Lajme

Pasi vetë kryeministri doli në konferencën me policinë dhe vlerësoi maksimalisht punën e saj në luftën kundër trafikut të drogës, ministri i Brendshëm, Saimir Tahiri, po shfaqet më i shpenguar në reagimet e veta. “Duhet te kisha falenderuar PD qe heret ne mengjes, por s’besoj merziten ti falenderoj pak me vonese per sherbimin e vyer qe po kryejn duke i bere jehone te perditshme sukseseve te Policise se Shtetit. Me shume mirenjohje per Shqupistat”, shkruan ai sot në përgjigje të një deklarate të Edi Palokës nga PD.

Federata Shqiptare e Futbollit dhe strukturat që do të mbikëqyrin ndeshjen Serbi-Shqipëri kanë menduar ashpërsimin e masave. Kështu sipas “Mapo” “veprimet e paligjshme të tifozëve në ndeshjen Shqipëri-Serbi, ka gjasa të konsiderohen akte terroriste, duke bërë që fajtorët të dalin përballë Gjykatës së Krimeve të Rënda dhe të marrin ndëshkime ekzemplare”.

Pandeli Majko, deputet i Partisë Socialiste dhe ish-kryeministër shkruan sot për qëndrimin e opozitës e cila sipas tij, nuk po di të përfitojë nga gabimet e qeverisë. Majko del hapur në pozicion kritik kur thotë se “nuk di të kem parë një opozitë që të gëzojë kaq shumë fat me gabimet e qeverisë”. Por Majko shton se opozita nuk është në lartësinë e detyrës dhe ky është fati i qeverisë. “Si rregull, qeveritë fajësohen sidomos për ekonominë kurse opozita është përgjegjëse për debatin politik me të cilin ndërton paralelisht një moral në “pritje” të vendimit të publikut në zgjedhjet e rradhës.

Qeveria shqiptare ka ecur përpara me projektet për gazin dhe furnizimin e vendit. Në një intervistë për revistën “Monitor”, drejtori i Drejtorisë së Politikave dhe Zhvillimit të Hidrokarbureve pranë Ministrisë së Energjisë dhe Industrisë, thotë se ka nisur tanimë hartimi i Masterplanit të Gazit.

Kandidati republikan për zgjedhjet presidenciale Donald Trump mbetet lajmi kryesor nga kjo fushatë. Pak ditë më parë ai u vu në qendër të debatit pasi në Neë Hampshire nuk korrigjoi një qytetar që tha se Obama është musliman. Më herët ai ka folur shumë ashpër kundër imigracionit klandestin me fjalë të papërshtatshme për hispanikët.

Zemërgjerësia dhe shpirti human i “Nënë Terezës” është gjetur si metafofë për të ironizuar zonjën e hekurt të Gjermanisë dhe vendimet që ajo mori fillimisht për të pritur një numër të madh emigrantësh nga Lindja që po mësyjnë Europën dhe më pas lëshimin e urdhërit për të rikthyer kontrollet në kufirin me Austrinë.

Revista “Spiegel” portretizoi kancelaren Merkel me veladonin e Nënë Terezës për të kritikuar qëndrimin që Gjermania po mban ndaj krizës së emigrantëve sirianë.

Në Shqipëri do të vijnë refugjatë sirianë. “Top-Channel” njofton se qeveria shqiptare ka nisur negociatat për të pranuar 3 mijë refugjatë nëse kjo do të kërkohet nga Agjencia e Kombeve të Bashkuara për Rrefugjatët, UNHCR. “Dy burime qeveritare, në kushtet e anonimatit, i thanë Top-Channel se disa ditë më parë, gjatë një takimi me 7 ministra, zëvendëskryeministri Niko Peleshi ka kërkuar ngritjen e një mekanizmi për të marrë masat në kushte nevoje.

Ditë më parë qeveria shqiptare premtoi se në krye të dy javëve do të njoftonte heqjen e ekskluzivitetit të fluturimeve ndërkombëtare nga Rinasi. Dhe kjo u lançua si nj arritje. Gjatë një interviste për “A1Report” ministri i Ekonomisë, Arben Ahmetaj, bëri të ditur se ishte rënë dakord me koncesionarin gjerman dhe me këtë kuadr edhe aeroporti i Kukësit do të vihej në funksionim. “Ti heqësh ekskluzivitetin një koncesionari që ka pronësinë e qiellit shqiptar ka qenë shumë e vështirë”, u shpreh Ahmetaj.

Para viteve ’90 Shqipëria kishte një moshë mesatare shumë të re, 27 vjeç duke qënë në këtë mënyrë dhe popullsia me moshë mesatare më të re në Evropë. Por vit pas viti ajo ka ndryshuar, për të ardhur në 2015 me 8 vjet rritje. Plakja e popullsisë është një fenomen shqetësues në pjesën më të madhe të botës.