Arkiv-Lajme

Dje në televizionin UTV, Çim Peka intervistoi për një orë Blendi Klosin, Sekretarin Organizativ të PS-së. Gjysma e intervistës u përqëndrua rreth mundësisë së zgjedhjeve të parakohshme. Sipas Pekës, i cili njihet për aksesin që ka tek njerzit më të afërt të Berishës, mazhoranca ka 70 vota për një kandidaturë të PD-së për President të Republikës, por deputetët e LSI-së nuk pranojnë të votojnë për një kandidaturë të tillë.

Një debat i ashpër mes Paul Krugman-it, fitues i çmimit Nobel në Ekonomi, dhe Ben Bernanke-s, shefi i institucionit Federal Reserve, që në thelb është Banka Qendrore Amerikane, po quhet ‘Beteja e Mjekrave’ (ngaqë të dy kanë mjekër). I pari, së shumti me artikujt e tij në New York Times, e akuzon të dytin se është i ngathët e i ndrojtur në masat e ndërhyrjet kundër papunësisë e kundër rritjes së ngadaltë ekonomike. I dyti i quan ‘të ndërkryera/mendjelehta’ (reckless) sugjerimet e të dytit (në foton tonë, majtas është Bernanke, djathtas Krugman).

Të gjitha gazetat e sotme greke kishin zgjedhur për tituj kryesorë fraza të dëshpëruara që përcillnin mesazhin se “Greqia është e paqeverisshme me këtë parlament që doli prej zgjedhjeve”.  Ta Nea e qendrës së majtë kish titullin se “Makthi i të mbeturit pa qeverisje”. Kathimerini e qendrës së djathtë kish një titull që linte pakëz shpresë: Duke kërkuar një qeveri. Gazeta Kerdos, me natyrë ekonomike, thosh se “grekët kanë përcjellë një mesazh të qartë elektoral”. Në fakt, ngjarjet po provojnë se gjendja është vërtet e makthshme.

Në një intervistë dhënë televizionit News 24, deputeti i PD-së Selami Xhepa deklaroi se buxheti i shtetit për këtë vit ka gjasa të mëdha të rishikohet me ulje, sepse të ardhurat e parashikuara në buxhetin aktual nuk po realizohen.

Pyetjes së gazetës online time.com, se “a mendoni që mund të ketë ndryshim kufijsh në Ballkan?”, kryeministri i Kosovës Hashim Thaçi i është përgjigjur me fare pak fjalë, që bartnin më shumë se një nënkuptim: “Jo, absolutisht; çdo vend ka kufijtë e tij, ashtu siç ka edhe një Mitrovicë të vogël brenda territorit të vet.” “Jo, absolutisht jo”, thotë fillimisht Thaçi, e deri këtu është në harmoni me përgjigjen që i kish dhënë pak më sipër pyetjes lidhur me një deklaratë të tijën mbi bashkimin e Shqipërisë e të Kosovës, nëse dikush do të hapte lojën e ndryshimit të kufijve.

Çfarë do bëhet me Carla Brunin tani? Në web ka komente jo simpatike për të pas humbjes së Sarkozy-së. Përqeshet, i hidhen spica, hamendësohet kotmëkot se ajo mund ta lërë Sarkozy-në tani që s’është më President. Dhe flitet me një gjuhë shumë të shkujdesur, me po atë gjuhë që lexuesit shqiptarë komentojnë rubrikat rozë të Temës online.

Shifrat e sakta të rezultatit elektoral në Greqi janë: Demokracaia e Re me leader Antonis Samaras ka marrë 18,8% të votave (108 deputetë). Pasok-u me leader Evangjellos Venizellos është në një gjendje dramatike. Ka marrë 13,18% të votave (41 vende në parlament). Në vend të dytë ka dalë e majta radikale (Syriza) që ka marrë 16,7% të votave (52 vende). Etj, etj,

Në lidhje me papunësinë, zakonisht janë qytetarët ata që ngrenë pretendime ndaj pushtetit, por ndodh edhe që qeveria të fajësojë qytetarët se nuk e kanë mendjen tek puna, por të argëtohen apo se nuk pranojnë punën që u gjendet nëpërmjet zyrave të punës. “Shqip” sjell sot një deklaratë të fortë të Thoma Miços, Drejtori Shërbimit Kombëtar të Punës, i cili ndër të tjera deklaron se qytetarët nuk mund të presin çdo gjë nga shteti, i cili “jo detyrimisht duhet t’u gjejë punë”.

Gazetat e Prishtinës raportojnë mbi festimet e një dite të quajtur si e Shën Gjergjit, e që i bie gjithmonë më 6 maj. Përmbajtja e saj është qartazi me një konotacion të krishterë, por ka disa interpretime që e kërkojnë origjinën e saj në kohë pagane parakristiane, dhe e lidhin me ardhjen e pranverës. Krishtërimi, sipas këtyre interpretimeve, e ka shfrytëzuar këtë gjë, dhe e ka bërë festë të vetën këtë traditë ‘iliro-shqiptare’. Në fakt, ka ende mjegull mbi këtë festë, ashtu siç ka dhe mbi faktin tjetër, që festa ka marrë një natyrë popullore e përtej fetare.

Dje në mbrëmje, në orën 20.00, u shfaq Sarkozy para të vetëve, të cilët nuk donin ta besonin humbjen, dhe fjalët e tij janë të shtruara e pajtuese si kurrë më parë. Është fjalami i fundit si President: “Francezët zgjodhën në mënyrë demokratike. François Hollande është Presidenti i Francës, e duhet ta respektojmë. Fola në telefon me të, dhe i urova mbarësi. Ka diçka më të rëndësishme e më të madhe se sa ne këtu; është vendi ynë, atdheu unë, Franca jonë.” E pastaj: “I falenderoj francezët, pasi më dhanë mundësinë e më bënë nderin e madh, që më zgjodhën President.