bota

Në përpjekje për të nxitur oreksin e investitorëve për diamante natyrorë, kompania minerare Lucara Diamond Corp dhe prodhuesi HB Antwerp zbuluan të hënën një diamant 1 175 karat në Nju-Jork.

Kompanitë thonë se ky është diamanti më i madh i paprekur në Shtetet e Bashkuara dhe i treti më i madh që është zbuluar ndonjëherë.

Një person i tretë është nën akuzë për helmimin me gaz Novichok në Britaninë e Madhe, tre vjet më parë. Denis Sergeev, shtetas rus, dyshohet si i përfshirë në sulmin ndaj ish-agjentit të dyfishtë Sergei Skripal dhe vajzës së tij, Julia, në Salisbury. Ata shpëtuan, por një grua pa lidhje me ngjarjen, Dawn Sturgess, vdiq në spital për shkak të helmimit pasi përdori shishen me gazin helmues.

Kanadezët i dhanë kryeministrit Justin Trudeau një mandat të tretë qeverisës, pavarësisht se nuk ka maxhorancën absolute. Partia Liberale e Trudeau u rendit e para në 156 zona elektorale në shkallë vendi, duke përfshirë 111 në Ontario dhe Quebec.

 Udhëheqësja konservatore Erin O'Toole, partia e së cilës u rendit e dyta, pranoi humbjen pasi rezultatet dolën në orët e vona të natës. Konservatorët udhëhoqën në 121 zona elektorale.

Dhoma e Përfaqësuesve ka 338 vende dhe një partie i duhet të fitojë 170 për të mbajtur shumicën.

Një hetim ka nisur në SHBA për mbi 30 milionë automjete të prodhuesve të ndryshëm. Hetimi i autoriteteve të sigurisë së automjeteve janë përqendruar te airbagu dhe mekanizmi që bën fryrjen në çastin e përplasjes.

Një marrëveshje përfundimtare mbi paktin e ri të migrimit në Evropë mund të arrihet menjëherë pas zgjedhjeve presidenciale franceze që do të mbahen vitin e ardhshëm. Në një intervistë për Euractive, nënkryetari i Komisionit të BE-së, Margaritis Schinas, thotë se propozimi për zgjidhjen e kësaj çështjeje u përgjigjet të gjitha problemeve.

Shkencëtari kryesor bërthamor i Iranit, Mohsen Fakhrizadeh, u vra nga një snajper i asistuar nga inteligjenca artificiale (AI). Arma kontrollohej në distancë nga operativët izraelitë, raporton The New York Times.

Irani është bërë pjesë e një aleance të themeluar nga Kina dhe Rusia. E njohur si Organizata e Bashkëpunimit të Shangait, ky grupim u themelua në vitin 2001 si një forum i përbashkët mes Rusisë, Kinës dhe shteteve ish-sovjetike në Azinë Qendrore. Organi që ka në fokus sigurinë në rajon përfshiu katër vjet më parë edhe Indinë e Pakistanin, me qëllim për të shërbyer si kundërpeshë e ndikimit perëndimor atje.   

Anëtarësimi i Iranit synon krijimin e një mekanizmi për të shmangur sanksionet e vendosura nga Perëndimi.

Në 40-vjetorin e heqjes së dënimit me vdekje, Franca është ende e ndarë në lidhje me këtë vendim. Më 18 shtator 1981, në Francë u hoq dënimi me vdekje, pas 200 vitesh aktivizëm kundër tij. Presidenti socialist në atë kohë, François Mitterrand, e mbështeti këtë vendim, por sot rreth 50 përqind e publikut francez duan rikthimin e tij, raporton France 24.

Franca ka tërhequr ambasadorët e saj në Shtetet e Bashkuara dhe Australi për konsultime, për shkak të "gravitetit të jashtëzakonshëm" të shpalljes së partneritetit strategjik midis Uashingtonit, Londrës dhe Kanberrës, që çoi në anulimin nga ana e Australisë e një marrëveshjeje të madh. Kjo e fundit parashikonte blerjen e nëndetëseve franceze nga Australia. Vendimin për tërheqjen e ambasadorëve e konfirmoi ministri Jean-Yves Le Drian.

Presidentja e Komisionit Europian, Ursula von der Leyen, është sërish në qendër të vëmendjes për shkak të mesazheve të shkëmbyera me CEO-n e kompanisë farmaceutike Pfizer.

Avokati i Popullit për BE-në, Emily O'Reilly, ka kërkuar më shumë informacion në lidhje me këto mesazhe, pasi “New York Times” raportoi në prill për bisedat me zë dhe me mesazhe që von der Leyen kishte pasur me shefin ekzekutiv të Pfizer, Albert Bourla.