Një detaj mbi "shpatën në shtatoren e Zogut" që duhet verifikuar

Një lexues i ResPublica, me emrin Guri Shyti na ka dërguar shënimin e mëposhtëm:

Në qoftë se do ta vërejmë me kujdes shtatoren e Zogut vendosur në Tiranë nga qeveria e Berishës, shpata e ish-mbretit qëndron e mbështetur nën dorën e majtë. Zbatuesit e monumentit kanë harruar një detaj “të vogël” që, edhe në qoftë se Zogu do ta ketë “zhveshur” ndonjëherë atë shpatë (gjë që nuk ka ndodhur kurrë), e ka bërë me dorën e djathtë. (Kush do të bindet për vërtetësinë e kësaj le të shikojë se në cilën dorë e mban shpatën Skënderbeu në monumentin e sheshit të tij, apo në cilin krah varet shpata në monumentin e Sulejman Pashës etj.). Edhe sikur mbreti të ketë qenë mëngjërosh, gjë që nuk rezulton në asnjë dëshmi historike, gjithsesi është e pranuar nga kushdo që shpata, në përgjithësi, nëpër monumente, varet në krahun e majte pikërisht sepse përdoret me dorën e djathtë. Po si ka ndodhur ky paradoks? Nuk e them me bindje, pasi nuk e njoh skulptorin që ka marrë paratë për atë përmendore, por ka shumë gjasa që autori, duke ia njohur “meritat” Zogut në përdorimin e shpatës, ka dashur të tallet me vetë të zotin e përmendores, ndërsa porositësve, as që u ka shkuar ndër mend dhe as e kanë vënë re një gafë të tillë. Pa folur pastaj për faktin që Ahmet Zogu nuk ka pasur ndonjëherë shpatë dhe pa bërë pyetjen që e kam në majë të gjuhës: po gjithë ato dekorata të larta që mbulojnë gjoksin e Zogut në cilat “beteja” u fituan?!