“Sonte keni vetëm supë”

Një lexues me emrin Hasan Pasha na ka dërguar emailin e mëposhtëm në ResPublica: "Mbrëmë në darkë u ndodha në spitalin “Xhavit Mara” të Burrelit për të parë shëndetin e një njeriu të afërt të familjes time. Pasi u ngjita në katin e dytë iu drejtova njërës prej dhomave të të sëmurëve. Rreth orës 18.00 hyn  në dhomën ku isha unë një punonjëse e këtij spitali. Pa hapur mirë derën ajo u tha dy të shtruarve: “Sonte keni vetëm supë”. Dy të sëmurët nuk folën, por unë e pyeta zonjën me habi: “Ç'domethënë vetëm supë ka për të sëmurët sonte”. Zonja nuk m’u përgjigj. Nuk ishte faji i saj. Duke dalë nga dhoma të sëmurët më lutën t’u ndez dritën. Kërkoj të gjej çelsin, por nuk kishte. Më thanë të merrja një “mjet plastik" që ishte mbi karrige dhe me të, të bashkoja dy telat që furnizonin neonin e dhomës. Duke zbritur, në shkallët e spitalit dhe në oborrin e tij dallova dhjetra njerëz me batanija, çarçafë, rezistenca... Ua dërgonin të  sëmurëve. A është në dijeni drejtoria e spitalit dhe dikasteri i shëndetësisë për gjendjen e krijuar në spitalin e Burrelit?"