add new comment