Lajme

Sot është bërë publik lajmi se Ministria e Jashtme i ka dorëzuar Presidentit të Republikës kërkesën për marrjen e plotfuqisë për negociatorët që do të përfshihen në bisedime me Greqinë. Fjala është për marrëveshjen e detit, që kërkon ekspertizë teknike.

Kërkesa për plotfuqinë është ligjore, por ajo rrjedh edhe nga vendimi i Gjykatës Kushtetuese. Kemi të bëjmë pra me kompetenca të Presidentit që ka tagrin për të dhënë autorizimin e negociatave.

Projektligji për menaxhimin e integruar të burimeve ujore nuk parashikon as tarifa të shtuara dhe as tarifa të reja për puset, pasi ato janë të përcaktuara që nga viti 2016. Në thelb, ai synon të bëjë formalizimin e tyre përmes vetëdeklarimit, ndërsa procesi nuk do të ndiqet nga Ministria e Bujqësisë, por nga Agjencia e Menaxhimit të Burimeve Ujore. Gerta Lubonja nga Sekretariati i Ujit shpjegon për TEMA Tv mekanzimin.  

Ministrat e jashtëm të Greqisë dhe Maqedonisë, Nikos Kotzias dhe Nikolla Dimitrov ranë dakord  të vazhdojnë përpjekjet e tyre për të gjetur një zgjidhje të pranueshme për çështjen e emrit të Maqedonisë. Orët e gjata të diskutimit që patën së bashku në selinë e tretë të OKB-së në Vjenë me të Dërguarin Personal të Sekretarit të Përgjithshëm të Organizatës Ndërkombëtare, Mattheë Nimetz u konsideruan si pozitive.

Ministri i Jashtëm hollandez, Halbe Zijlstra, ka dhënë dorëheqjen pasi gënjeu për një takim hipotetik në vitin 2006, gjatë të cilit sipas tij presidenti rus, Vladimir Putin shpalosi një strategji për  Rusinë e Madhe.

Presidenti i Serbisë Aleksandër Vuçiç ka publikuar së fundmi një opinion në “politico.eu” të cilin e titullon: “Ballkani Perëndimor duhet të heqë barrierat tregëtare”.

Shkrimi i Vuçiç dominohet nga termi Ballkani Perëndimor dhe nga një frymë avokatie për rajonin tonë. Serbia përmendet vetëm një herë, duke na ofruar kështu një qasje më të gjerë të Vuçiç të paktën në mënyrën si do të prezantohet.

Policia izraelite ka zyrtarizuar qëndrimin e saj për hetimet për korrupsion, mashtrim dhe shkelje të betimit nga ana e kryeministrit Beniamin Netanyahu. Sipas raportimeve mediatike, policia ka rekomanduar ngritjen e akuzave penale për kreun e qeverisë pas një hetimi dy vjeçar. Këto rekomandime do t’i përcillen Prokurorit të Përgjithshëm që do të vendosë nisjen ose jo të ndjekjes penale.

Ministri i Jashtëm italian, Angelino Alfano kërkoi nga nga homologu i tij turk, Mevlut Çavusoglu zgjidhjen e menjëhershme të konfliktit që pengon kompaninë italiane Eni, të kryejë  kërkime në Zonën Ekslkluzive Ekonomike të Qipros kërkoi .

Ministrja e Kulturës ka deklaruar se konsultimet kanë nisur dhe se sipas saj projektligji do diskutohet përpara se të bëhet ligj. Sipas saj madje bëhet fjalë për decentalizim kompetencash dhe jo centralizim, ndërkohë që për godinën e teatrit u shpreh se nuk do të ketë ndryshime derisa të ketë një projekt të ri.

Disa media të njohura perëndimore i kanë lënë vend raportit vjetor të shërbimit sekret estonez, që trajton në mënyrë të përmbledhur kërcënimet kryesore konvencionale ndaj Estonisë dhe vendeve balltike. Bloomberg e cilëson shërbimin estonez si një nga agjencitë më të specializuara në botë për çështjet ruse, nisur nga njohja e gjuhës dhe e kulturës, por edhe penetrimi në brendësi të zhvillimeve që mundëson një pasqyrë më realiste të situatës sesa ajo që rëndom përcillet nga mediat perëndimore.

Shënim: Shkrimi me titull: "62 mijë ankesa për mbifaturim nga OSHEE" që shfaqej në këtë url, u hoq nga publikimi pas një rivlerësimi të besueshmërisë të përmbajtjes së materialit origjinal publikuar nga BIRN. Ky shkrim - tema e të cilit është shumë e ndjeshme do të ripublikohet nëse dokumentacioni që pretendohet do të bëhet publik, ose nëse ResPublica do të mund të shtjerë në dorë dokumentet që provojnë se problemi i mbifaturimit paraqitet në praktikë ashtu siç supozohet në shkrimin e BIRN. 

Shpresojmë në mirëkuptimin e lexuesve.