Bota

Beogradi zyrtar ka deklaruar një pozicion neutral në dukje ndaj referendumit në Republikën Srpska, parashikuar për t’u mbajtur në vitin 2018. Njoftimet zyrtare mbi një takim në Beograd të kryeministrit serb, Aleksander Vuçiç me presidentin e RS-së, Milorad Dodik, përcjellin këtë qëndrim të Serbisë rreth nismës së marrë nga serbët e Bosnje Hercegovinës.

PHalepi po kthehet në pikë strategjike dhe përcaktues për të ardhmen e konfliktit në Siri. Agjencia shtetërore ruse e lajmeve “Sputnik” është përpjekur të sqarojë qëllimet amerikane dhe pozicionin rus mbi atë që quhet oferta e ShBA-së për vendosjen e armëpushimit në Siri.
Shkrimi është formalisht një replikë me një shkrim të publikuar na gazetën amerikane “The Washington Post”, por ai zbardh një pjesë të mirë të interesave që ndërthuren aktualisht në Siri.

Gazeta e njohur italiane “Corriere della Sera” i ka kushtuar sot një hapësirë historisë së një 33 vjeçari maroken, Fagrouk Hmidane. Ky i fundit ka refuzuar që të betohet mbi Kushtetutën italiane për të marrë nënshtesinë dhe kaq ka mjaftuar që autoritetet ta largojnë nga vendi. Hmidane ishte në Itali që në vitin 1998 dhe iu bashkua të atit dhe vëllait që punonin në Treviso. Të integruar në jetën e qytetit, i vëllai inxhinier, edhe Fagrouk u shkollua në Institutin Teknik dhe nisi punë si elektriçist.

Vatikani kreu shenjtërimin për t’i dhënë një vend asaj që e sheh si misionaren e vet. Kurse në Ballkan ka nisur komedia për origjinën e Nënë Terezës. Nuk është vetëm politika që përflet vlera të kësaj natyre, por edh të ashtuquajturat Akademi Shkencash që janë me bollëk në rajonin tonë.
Kreu i Akademisë maqedonase Taki Fiti ka deklaruar se Nënë Tereza nuk është shqiptare, por një vllahe etnike e Maqedonisë.
Sipas Fiti, babai i Nënë Terezës, Nikola Bojadzi ishte një vllah etnik i Maqedonisë, kurse e ëma ishte e lindur në Shkup nga prindër të përzierë vllaho shqiptarë.

Korea e Veriut ka kryer dje testin e pestë bërthamor të vetin. Fuqia shpërthyese e ishte e vogël: 10 kilotonë, që është 5 kilotonë më pak sesa bomba e Hiroshimës.
Shtëpia e Bardhë në ShBA ka reaguar duke paralajmëruar pasoja të rënda. Këtij qëndrimi formalisht i janë bashkuar edhe Rusia me Kinën, ndërkohë që të gjitha vendet fqinje po kryejnë verifikime nëse ka rrjedhje radioaktive.
Media zyrtare koreanoveriore ka deklaruar suksesin e testit, që pason një testim të dështuar në janar ku Pheniani pretendonte se shpërtheu një bombë me hidrogjen.

Kryeministri i Kosovës Isa Mustafa ka deklaruar sot nga mbledhja e qeverisë se për çështjen e demarkacionit me Malin e Zi nuk do të pranohen kushtëzime nga askush. Ai ka sqaruar se heqja nga rendi i ditës i saj është bërë për shkak të presioneve dhe kërcënimeve fizike ndaj deputetëve të ndryshëm, duke shtuar se qeveria do të nisë një fushatë takimesh dhe konsultimi për të sqaruar dhe argumentuar qëndrimin e saj.

Qeveria turke nuk pushon së bëri surpriza ndaj europianëve. Përtej deklarimeve që kanë bërë bujë, qeveria turke po ndërmerr edhe disa akte që cilësohen si të papranueshme për standardin europian.

Hungaria shfaqet si avokate e integrimit të shpejtë të Ballkanit Perëndimor në Bashkimin Europian. Ministri i Jashtëm i saj, Peter Szijjarto, deklaroi gjatë punimeve të forumit Bled Strategic, se destabilizimi i Ballkanit Perëndimor kërcënon sigurinë e Hungarisë.
Për t’i dhënë përgjigje këtij eventualiteti që sipas ministrit hungarez kërcënon me një valë të re migratore, ai ka sugjeruar përshpejtim të anëtarësimit të vendeve të këtij rajoni në BE.

Presidenti i Shteteve të Bashkuara të Amerikës ka emëruar dje të parin gjykatës federal mysliman në historinë e vendit. Abid Qureshi është gjykatësi që do të shërbejë në Distriktin e Columbias.

Pavarësisht politikës predikimi fetar mbetet problematik dhe nxjerr zbuluar ndasitë thelbësore në botën islame. Nëse Imami i al –Azhar deklaroi pak ditë më parë nga Grozni se Salafizmi nuk bën pjesë në sunizëm, dje një nga imamët kryesorë të Arabisë Saudite bënte thirrje në faljen e tij për vrasjen e shiitëve, hipokritëve, kristianëve dhe hebrejve.
Falja dhe predikimi i imamit u transmetuan live në kanalin televiziv egjiptian Al-Qahera Wal Na dhe ato u bënë nga Masjid al- Ḥarām, njohur si Xhamia e Shenjtë, që ndodhet në Qabe, në qytetin e Mekës.