Blloku Bota

Agjencia “Tass” i kushton sot një shënim ministrit të Jashtëm rus, Sergey Lavrov që ka 75 vjetorin e lindjes. 21 vjet në detyrë, Lavrov është tashmë një ndër dekanët e politikës së jashtme ndërkombëtare me njohje të mjedisve diplomatike dhe rrethanave si pakkush tjetër.

Diskutimet për një paqe në Ukrainë kanë nisur të japin disa efekte administrative në Rusi. Një dekret i Presidentit rus, Vladimir Putin u kërkon ukrainasve që banojnë në Rusi të legalizojnë statusin e tyre si imigrantë në Rusi deri më 10 shtator, ose të largohen nga vendi.

Deklarimet e Komisioneres Europiane për Zgjerimin, Marta Kos, pas një takimi me presidentin serb, Aleksander Vucic, kanë provokuar reagime nga ana e opozitarëve serbë që kanë bërë të qartë mosbesimin në rritje ndaj BE-së.

Një takim konstruktiv me presidentin Vucic. Theksova se zgjerimi është një proces i gjithë shoqërisë. Nuk është i mundshëm pa një shoqëri civile të fortë dhe media të pavarur

Gazeta greke “Kathimerini” i ka marrë sot një intervistë, ish-këshilltarit të Sigurisë të Presidentit Joe Biden, Jake Sullivan. Teksa e cilëson bashkëpunimin dypalësh SHBA-Greqi në fushën e Mbrojtjes si një ndër më të thellët në botë, Sullivan jep edhe një përgjigje se pse administrata e shkuar amerikane nuk e denoncoi doktrinën turke të “Atdheut Blu” që evokon pretendime territoriale në Egje.

Kreu i Këshillit të Europës, Antonio Kosta, ka deklaruar gjatë një interviste për AFP-në se Rusia përfaqëson një kërcënim kolektiv për Europën.

Sigurisht që fqinjët e Rusisë janë më të shqetësuarit. Por është esenciale që të kuptohet se ky është një kërcënim kolektiv

ka thënë ai.

I pyetur mbi armatimin e Europës, Costa ka sqaruar se aktualisht emergjenca e sigurisë imponon blerjen e armëve kudo ku është e mundur.

Policia turke ka arrestuar sot kryebashkiakun e Stambollit, Ekrem Imamoglu, një opozitar i presidentit Recep Tayyip Erdogan.

Policia ka mësyrë në shtëpinë e tij, ndërkohë që hetimi përfshin 100 persona, mes të cëve biznesmenë dhe gazetarë ndaj të cilëve rëndon akuza e korrupsionit, mitmarrjes dhe bashkëpunimit me terroristë. Lidhur me akuzën e fundit policia turke po heton rreth marrëveshjeve të supozuara mes Imamoglu dhe krahut politik te Partisë Punëtore të Kurdistanit, përpara sesa ai të fitonte zgjedhjet.

Askush nuk e di me siguri se çfarë është diskutuar në telefonatën 90 minutëshe mes Vladimir Putin të Rusisë dhe Donald Trump të SHBA. Në njoftimet përkatëse për shtyp Shtëpia e Bardhë dhe Kremlini vetëm sa bëjnë me dije se të dy presidentët kanë rënë dakord se lufta në Ukrainë duhet të mbyllet me një paqe afatgjatë. Ndërkohë media të ndryshme raportojnë për një armëpsuhim ndaj objektivave energjetike ukrainase të kushtëzuar me një kërkesë të Putin që të ndërpritet furnizimi me armë.

Pas bombardimeve të rebelëve Houthi në Jemen, SHBA ka licencuar sulmet e Izraelit ndaj Gazas gjatë të cilave raportohet se sot janë vrarë 400 palestinezë. SHBA ka pranuar se është konsultuar për sulmet që sa vijnë i ngjajnë vrasjeve shtetërore të civilëve.

Efekti “Trump” është ndjerë menjëherë. Kryeministri i ri kanadez, Mark Carney ka zgjedhur Francën për vizitën e tij të parë zyrtare, një vend që bën pjesë në konstitucionin gjuhësor, historik dhe kulturor të kandezëve.

Dua të siguroj se Franca dhe e gjithë Europa punon në mënyrë entuziaste me Kanadanë, vendi më europian mes jo-europianëbve dhe në të njëjtën kohë vendosmërisht amerikanoverior, e vendosur si Ju të ruajë marrëdhëniet sa më pozitive me SHBA

Është e vështirë që të kalojë një muaj pa një problem për kryeministrin izraelit, Beniamin Netanyahu. Aktualisht ai ka një përplasje të hapur politike dhe një situatë të riciklimit të krizës për shkak të shkarkimit të Ronen Bar nga pozicioni i drejtimit të Shin Betit, agjencia përgjegjëse për sigurinë e brendshme.