Shakatë zyrtare të Haki Çakos dhe Policisë së Shtetit: Monitorimet nga ajri tregojnë se nuk ka më parcela të mbjella me kanabis (dokument)

Tjetër gjë të shohësh sesi në Shqipëri vijnë avionë të vegjël për t’u ngarkuar me drogë dhe ndryshe ta shohësh realitetin me dylbitë e policisë shqiptare, e cila po shënon rekorde sa i përket përkushtimit për të mbrojtur politikisht ministrin apo qeverinë me komunikata shtypi. Policia e Shtetit ka raportuar sot se në terren nuk ka më asnjë parcelë të mbjellë me kanabis sativa. A mund të besohet kjo kur vetëm pak ditë më parë u zbulua aksidentalisht pista e avionëve Piper në Durrës apo kur 700 kg kanabis të nisura nga Vlora u kapën në Bari.

Megjithatë konkluzioni se Shqipëria është e pastër nga kanabisi u raportua pas një takimi të Haki Çakos me  Oficerët Ndërlidhës Policorë të atashuar në vendin tonë dhe drejtuesit e misioneve që asistojnë Policinë e Shtetit.

Ja çfarë thuhet në njoftim : “Koordinatori i Policisë së Shtetit për misionin e fluturimeve bëri një prezantim të detajuar në lidhje me masat dhe zbatimin e misionit të fluturimeve për zbulimin e parcelave me cannabis me avion të posaçëm të Guardia di Finanza dhe Universitetit të dytë të Napolit. Prezantimi ishte gjithëpërfshirës duke dhënë fakte e rezultate të bashkëndara edhe me palën italiane të Guardia di Finanza dhe Universitetin e Dytë të Napolit prezent në takim. Edhe këtë vit janë arritur rezultate mbresëlënëse të shkatërrimit të sipërfaqes së identifikuar nga misioni italian i fluturimeve.  Për t’u theksuar është fakti se në dy fluturimet e fundit të Guardia di Finanza nuk janë gjetur më parcela të mbjella me cannabis, duke dhënë një dëshmi të pakundërshtueshme në lidhje me ndërhyrjet e Policisë së Shtetit në terren”

Më tej njoftimi thotë se bashkëpunim i Policisë së Shtetit me Partnerët dhe Misionet që asistojnë dhe monitorojnë punën e Policisë së Shtetit  ka qenë mjaft i suksesshëm. Mjafton të kujtojmë këtu rastin e Klement Balilit, ish-drejtorit të Transporteve të Sarandës, i akuzuar si një prej drejtuesve të një grupi ndërkombëtar të trafikut të drogës, të cilin policia nuk e arrestoi dot me argumentin se nuk erdhi në kohë urdhër arresti ndërkombëtar nga policitë partnere.